ملحوظة
الحلقات دى نزلت على الفيسبوك من فترة ونسيت انزلها هنا اتمنى تعجبكم ❤️
"نور "
حياتى عاملة زى البحر أمواجه مبتخلصش.
الدنيا رجعت تستقر تانى بعد ما حنوش كتر خيره طلعنى من القضية.
طلبوا منى فى الشركة أنى أرجع , بس رفضت , نفسيا ماقدرتش أرجع للمكان و قبلت عرض شركة تانية مقرها فى مدينة نصر , كنت واخد وضعى وبقبض مبلغ كويس الحمد لله ونورا هديت شوية .
بوست أيدى وش وضهر , هعوز أيه أكتر من كده.
ستر وصحة ونورا سيبانا فى حالنا .
بس زى ماقولتلك حياتى عاملة زى البحر..
كنت راجع بعربيتى من الشغل ومعدى على ميدان العباسية , ريقى نشف فوقفت عند محل عصير قصب وياريتنى ماوقفت!!
استنيت البياع يدينى العصير وانا بسمع وصلة من أبتهال :
"أكاد من فرط الجمال أذوب هل ياحبيبى فى رضاك نصيب !!"
خدت كوبايتى البلاستيك بأيد والأيد التانية مديتها وطلعت مفاتيح العربية من جيبى , دوست على ريموت العربية وفتحتها.
لسه بركب, أتفاجأت بشاب لابس جاكيت أسود بيفتح باب عربيتى اللى ورا وبيركب فيها بنت لابسة أبيض زى لبس المجانين !!
فضلت ثوانى أستوعب المشهد.
رميت كوباية العصير ولسه همسك فى الشاب أبو جاكيت , لاقيته موجه مسدس ناحيتى وبيأمرنى أنى أركب العربية وأطلع بيها.
أرتبكت أكتر لما سمعت صوت عربيات البوليس بتقرب علينا ..
الشاب ضرب طلقتين فى الهوا ووجه المسدس ناحيتنى تانى وهو بيقول بلهوجة :
أركب العربية وأطلع بسرعة !!
ركبت العربية وأنا متلهوج , أبو جاكيت ركب ورا مع البنت اللى لابسة لبس المجانين .
وطلعت بالعربية على الطريق , بصيت فى المراية وشوفت عربيات البوليس وهى بتكتر ورانا ..
صوت أبو جاكيت بيزعق فيا , حط المسدس فى قفايا من ورا وقال بعصبية:
دوس بنزين أكتر ,أجرى بالعربية ... وراوغ ..روح يمين وشمال.
قولتله وانا دايس على بنزين العربية :
أراوغ أيه ياعم أنت !! و أجرى فين أكتر من كده , العربية هتتقلب بينا .
قطعت كلامى لما سمعت صوت الرصاص وهو بيصيب وبيخرم فى صاج العربية !!
يادين أمى .. العربية !! أبو دى كوباية قصب!!
فضلت أراوغ يمين وشمال زى مابيقول البلطجي أبو جاكيت .. أكيد هو عنده خبرة فى مجاله.
أبوجاكيت نزل البنت تحت الكرسى ، مد أيده جنبى وعدل المراية اللى فى جنب العربية، وطى رأسه وهو بيبص على العربيات اللى ورانا من المراية.
