حب❤بعد⬅️الزواج💍الجزء 2

❤ الحلقة 1 ❤

صونا التيليفون تاعها كانت l'alarme طفاتو مشات للsalle de bain غسلت و توضأت شافت الساعة : خلاص يكون كمل الآذان.
مشات جيهة ركن صغير تابع للغرفة تاعها رفدت طقم الصلاة لبساتو...فرشت زربية الصلاة فالقبلة و كبرت بدات صلاتها خاشعة مع التلاوة تاعها عينيها مركزين فالمكان وين تتحط الجبهة عند السجود.

كملت صلاتها جبدت المصحف حطاتو بين يديها و تجود تجويدها لكتاب الله يخلي الانسان يحس براحة نفسية وصوتها يخليك فعالم تاني كملت قرات ماتيسر من القرآن كيما موالفة كل يوم و ناضت من مكانها نحات طقم الصلاة ولبست جبة مستورة (عريضة شوية ماشي مبينتلها مفاتنها) ورجعت كلش لpلاستو ....
ومشات لفراشها نظماتو و راحت لتيليفونها نحاتو من الchargeur رفداتو في يدها مهبطاتو معاها

وصلت لتحت لقات الحالة ظلام تسما مازال ماهبطوش مشات للكوزينة حطت التيليفون على اذكار الصباح خلات الفيديو يمشي و هي تردد موراه كانت تردد معاه بصوت منخفض هي ماشي كي تنوض لازم الدار كاملة تسمع بيها جبدت الgاطو الي طيباتو فالليل دارتلو معجون و شبحاتو من فوق بsucre glace "ليصابلي كانت مطيبة الgاطو وحدو و خلات للصلاح و دارتلو المعجون" سgمت حبات في طبسي و حبات الباقي في boite جبدت لحليب حطاتو يطيب.

كانت تخدم بلعقل و تسيي ماتديرش الحس حست بواحد واقف عند الباب طلعت راسها قابلوها يماها و باباها يشوفو فيها و يتبسمو

جهان : صباح الخير

دخلو ماشيين عندها

لينا : صباح النور عزيزتي
ادهم فنفس الوقت : صباح النور بنتي

مشات سلمت علا راسهم و ولات لشغلها قعدو هوما فالطابلة فرغتلهم حليب و قهوة كيما موالفين يشربوها دائما طفات التيليفون كان خلاص الفيديو.....قعدت معاهم هي تان تشرب نطقت لينا
لينا : وقتاش درتي ليصابلي
جهان : لبارح فالليل درت البيسكوي و ليوم سgمتو.
خربشلها ادهم شعرها : بنتي الشاطرة ربي يخليك لينا
جيهان:امين بابا ويخليك لينا انت تاني ومايحرمناش منك
لينا : يعطيها الصحة الفحلة تاعي ربي يفرحك ان شاء الله
تبسمتلها جهان : آمين يا رب العالمين🤲🏻
هوما يهدرو و دخل جهاد عليهم
جهاد : صباح الخير
لينا : صباح النور حبيبي
خزر فيها ادهم و دور وجهو لجهاد : صباح النور
جهان : صباح النور الأخ
مشا جهاد جيهتها خربشلها شعرها جبد كرسيه قعد فرغتلو يشرب.
كملت قهوتها :الحمدالله هيا نطلع نوجد روحي بصحتكم
ادهم و جهاد : يسلمك
لينا : يسلمك عميرتي نوضي خاوتك في طريقك

دارتلها براسها ايه و خرجت من الكوزينة طلعت فالدروج وصلت للايطاج اللي فيه شنابرهم جازت قبل لاختها دخلت لقات la chambre تاعها كامل مخربة الماكلة فكل pلاصة مع الكراريس و دوزان (صوالح) القراية مشات في وسطهم و هي ترفد واش تلقا في طريقها و ترجعو لمكانو مشات للتاقة بعدت الريدو باش يدخللها شوية ضوء الشمس هاذاوين بدات تشرق راحت جيهة السرير تهز فيها : رواان...رواان...هيا اختي نوضي دوك يفوتك الوقت