سكربت كامل خفيف
اعمل فولوا وتعليق ومتابعة
- حضرتك في حاجه ؟
= اطلاقا
- اصل من ساعه ما ركبت و شايفك بتبصلي و مبتسم
= لا اصل واضح من لبس حضرتك و علبة الشوكلاته اللي في ايدك انك رايح تخطب
- اه فعلا ده حقيقي
= و مخدتش حد من اهلك ليه معاك ؟
- و انت مال سيادتك ؟
= اسف
- يا ريت بس حضرتك تركز في السكه و متركزش معايا
= تحب نطلع كوبري اكتوبر و لا ناخد الدوران
- اطلع الكوبري
= تعرف ان الطريق ده اخره لحن حزين ؟
- خلاص خد الدوران يسطا و متقرفنيش
= لا لا انا قصدي طريق الجواز
- ازاي يعني ؟
= انت اصلك لسه ع اول الطريق خطوبه و كده مدخلتش في الغويط عشان كده في سعاده باينه في عيونك
- اعيط يعني يسطا و انا رايح اخطب ؟
= لا بس انا عايز انورلك طريقك
- ركز انت بس في طريقك و متشغلش بالك بيا
= يمكن ربنا بعتني ليك سبب عشان انقذك
- يا سلام ؟
= متستهترش بالكلام انا شاب زيك كان حلم حياتي اكون رائد فضاء
- و حصل ايه ؟
= اتجوزت و بقيت رائد تاكسي قد الدنيا اهو
- الجواز مش سبب انك تتخلى عن حلمك المفروض يكون دا
= دافع ليك انك تنجح في حياتك و تحقق كل احلامك
- .......
= متستغربش اصل انا كنت زيك بقول نفس الكلمتين دول لحد ما لبست
- لبست ؟!
= طيب انا ممكن اقولك حاجات هتثبتلك وجهة نظري
- اتفضل
= اعتقد انت شاب حوالي 27 سنه
- 28
= اوكي مبعدتش كتير..و واضح ان الجوازه دي صالونات مش عن حب
- و جبت الاستنتاج ده منين ؟
= لان البنت اللي رايح تخطبها متصلتش بيك من ساعه ما ركبت معايا و ده حوالي من نص ساعه و في العادي المفروض تهريك مكالمات لحد ما توصل
- لا لماح
= من طريقة كلامك و اسلوبك في القعده اظن انت محاسب و شغال في بنك
- ........
= متستغربش برضو انا كنت دارس لغة جسد و فاهم فيها
- ابتديت تشد انتباهي
= اظن انك تعرف حد يعرف والد العروسه و هو اللي عرفهم عليك و خدلك ميعاد معاهم
- والدتها
= مختلفناش الطريقه واحده
- معاك حق
= هتدي فترة خطوبة اممممم نقول سنه ؟
- فعلا كنت هقول سنه
= و طبعا انت مش محتاج اقل من سنه لان شقتك موجوده و متشطبه
- و عرفت ده منين ؟
= مفيش حد شقته مش جاهزه هيجيب علبة الشيكولاته المستورده الغاليه دي .. اكيد هيوفر تمنها للتشطيب
- يا ابن اللاعيبه
= بعد الجواز كل ده هيتغير هتلاقي نفسك كاره حياتك
- انا بس زهقت من العيشه لوحدي
= العيشه لوحدك احسن ما تلبس في انسانه انت مش عارف طبعها و لا تصرفاتها
- مهو عشان كده في خطوبه
= تفتكر سنه كافيه انك تعرف انسان هيفضل طول السنه دي يصطنع الكمال قصادك ؟
- معاك حق
= الجواز يعني ربطه يعني مسئولية يعني اطفال هتلاقي نفسك مش عايش ليك اسالني انا
- تفتكر ؟
= انا بصحى كل يوم من صبحية ربنا مرمي في التاكسي ده و بشتغل عشان اعرف اجيب مصاريف مدارس العيال و يا ريت عاجب
- انت غيرت فكرتي عن حاجات كتير
= انا ربنا بعدتني ليك في الوقت المناسب احنا شباب زي بعض و لازم كل واحد يتعلم من اخطاء غيره
- اركن ع جنب
= هنا ؟
- اه انا خلاص قررت عدم الجواز
= كسبت نفسك و كسبت فلوسك و كسبت شبابك
- حسابك كام ؟
= التوصيله دي عندي انا
- متشكر اوي و الشوكلاته دي هديه مني ليك
= ربنا يخليك.. سلام
- سلام
* بينزل الشاب من العربيه مبتسم انه فاق في اخر لحظه *
= الو.. ايوه يا ريم لا متقلقيش طفشته زي اللي قبله... انتي مفيش حد هيخدك مني مهما حصل..هروح ارجع التاكسي للواد عادل و نتقابل بكره..جايبلك معايا علبة شوكلاته مستورده هتعجبك .بحبك 😂😂
