ဝေဟင်ထက်က.... / ေဝဟင္ထက္က.... (one shot)

ဝေဟင်ထက်က.... / ေဝဟင္ထက္က....

Unicode

ဟယ်လို...ကျွန်တော်ကုန်းကျွင့်ပါ။

အခု ဒီစာကို ရေးနေတဲ့သူပေါ့လေ။ ကျွန်တော်က စာရေးဆရာတစ်ယောက်ဗျ...အဲ စာရေးဆရာဆိုလို့ ဟိုလို ဝတ္ထုတွေဘာညာသာရကာတွေရေးတာတော့မဟုတ်ဘူးနော်။ ကျွန်တော်က သုတေသနသမားဗျ။ ငှက်တွေကိုလေ့လာတာပေါ့။ ကျွန်တော်လေ့လာပြီးသမျှလေးတွေကို စာတမ်းပြုစုတယ်။ တစ်ခါတစ်လေတော့လဲ စာအုပ်တွေရေးဖြစ်တယ်ပေါ့ ဒီလောက်ပါပဲ။

အခု ခင်ဗျားတို့တွေ့လိုက်ရတဲ့ 'ဝေဟင်ထက်က....' ဆိုတာက ကျွန်တော့်ရဲ့တတိယမြောက်စာအုပ်လေးတစ်အုပ်ဖြစ်လာမယ့်ဟာဗျ။ ပထမကတော့ ခေါင်းစဥ်ကို ဝေဟင်ထက်က ဘာညာဘာညာဆိုပြီး ေပးမလို့ပဲ။ ဒါပေမဲ့ ကျွန်တော်က စာရေးဆရာသာဆိုတယ် ကိုယ်ကျွမ်းကျင်ရာ ငှက်တွေအကြောင်းကလွဲရင် ကျန်တာဘာဆိုဘာမှသိတဲ့ကောင်မဟုတ်တော့ ခေါင်းစဥ်ပေးရတာ အတော်လေးတော့ အခက်တွေ့သားဗျ။ အဲ့ဒါနဲ့ အသိတစ်ယောက်ကို တိုင်ပင်ကြည့်တော့ သူကလဲ ကျွန်တော့်လိုပဲ ချာတူးလန်ဖြစ်နေရောလေ။ နောက်ဆုံးတော့လဲ မတတ်နိုင်တော့တဲ့အဆုံး စာအုပ်နာမည်က 'ဝေဟင်ထက်က....' ဆိုပြီး တစ်ပိုင်းတစ်စကြီး ဖြစ်သွားရော။ အဲ့ချာတူးလန်မိတ်ဆွေကတော့ ဒီခေါင်းစဥ်ကို မိုက်တယ်လို့ပြောတာပဲဗျ။ ခပ်ဆန်းဆန်းလေးဖြစ်သွားတယ်ဆိုလား...လျှောက်ပြောတာဖြစ်မှာပါဗျာ။

ကဲ...ထားပါလေ။
ကျွန်တော်ပြောချင်တဲ့အဓိကက အဲဒါမဟုတ်ဘူး။
အဓိကက ဘာလဲဆို ကျွန်တော့်ရဲ့ ငှက်သုတေသနပြုစာအုပ်တစ်အုပ်ဖြစ်လာမယ့် 'ဝေဟင်ထက်က....' ဆိုတဲ့ စာအုပ်ကို ကျွန်တော် လုံးဝမရေးဖြစ်တော့တာပဲဗျ။

ဒီလို  ဒီလို...ခင်ဗျားတို့ရှင်းအောင် ကျွန်တော်ပြောပြမယ်။

ပြီးခဲ့တဲ့၆လပိုင်းက ကျွန်တော့်လက်ထောက်ဂျပုလေးနဲ့ ကျွန်တော်နဲ့က ဒီ 'ဝေဟင်ထက်က....'ဆိုတဲ့ စာအုပ်အတွက်ရည်ရွယ်ပြီး ငှက်မျိုးစိတ်တချို့ကို ရှာဖွေလေ့လာဖို့ အဖေဇုန်တောထဲကို ထွက်ခဲ့ကြတယ်။

အင်း ဟုတ်တယ်။
ခင်ဗျားတို့မျက်စိမမှားဘူး။
တောနာမည်က အဖေဇုန်တောဗျ။
ဘာလို့အဲ့နာမည်ဖြစ်နေတာလဲဆိုတာတော့ ကျွန်တော်လဲ သေချာမသိဘူး။ ဒါပေမဲ့ ပြောကြတာတော့ အဖေဇုန်တောက တောအသေခြောက်တာတဲ့။ တောကြီးကလဲ သိပ်နက်တာလေ။ တောခြောက်ပြီဆို အရပ်ရှစ်မျက်နှာကနေ 'အဖေ....အဖေ' ဆိုတဲ့အသံတွေကို တိုးတိုးတစ်မျိုး ၊ ကျယ်ကျယ်တစ်မျိုး ကြားရတယ်ဆိုပဲ။ ကြောက်ဖို့တော့ အကောင်းသားဗျ  နော့။ ေတာ်သေးတာပေါ့ ဂျပုလေးနဲ့ကျွန်တော် သွားတုန်းက တောအခြောက်မခံခဲ့ရလို့။