Les mo rakont twa mo Zistwar - Margaret

Sapit 1

Kabri pe kriye deor, enn ti labriz soufle ek fer mo lafnet an dibwa grinse. Bann premie reyon soley tap lor mo figir ki pe briye koumadir lor rafine. Mo tann enn deboulman dan lakwizinn ki fer mwa gagn enn sok. Sa mo sir ki se mo mama ki finn leve depi 4-er dimatin pou li kapav al rod feyaz pou zanimo. Depi mo lili, mo tann enn lamisik ki pe zwe dan background, enn ti lamisik indien ki pe gagne lor radio. Mo koumans ouver mo lizie ek mo retir sa ti dra ki ti pe kouver mwa-la. Dan mo refleksion, mo trouv bann pliyaz dra-la koumadir bann larivier ki pe desann depi enn montagn. Wi momem ki ti sa montagn solid la, depi ki bann larivier ti pe desann. Ase reve, inn ler pou donn mama koudme.

Dan lakwizinn mo trouv mo papa ki pe manze. Enn dipin dan so lame ki ranpli ar diber. Li ti pe tranp so dipin dan so dite ek saler so dite ti ape fer sa diber-la fonn.

Mo papa get mwa ek li trouv enn tifi avek so seve ki'nn sifone ek enn linz debraye. 

Mo papa dir mwa : " Mouni get to dipin lor latab, granmer inn fer inpe gato pima. Ena 2 pou twa"

Wi mo papa apel mwa Mouni me pa zis li, tou mo bann fami apel mwa koumsa. Se enn nom gate ki zot finn met ar mwa. Mo vremem pa kone ki so sinifikasion me mo bien kontan sa nom-la. Mo asize, mo pran mo dipin ek avek enn ti lexitasion, mo met mo 2 ti gato pima dan mo dipin ek koumans manze. Mo pa ti vremem fin me kan mo finn tann dir ki mo granmer inn fer gato pima sa inn fer mwa retrouv gou pou manz.

"Mouni! Margaret?!  Kot to ete? To pankor fini manze?" 

Mo mama pe kriye deor ek pe atann mwa pou donn li koudme pou lav pavaz. Vit-vit mo fini mo dipin me res enn tibout ki mo poz trankil-trankil dan lasiet mo papa. Li get mwa li fer enn sourir ek avek so latet ki fer mwa sign pou al get mo mama deor. Mo galoupe, lazwa dan leker ek pran sime pou sorti deor. Oups! mo manke tonbe akoz pre kot laport sorti, ti ena enn trou dan karpet. Mo papa pa ti ena ase kas pou ranplas karpet. Li ti pe get bann priorite. Apre nou bien kapav viv avek enn trou dan karpet. Vomie enn trou dan karpet ki enn trou dan lavi, pa vre?

Deor, mo santi sa ti labriz finn-la, enn bon ler fre ki ranpli ar lavi ek lespwar. Mo get dekote ek mo pa trouv mo mama. Mo kriye li ek mo tann so lavwa ki pe vinn depi enn ti kabann an tol. Laba mem ki mo mama ti pe swingn koson ek kabri. Mo al ver direksion sa ti kabann-la ek pli mo aprose, mo tann mo mama ki pe sant enn ti sante. Kan li trouv mwa li dir mwa pran enn ti touk delo ek zet lor pavaz touzour. Mo al sers enn vie ti touk ek mo pran delo depi enn drom ki ti deor ek ki ti servi pou rekiper delo lapli. Mo plonz mo touk dan sa delo maron-la ziska ki mo pa trouv mo lame. Wi delo la ti maron a enn pwin ki pa trouv nanie ladan. Dan mo lespri mo ti pe panse tansion ki enn zour enn bebet kasiet ladan ek rod manz mwa. Mo tann enn lavwa deryer mwa ; mo mama pe demande si mo'nn fini zet delo lor pavaz. Mo kas enn ti riye ek galoupe avek mo touk dan mo lame. Ek apre mo avoy delo partou.Avek presion sa touk-la voltiz depi mo lame ek tap ar baraz. Sa tapaz-la sitan for ki mo tann mo papa andan ki pe demande ki pe arive.

Mo mama arive ek nou koumans bros pavaz. Touzour mo mama pe kontign sa ti sante-la. 

"Le plus beau des tous les tangos du monde"

Enn kout mo trap so lame ek nou koumans danse ek sante ansam. 

"J'ai connu d'autres tangos à la ronde,mais mon cœur n'oubliera pas celui-là." 

Wi, ti enn zoli danse ansam me mo pa ti kone ki sa, ti pou nou dernie danse ansam.

Dan lanwit, mo mama gagn enn lafiev bien for. Mo granmer inn vini dan lanwit ek mo papa pe ale vini pou sanz konpres lor fron mo mama. Mo get mo mama ek mo trouve kouma li pe transpire. Mo santi so soufrans ek enn larm vinn dan mo lizie amezir ki mo tann li pe plegne ar douler.So lizie semi-ouver ek li paret ki li pa pe konpran ki pe dir li.Mo granmer dir ki pou bizin apel Tamby. Mo papa sorti ek apre 10 minit mo trouv enn misie avek enn gro moustas arive. Tamby ti enn zom bien for. Li rantre ek mo papa dir li si li kapav ed mo mama. So figir ti paret paret panike. Enn gout transpirasion pe glise depi lor fron ek tonb anba. So debarder inn tranpe ek sa inn fer enn mark mouye dan so ledo. Tamby ti enn zom ki bokou ti apresie dan landrwa. Li ti pe ed bann dimounn kan zot ti gagn bann douler. Li ti pe propoz zot bann latizann. Apre se zis li tousel ki ti ena enn loto dan nou lokalite. Li ti ena enn ti Morris Minor blan. Mo panse akoz samem mo granmer inn dir kriye li. Tamby get mo mama ek dan enn abritisman li dir ki pou bizin amenn li lopital. Pandan tousala, Tamby so madam, Pakion, inn ariv devan lapor ek pe gete ki pe arive andan. Lor so figir ti kapav trouv bann sign ki pe indike ki li fini kone ki pou arive.So soursi inn fronse ek depi ki li devan laport, so lame inn res devan so labous. Avek so lame li pe pez so lalev. 

Enn kout mo mama marmone ek demande kot mo ete. Mo granmer pas so lame dan so figir ek repous so bann seve ki'nn fane lor so figir par deryer. Li dir li ki "Mouni" lamem.

"Ayo Marga..ret kot twa, mo get twa" 

Mo vinn kot lili ek lame frel-frel mo granmer lev mwa pou ki mo dan vizion mo mama. Li get mwa avek enn sourir ranpli ar douler. Kouma lapli ki debord sa drom-la, ala kouma mo lizie ti ete sa ler-la. Anler mo trouv zot tou ki la, mo papa, Tamby, Pakion ek mo granmer ki pe pran mwa. Soufrans,tristes,laper,dout,fristrasion ek douler. Ala seki mo ti pe trouve lor zot figir.

"Mo.. kontan.. mo'nn trouv twa mo ti...Mouni... Pa bliye..  J'ai ..........tangos à la ..ron...de,

Mais...mon...cœur....n..'oubliera pas celui..-.là."

Mo zis santi mwa enn kout pe tonbe, wi mo granmer dan panik inn larg mwa pou anpes mo mama ferm so lizie. Kouma mo lekor tous lor sali, mo tann enn kriye ek bokou plore. Alor ki mo anba, mo trouv bann lipie pe ale-vini. Mo tann bann lavwa ki mo kone deor. Zot ape demande ki finn arive. Dan enn lavwa ki pe tranble, ki ranpli ar tristes ek laper, Pakion dir :

"Sizann... inn mor!"

Sa lanons-la ti swivi  par plizir kriye ek plore deor. Me mwa mo finn res anba lor sali, ek delo ti pe sorti depi sa montagn ki solid-la.