أبو رعب

البارت 12

( أبو رعب )
.. بقلم نورس

....................

: يلا ووجع فضيها خلي نخلص

: والله لو احد يشوفنة اله هل مرة فصل وبعد حتى للمدرسة ماكو رجعة

: شوفي لج اذا متردين روحي ارجعي لصفج واكرميني بكسوتج .. اني هاي خليتها براسي وما ارتاح اذا ما فصلتها من المدرسة

: استغفر الله .. ليش هو اني اكدر اعوفج اصلا امشي يمعودة امشي

شالاتنة مبهذلة ملابسنة كلها تراب وحالتنة حالة وصلنة للإدارة باوعتلها

لبوة: ها جاهزة ؟

ريناد: اوكفي اووكفي خلي اشك الصدرية منا حتى يصير المشهد واقعي اكثر

لبوة: اي مو رايحة انتي تمثلين بفلم

ريناد: دوكفي ولج مو هاي الصدرية ما احبها وامي لازكتلي بيها .. عاد اذا شافتها مشكوكة تذبها بالزبل احسن وهم المديرة تقتنع بشكلنة ، فكري شبيج عصفورين بحجر

لبوة: ديلا يمعودة حيشوفونة

باوعتلها وهي تشك الصدرية من الكتف واشرتلي بمعنى .. يلا

وكفت اخذت نفس وزفرتة حاولت اتصنع الوجع ودخلنا ثنينة بدون لندك الباب ع غرفة المديرة واحنة نبجي

جانت كاعدة وياها مشرفة وثنين من المدرسات انصدموا من شافونة بهل حالة وكامت على حيلها واجت علينة

المديرة: احجي ماما شبيج ؟ شصاير وياجن ؟؟ ليش هيج حالجن

ووكفت اتمسكن وكتلها هاي نبأ ( طالبة ويانة ) هيج سوت بينة واشتكينة عليها .. جابت الطالبة للإدارة وضلت تحلف انو هي ما مسوية شي وتباوعلنة وتخزر

.. ست والله جذابات هاي شوفي ما بيهن شي

شهكت

لبوة: عزززة بعينج والج عين تجذبين؟ انتي اجيتي ضربتيني ومن اجت ريناد تدافعلي هم دفعتيها وشككتي ملابسنة انتي وذني صديقاتج الي وياج

باوعتلي بصدمة وعلت صوتها

.. جذااابة والله ستت جذذذذب والله ما سوويت شي ولا شفتها ولا اني يمها ولا صديقااتي

صاحت بيها بحدة

المديرة: صووووتج ماما ..

رجعت تباوعلي وكالت بنظرات شك

.. منو هذول صديقاتها ؟ تعرفين اسمائهن

ضليت ابلعم وكلبي يدك سريع ومعرفت شحجي
اجاني صوت ريناد

ريناد: لا ست منعرفهم بالاسماء .. مو من صفنة

نبأ: عزززة ست والله جذب بيمن احلفلج وتصدكيني