جلسات الطبيب النفسي

الحكاية الثانية

الممرضة بلغت الدكتور انهم محتاجينه يتكلم مع حالة جت الطوارئ في محاولة انتحار ..
دخلها كانت باصه للسقف دموعها بتنزل بدون صوت قعد علي كرسي جنب السرير
- اي الشئ اللي يستاهل تضحي بحياتك عشانه ده ؟
- بصتله ومردتش وبعد شوية قالت : ميستاهلش ، بس روحي المطفيه بعده مش قادره اكمل بيها !
- طب اتكلمي ، قوليلي حاسه بإيه ..
- حاسه اني عاوزه اقف هنا مش عاوزه اكمل من غيره او بمعني اصح مش عارفه .. حاسه ان حد جه سحب الهواء كله من حواليا فمبقتش قادره اتنفس ، كل المشاعر اللي حسيتها يوم ما قالي انه بيحبني اتعكست عليا دلوقتي 180 درجه ، يومها كانت الارض مش شايلاني من الفرحه ، نورت زي ما اتقاللي كتير واحلويت ، وعشان كنت شايفاه حاجه كبيره حسيت يومها اني حد جميل اوي لدرجة ان هو يحبه ، كلامه حببني في كل حاجه فيا في شكلي او في طبعي ، حبني فحبيتني .
بس دلوقتي ملامحي بقت بهتانه ، بقيت ببص علي نفسي بحس بحزن مدفون في قلبي ، نظرة عيني بقا فيها كسر كده صعب عليا استحمله ، صعب اني استحمل ثقتي في نفسي اللي راحت وإيماني في الحب اللي بيضيع ، مقدرتش استحمل كل ده وعشان كده انا هنا دلوقتي
- كل اللي بتقوليه ده مجرد مشاعر جواكي انتي ، ملامحنا هي هي .. احنا بس اللي بنبقا مبسوطين فبنحس انها احلوت وبنزعل فبنحس انها انطفت ، اما هي متغيرتش .. بإيدك تحليها تاني ، بإيدك تقفي علي رجلك من تاني وترجعي ثقتك وتعرفي ان مفيش حد في الدنيا له الحق انه يكرهك في نفسك
- طب ليه ؟ ليه عمل فينا كده .. احنا كنا حلوين اوي ، كنا لايقين علي بعض وبنحب بعض (ابتسمت بحزن) او انا عن نفسي كنت بحبه اوي كنت مدياله كل حاجه ، مشاعري ووقتي وحياتي واحلامي كل حاجه حرفيا ، ليه مقدرش ده ، ليه مشي وسابني ! هو لسه فارق ولسه وجعه بيوجعني وفرحته بتفرحني ، ليه ممكن انسان يضيع حد بيحبه كده من ايده ليه !!
- الحب مفيهوش ليه .. لا تسألي حد حب ليه ولا ساب ليه ، اكتر شعور حلو واكتر حاجة معقدة في نفس الوقت ، بتبقا حاجة كده من تدبير ربنا وحكمته انه يوفق القلبين دول لحب بعض او لا
- بس قالوا ان الدعاء بيغير القدر وانا دعيت بيه كتير اوي ، انا متمنيتش حاجة قده من ربنا !! اتنازلت عن حاجات كتير في مبادئي وحقوقي عشان ميمشيش واهو بردو مشي
- ليه بتبصيلها كده ؟ ما يمكن هو مش خير وعشان كده ربنا برغم دعائك مش عاوز يبتليكي بيه !
- ليه ميبقاش خير ليه كل حاجة متتغيرش ويبقا نصيبي ليه كل حاجة صعبة كده
- استغفري ربك ، وصدقيني يوم ما تشوفي عوضه ، يوم ما تقابلي الشخص اللي هيكملك فعلا ساعتها هتعرفي ليه .
- بس انا مش عاوزه غيره (معلقش) طب ذكرياتنا دي مين هيشيلها من دماغي مين هيمنع تفكيري المستمر فيها .. كلامه اللي بفتكره كل دقيقه ونظراته ليا وابتسامته مواقفنا الحلوة اللي جمعتنا مين هيمحي كل ده من قلبي وعقلي ، انا حاسه انه ضد النسيان .. مبيتنسيش !
- مفيش حد مبيتنسيش ، النسيان نعمة من لطف وكرم ربنا علينا عشان نعرف نتجاوز ونعيش ونكمل ، حياتك موقفتش لا ، لسه قدامك عمر تعيشيه واه من غيره واه هتعرفي تكملي لان ربك قادر يداوي قلبك وينعم عليكي بالنسيان والطمأنينة ، انتي جواكي حد أقوي من كده بكتير متسيبيش الضعف يسيطر عليكي
- دموعها نزلت : قلبي واجعني اوي
- قلبك انتي هتقدري تداويه صدقيني هتقومي علي رجلك وهتحبي تاني وممكن تتسابي وهتقعي وهتقومي تاني لحد النهاية .. النهاية اللي ربنا هيحددها مش مجرد عبد من عباده ميملكش شئ في الدنيا زيادة عنك !

(في الجلسة التاليه)
- انا بقيت بخاف اوي
- بمعني ؟
- بقيت بخاف من الدنيا وبقيت بخاف اخد خطوات جديدة بقيت ضعيفة اوي من جوايا وهشه واي حاجة حاليا ممكن تكسرني ، نسيانه صعب .. اوي
- طول ماانتي حطاه في دماغك وعاوزه تنسيه مش هتنسيه "المحاولة للمحو محاولة للتثبيت" هتنسيه بس يوم ما تقرري تكملي حياتك من غيره يوم ما تقولي انا خلاص هقوم اشوف حياتي بدون التفكير في اي حاجه او حد يعطلني عن ده ، يومها بس هتلاقي نفسك نسيتيه من غير مقدمات وتفكير كتير وفي اللحظه دي مش هتكوني ضعيفة ابدا
- طب اليوم ده هيجي امتي ؟ هيجي ازاي اصلا (سكتت شوية) انا حتي مش عارفه احدد مشاعري مش عارفه احدد انا بحبه ولا بكرهه ولا انا عاوزه اي ... كان نفسي ابقا بفتكرله حاجات حلوة بيننا بس حتي دي استكترها عليا
- ازاي ؟
- هو المفروض انكر كل حاجة كانت بيننا ، انكر كلمة بحبك اللي اتقالتلي وفرحت بيها في فترة ما ، انكر نظراته ليا اللي كانت بتحسسني ان مفيش مني اتنين في الدنيا ، انكر كلامه اللي كان بيطلعني بيه السما ، انكر انه حبني في يوم اصلا .. خلاني حتي مش عارفه افتكر اللي فات واهون علي نفسي انها كانت فترة حلوة وفرحتني شويه ، خلاني كارهه اللي فات وكارهاه
- مش اللي فات ده اللي كنتي مش عارفه تنسيه طب ازاي وانتي بتقوليلي دلوقتي انه انكره يعني مكنش حقيقي ؟! انتي موجوعه ومعذبة نفسك بذكريات وهمية !
- اه هو انكر انه كان حاسس بحاجة بس انا حسيت ! انا حبيت بجد واديت مشاعري بصدق ومش ذنبي ان الطرف التاني مكنش مسئول او مكنش واخد الموضوع بجدية !
- هنفضل عايشين علي ذكراه يعني بقية العمر ؟
- بحس كده ساعات بس انا اكيد متمناش ده ، بحس اني مش هعرف اتجاوزه ابدا وان لو حتي جه غيره هبقا بخونه لاني هكون لسه بحبه وبكنله مشاعر جوايا !
- ابتسم : صدقيني انتي بتقولي كده لانك مجربتيش حاجة لسه ده كان اول حد في حياتك ومتهيألك بقا ان الحب الاولاني مبيجيش بعده والكلام ده ، كلنا مرينا بالفتره دي مفيش حد متوجعش مرة كده علي الأقل قبل ما يلقي حبه الحقيقي .. في فرق كبير الناس مبتعرفش تميزه بين الحب الأول والحب الحقيقي ، الحب الحقيقي : هو الحب الصادق هو الحب اللي بيطمن وبيريح وبيكمل ، الحب الأول : هو مجرد اول كل حاجه وده بقا بيعلم وبيقوي بس مش النهاية ابداً
- يعني انا ممكن ابقي مع حد تاني بجد ؟ لسه في أمل اني اعيش قصة الحب اللي بتمناها واكون مع اللي حبيته في بيت واحد في النهاية ؟
- طبعا اكيد مش ممكن بس ، شوية وقت وهتلاقي كل حاجة بتعدي وبتنسيه وبتحبي تاني وساعتها هتكوني أقوي واكتر حكمة في التعامل مع المواقف
- طب علي ما الوقت ده يجي انا هعمل ايه
- هتعيشي ! هتجربي حاجات جديدة هتعملي حاجات بتحبيها ، هتشغلي وقتك علي قد ما تقدري ، هتقرأي حاجات إيجابية عن الطاقة وال motivation وال moving on ، كده يعني
- انا خلاص هخرج النهارده مش كده ؟
- ان شاء الله ، مستنيين مني تقرير أقول فيه انك مهيئة نفسيا للخروج بدون ما تسببي أذية لنفسك تاني
- وهتقولهم اي ؟
- هقولهم ان اللي حصل ده كان لحظة شيطان ومش هتحصل تاني ، لانك شخص قوي جدا وهتتجاوزي المحنة دي وكل حاجة هتعدي وهتكوني زي الأول واحسن انا واثق من ده .
(ابتسمت بأمل وشكرته وخرج)
The end
لا يوجد ألم يدوم للأبد والقلب حتما سيلتقي بمداويه يوماً ما قريباً او بعد حين ، فقط نحتاج لبعض الوقت .. سيلقاه بترحاب وكأنه عائد من سفر طويل ، سيتنفس حينها بعمق وراحة مجددا ويقول : "كان فينك من زمان"
وحينها سيرتفع صوت أم كلثوم في الخلفية : "اللي شوفته قبل ما تشوفك عينا عمر ضاايع يحسبوه ازااي عليا ؟!♥️🎶"
......
ملحوظة : انا من جوايا كنت عاوزه دي تكون تكملة للحكاية اللي فاتت بس عشان محطمش الأحلام الوردية والنهاية السعيدة قولت اخليها حكاية تانيه منفصلة😂♥️ فكل واحد يقرأها علي الأساس اللي يحبه بقا .