حكايه شام

بارت 10

قصه جريئة لفتاة تتعرض للتحرش و.............

اسعد الله اوقاتكم اعزائي 🌹

#بارت 10

..........❣️........................❣️...........

شام : بدا رضا يكوم على حيله ويمشي شوي شوي رجعت صحته الناس بعد خفت مو هواي يجون قليل

المدارس شارفت على الانتهاء كل يوم يمر ادعي ربي ياخر الزواج صرت اليل ما انامه على التفكير والقلق 'اه اني شلون قبلت بي ليش استعجلت كان اضربت عن الزواج أفضل لو مكمله السادس كنت تخرجت و صرت كليه و ماكو احد يحكمني

واذا فقدت دليل طهارتي مو بل لازمه ازوج كان بقيت هيج احسن اكون نفسي و اكعد ليش استعجلت ذبيت روحي بنص النار يعني كل يوم راح ينعاد الي صارلي بذيج الليلة اااه

يعني راح اعيش تحت رحمة مهند وهو انذل خلق الله حتى من تقدملي وقبل يتزوج لان بداء الموضوع ينكشف ورضا عرف ومتعارك ويا هذا الي كالته الي مياسه بل بداية قبل لا اعرف حاولت أتقبل الموضوع واكول لنفسي راح احاول اعيش ويا و انسى الي صار بس بعد ما عرفت مو علمودي بل لان انكشفت حقيقته السوده و عاره حاول يغطي
على فضيحته
ااااه منو يخلصني منه منو يرحمني ويبعده عني كلبي يتكطع قهر على نفسي الي ضاعت مني صرت انسانه ثانيه بكل تصرافاتي "
احجي واباوع لمرايتي اااه كم اتمنى ان اعود الى الماضي لا ابالي بشيء ولا اهتم
ادمرت من صدك احجي و اكل وامشي بس روحي باهته ميته كل هذا الخراب بحياتي اجاني دفعه وحده
خلصت المدارس وبداء العد التنازلي للزواج بدت امي تحضر والعائلة كلها طايرة بينا و يردون عرس البنات يجهزن فساتين و مكياج و يحضرن شيسون بل عرس و شلون يزينون البيت
اني كل هذي الفترة خلصتها بغرفتي المشؤومه الي حامله كل اسراري واوجاعي و همومي هاي الغرفه تشهد على وجعي و قلة حيلتي وتعبي من الحياة الي اعيشها بسبب واحد ارعن ما يعرف يتصرف
مياسه بطنها بدت تكبر و تتعب بسرعه و ملتهيه بزوجها وطفلها عني ونور هم صار الموضوع عادي لان بحكم انخطبنا عبالها تقبلت الموضوع بس ما تدري الي بكلبي شنو ولا احد يعرف لازم اسد حلكي واكبت صرخاتي بداخلي صدك شي يقطع القلب انو تكون مجبور على شخص ما تريده ولازم تسكت و ما تفتح حلكك
التزمت الصمت والبرود تجاه كل شي و مهند مرات اصادفه من انزل ما شايفته هواي و هو يريد فرصه يختلي بيه كل ما يشوفني يضايقني بتصرفاته ونضراته الخبيثه لو ابتسامته الي كلها حقد ووعود بتعذيبي صرت اشوفه انسان مثل الافعى تلدغ من جوه الجوه ولو حرام اسمي انسان على حقارته وحيونته قصص وروايات عراقية كرار صلاح
صرت اتجنب وجودي جوه لان صار يتعمد يجي يضايقني ويسمم عيشتي والبيت ما يفرغ وما تصيرله فرصه يصعدلي مرات يدز عليه انزله بس اغلس نوب مدري منين جاب رقمي وصار يوميه يراسل و يتوعد

صرت اكره اكثر من قبل جنت اشوف الرسائل ومطنشه الوضع حتى الخوف منه ومن بطشه بيه تبخر
صار شي طبيعي بحياتي تهديده و وعودة لي جنت اذا ما اشوف رسالة استغرب مشت الفترة هاي و كلشي ما فهمت من الايام على كد ما سريعه
من رحنا للمحكمه حتى نعقد اجا بابا وياي بقيت لازكه بي وما عفته بعدها بيومين اجت هنا اخته كالت باجر حضري نفسج يكول مهند علمود الذهب والنيشان من الامام الكاظم هم زياره وهم تكملون النواقص
رديت عليها "خل يروح هو وعمتي وامي اني ما اروح تعبانه "
"شلون ما ترحين هما رايحين علمودج لو علمود امج .. غير انتي العروس وتختارين الي يعجبج "
"واني كلشي ما يعجبني خل يروح هو يختار "
عوجت حلكها و راحت
بعد ما طلعت بنص ساعه شفت تلفوني يرن باوعت عليه
مهند فصلته دز رسالة "شلون تردين لو اطيح حضج .. "
غلست ورجع يدك هم ما شلته
اجت رسالة "بسيييييطططه يا شام اذا ما اندمج بسيطه وتجين باجر واشوف منو الي تكسر كلمتي "
غلست عليه واني فرحانه لان حركت دمه وخليته يفور بتجاهلي اله
صار اليل ونزلت احضر بل عشا ويه مياسه لان تعبت من حملها والسكر شكل عدها من الهبطه مال زوجها
التمينه ناكل حجه جدو
"شام شلون تعاندين مهند وتكليله ما اروح مو عيب جدو رجلج ولازم تحترمي اني لو ما احبج جان الي غير تصرف وياج .. بس انتي عزيزه عندي "
باوعلي بابا "حجي جدج صحيح شام ؟!"
رديت "هاا بابا .. هو مو هيج الموضوع وما معانده .. بس تعبانه وما اريد اطلع .. خلي امي تروح "
رد "لااا انتي ترحين ما دام جدج كال و مهند طلب ترحين .. شنو انتي جاهل وهيج تسوين .. ترى بدت تصرفاتج ما تعجبني لا تخليني اتبع غير اسلوب وياج صايره ما تحترمين وتعاندين هواي .. بس ساكت عنج لان ما ضل شي وتروحين لبيت رجلج ما اريد اخلي بنفسج اثر "
سكتت وهزيت راسي
ردت اكوم
امي "وييين "
"شبعت "
جدو "اكعدي اكلي جدو لا تسوين هيج غير احنا اهلج وننصحج ونريد مصلحتج "رديت "ايي جدو اعرف واني ما كلت شي الي تردوا يصير "
جدو. "لعد ارجعي اكلي ما اكلتي شي "
رديت "بس .......
بابا "مو كلج اكعدي ليش تعاندين "
امي "ولج كعدي مو جدج وابوج يحجي شنو هل عناد الي شايلته كعددددي"
كامت تخزر بيه كعدت واكل على اعصابي اريد ابجي بيبي تباوع عليه ومحروك كلبها اكثر من امي عليه
بيبي "ياااا شبيج جده لا تقهرين روحج حبيبه .. وانتم عوفوها على راحتها جا هو كلشي غصبا ما يصير هيج اني شام احبنها الي يحاجيها ما يلوم اله نفسه موتوها من ذاك اليوم لهل يوم .. وانتي عود امها شمالج خيبه ما بيج حنيه عليها وما ادافعين عليها شو اطبكين وي العالم عليها .. اله تهججوها.. هي شكد ضاله عدكم هنا بس كم شهر وتروح .. تخلوها تطلع وكلبها شايل عليكم ليييش "