رواية " ميراث نور" حلقات خاصة
الحلقة التانية بعنوان " ار بى جى"
عصابة الكردى بتهجم على قوة البوليس اللى بتستعد للأقتحام..
ضرب النار مكنش مبطل , الضابط خد ساتر جنبى , ضرب رصاصتين من مسدسه بعدها أتصاب فى دراعه .
جرجرته بسرعة جوه البيت وقفلت البوابة الحديد .
نصير ,حنوش ومارو نزلوا على السلالم وهم ملهوفين , قالوا كلهم فى صوت واحد :
فيه أيه ؟!!
قولتلهم :
عصابة الكردى بتهجم على البوليس بره .. معجنة .
الضابط كان متعصب من الرصاصة اللى فى دراعه وقال :
ياكلاب.. أنا هحطكم كلكم فى البوكس .
قلتله :
ياشيخ اتنيل !! روح اترقى الاول !!! دفعتك زمانهم بقوا لواءات
ضرب النار وقف فجأة !! فطلعت على الدور الثالث جرى.
حنوش ونصير ومارو بصوا لبعض وجريوا ورايا على فوق.
فتحت البلكونة اللى فى الثالث بحذر وبصيت وياريتنى مابصيت.
مذبحة !!
عصابة البلطجى كانت محاوطة عربيات البوليس بعربيات دفع رباعى وقدرت تغربل القوة وتسيطر على المنطقة اللى تحت البيت .
شوفت العصابة وهى بتكسر عواميد الأضاءة بتاعت الشارع وبتضلمه !! كشافات عربيتهم بدأت تطفى واحدة ورا التانية , متفضلش غير كشاف عربية واحدة اللى فضل منور !!
نزل من العربية اللى كشافاتها منورة بلطجى ملامحه مكانتش باينه فى الضلمة , كان شايل حاجة على دراعه !!
مشى فى الضلمة وتوجه ناحية الكشاف اللى منور , ملامح جسمه بدأت تبان أكتر , لحد ماوصل لكشاف العربية , وأتصدمت من اللى شوفته.
البلطجى شايل ار بى جى على دراعه !!
كنت باخد أنفاسى بصعوبة ... البلطجى موجه الار بى جى ناحية البيت !!
فتحت شباك البلكونة وقلت بصوت عالى :
اهدا ومتتهورش.. الكردى معانا جوا..
ملامح البلطجى بانت فى كشاف العربية وبانت البشله اللى فى وشه , بص على البلكونات اللى فى البيت لحد ما لمحنى , بصلى وقال بصوته الاجش :
معاكم 10 دقايق لو مطلعتش الكردى هدك البيت على دماغكم.
التفت ورايا لاقيت حنوش ونصير ومارو واقفين مصدومين زيي من المنظر.
مارو قال بلهفة :
أنا هروح أجيب العصاية !!
نصير قاله :
