ملاكي الصامت «مكتملة~»

22 و الاخير

(ملاكى الصامت )

البارت الثاني والعشرون.....(#الاخيررررر )

سليم : أنت ملاحظ مكانك ....قصدى يعنى انت عارف انت قاعد فين
زياد : ايه يا سليم ....مالك يا حبيبي انت فقدت الذاكرة تانى ولا ايه .....انا قاعد ف المطبخ بفطر
سليم : والمطبخ اللى انت بتفطر فيه ده ف بيت مين
زياد : ف بيتك
سليم : انت شايف إن الوضع طبيعي يعنى
زياد : أنت شكلك لسه نايم ... خلاص روح كمل نومك اكون انا اتغديت
سليم : يا اخى والله بحس انك مفجوع ...انت بتاكل اكل الاسبوع كله على الفطار
زياد : فين ده ....ده انا يا قلب امى هفتان اهو انت اللى مش طايقنى من ساعة ما اتجوزت..... شكراً يا سليم بيه مش واكل حاجة تانى
سميحة : صباح الخير يا سليم ......انا جبت الرز باللبن اللى انت طلبته يا ابنى
زياد : حبيبتى يا دادة والله عاوز بقى شوية مكسرات عليه
سميحة : حاضر استنى هجبلك
زياد : لأ هو انا لسه هستنى بصى أنا هاكل ده وانتى هاتى واحد تانى ب مكسرات هاكله برضو
سميحة : حاضر يا ابنى
زياد : كنت بتقول ايه يا سليم .....تعالى خدلك معلقة رز ده طعمه تحفة هيعجبك اوى
سليم : .........
زياد : انت ساكت ليه ....لو مش عاوز رز فيه مهلبية
سليم : يا صبر ايوب......انت ايه اللى جابك يا زياد
زياد : جابنى فين
سليم : ايه اللى جابك هنا ع الصبح
زياد : أه قصدك عندك يعنى ..... لأ انا قومت لقيت نفسي فاضى قولت اجى افطر معاك انا عارف إنك متقدرش تعيش من غيرى
سليم : نعم يا روح امك
زياد : خلاص يا عم ده انت رخم ياض الواحد ميعرفش بهزر معاك
سليم : اخلص وقول جاى ليه
زياد : هنتكلم هنا يعنى خلينا نقعد بره وهقولك
سليم : على أساس أنه بيفرق معاك المكان اوى وبتتكسف .... يلا يا أخويا
زياد : ماشى ....... دادة سميحة معلش ابعتيلى الرز ابو مكسرات والبسبوسة ع الصالون ...عاوز حاجة انت كمان يا سليم
سليم : ..........
زياد : يبقى مش عايز .... يلا

سليم : خير عاوز ايه ع الصبح
زياد : طب استنى اخلص اكل وبعد كدة اتكلم
سليم : زيااااااااااااااد
زياد : خلاص هقول ....انا عاوز اتجوز
سليم : نعم يا اخويا!!!؟؟ اومال احنا كنا بنعمل ايه عند الناس من يومين
زياد : ناس مين
سليم : انت عاوز تموتنى صح قول متتكسفش
زياد : بعد الشر عليك يا حبيبي ....اومال انا هاكل فين
سليم : قول عاوز ايه على طول
زياد : انا مش عاوز خطوبة والجو ده انا عاوز اتجوز على اخر الاسبوع كدة بالكتير
سليم : وانت عاوزنى اروح اقول للناس انى هجوزك بنتهم وهما لسه عارفينك من يومين
زياد : وهما هيلاقوا حد ف أدبى وحلاوتى وجمالى وخفة دمى واحترامى أصلا
سليم : لسه فى تانى ؟
زياد : طبعاً فى كتير بس أنا مبعدش ....هو انت شاكك فيا ولا ايه
سليم : انا أقدر اشك فيك ده انت خارق مشوفتش ولا هشوف ذيك
زياد : ما انا عارف ....المهم أتصرف يلا انا عاوز اتجوز اخر الاسبوع ده
سليم : وانا كمان هيكون فرحى اخر الاسبوع
زياد : الف مبروك يا صاحبى
سليم : الله يبارك فيك
زياد : عقبا.......انت قولت ايه ؟؟؟!!! فرحك ازاى يعنى ....فرحك على مين
سليم : هيكون على مين يعنى ...اكيد عشق
زياد : ده اللى هو ازاى بقى؟؟
سليم : ايه اول مرة تشوف حد هيتجوز
زياد : لأ هو انا اول مرة أشوف حد متجوز بيتجوز مراته
سليم : انا فعلاً اتجوزت عشق بس معملتلهاش فرح ولا اى حاجة من دى ....هى بنت واكيد كانت بتحلم باليوم ده زى كل البنات وانا مش عاوز احرمها من الفرحة دى وعلشان كدة هعمل فرح لينا آخر الأسبوع يوم عيد ميلادها
زياد : وهى عارفة الكلام ده
سليم : لأ هخليها مفاجأة
زياد : خلاص يبقى تتصرف وتقنع أهل ريم علشان اتجوز معاك
سليم : ادينى سبب واحد يخلينى اساعدك واعمل كدة علشانك
زياد : هفطر ف بيتى ومش هنطلك كل شوية ...ده مش سبب
سليم : معاك حق أعتبر الموضوع ده خلصان وجهز نفسك يا عريس
زياد : هو انت مش ناوى تخرج الدكتور اللى اسمه مجدى ده ....ده اتهرى من كتر الضرب حرام عليك
سليم : ماشى خليهم يخرجوه ....انا فرحان ومش هدايق نفسى بسببه
زياد : وايه اللى مفرحك يا اخويا
سليم : عشق حامل
زياد : انت بتهزر ولا بتتكلم جد
سليم : والله ما بهزر
زياد وهو يحضن سليم : الف مبروك يا حبيبى انت تستاهل كل خير يتربى في عزك
سليم : الله يبارك فيك .... عقبالك يا صاحبى
زياد : إن شاء الله ......الواد ده اول ما يجى انا اللى هربيه واعلمه الأدب
سليم : مش لما انت تتربى وتتعلم الادب الاول
زياد : ما انا هخليه نسخة منى
سليم : هو انا طايقك أساساً...... عملت ايه في موضوع الورق اللى هيتقدم للمحكمة
زياد : متقلقش كل حاجة تمام .....انا جبت الورق اللى يثبت إن عمك عثمان هو اللى ورا شغل المافيا مش عمى حلمى
سليم : طب وقضية القتل
زياد : مفيهاش حاجة دى معروفة أنها دفاع عن النفس وكمان عثمان هو اللى كان رافع على مراتك وابوك السلاح وهو عمل كدة دفاع عن نفسه وكل الكلام ده كان قدام الظابط..... متقلقش كل حاجة متظبطة وهيخرج من اول جلسه إن شاء الله
سليم : يا رب يا زياد .......انا مش عارف اقولك ايه مع انك رخم وقارفنى بس جدع ...ربنا يخليك ليا يا صاحبي
زياد : يا ابنى انت أخويا ومستعد اموت علشانك وكمان اعيش واقرفك يا حبيبي
سليم : امشى يا زياد
زياد : لأ أنا مستنى البسبوسة لو وراك حاجة امشى أنت
سليم : انا هكلم أهل خطيبتك دلوقتى واقنعهم لانى بجد مش قادر استحملك اكتر من كدة
زياد : تشكر يا صاحبى .....انت هتحضر جلسة المحكمة صح
سليم : اكيد طبعاً وهيخرج إن شاء الله وهيحضر الفرح كمان
زياد : انا بجد مبسوط أن علاقتك مع عمى حلمى رجعت تانى
سليم : عمرى ما كنت أتخيل إن اليوم ده يجى ...بس من ساعة ما عشق دخلت حياتى وهى غيرت كل حاجة
زياد : ربنا يخليكوا لبعض يا صاحبى ......انا همشى سلام
سليم : والبسبوسة
زياد بضحك : خليهالك انا مبحبش اكون تقيل على حد
سليم : لأ ما انا عارف من غير ما تقول