مسائكم ورد غوالي ❤️
شبح غيمة بلا مطر
تدور على السعادة تريد
توزع حزن بكل كتر بكل بيت
وتحصد الم اروح جيل وبعد جيل
حطت حقدها وطارت غرابيب الكره
بكل گلب علنت عاصفة بلا مطر
عصفة بركان وظلام وجور
حصدت عشيرة وطفت بيها كل نور
جبروت شجرة نزعت بلامطر
ثمره احمر حزن مثل لون النحر
وخارجة اسود مثل ليل بلا فجر
جبروت الخبث حط على كل صدر
سم ونفث دخانة بكل كتر
هنا راح تكون الأحداث
بداية القصة قبل الدخول بأحداث سنة "1900"
الزمان :سنة 1890 ميلادية
المكان: الدغارة ،،محافظة الديوانية
طلعت من الفجر الدنية بعدهي بيها خيط ظلام والجو بي نسمة برد جانت بداية خريف نهاية صيف وصوت الماي يجري وية الريح الي تحرك اورق الشجر وسعف النخل ، انطت رونق للمكان الي جان عبارة عن طبيعة حرة من أشجار ونخيل وقصب تارس النهر الصغير الي يسقي منة الفلاح زرعة ،بينما صوت العصافير وصوت الزازير مالي المكان
مشيت بخفة اباوع لذاك البيت الي هو شبه كوخ قديم من طين وجذوع النخل والباب من سعف النخل يصور النة فقر وحاجة الناس خلال هالفترة خاصة وجور بعض صاحبي النفوذ على الفلاح ولقوانين الانكليز الما تخلص ...ومن بين كل البيوت الي تحتوي تحت جدرانها قصة وحزن وگع نظري على هالبيت ،البيت الي قصتة رغم سنين واجيال ماخلصت وانما ظلت بصدور ابناءه وعم الحقد والكره عليهم وخلاهم مثل العث الي يمشي بگلب الخشب ويخرب معالمة لمن ينهي ....
.
.
.
.
.
كعد يدندن بحجايات امة الي جانت تنيمة عليهن وصوتهة يكلة "هلوس" كوم ياهلوس طر الصبح والزرع صعد بيه الماي ولون خرب واجة موعد الحصاد يشيلونة منا وابوك كبر ومالة خلگ الدين يهلوس
فز الاخير واقصد"هلوس" وسلاحة جوة مخدتة وكام بسرعة وبلا ما يحجي طلع يتلاحك الزرع قبل لا يغرك بين الماي ،،
"هلوس "
طلعت وبيدي التفگة والمحراث والتفت يمين ويسار ارمك المجان خاف عدو لابد بين النخل ويكتلني ولامن درة ولا من شاف ،لان القرية صعبت العيشة بيها وكامت العربان تنهب وتكتل علمود المواجيل ومن خوف البشر كاموا يشيلون تفگهم وين ما مشت رجليهم ،ابوي جان رجال جبير والناس تهابة عندة كيعان وحلال لكن الله ما رزقة ويلاد (اولاد) امي سطرتهن سبع بنيات وبين العشاير الماعندة ويلاد تگل هيبتة بين السلف والعربان لجن الله كرمة بعد ما شد نذر لراية السيد واجيت انا ،وهالصار عمري اثمنطش سنة وعندي بنية والعربان صاحت هالمثل ابوه ما بصلبهم بس البنات لجن الحمدلله على المقسوم ،،انا قانع بقسمتي وراضي والجاي من الله هلا بيه
طريت الزرع ورجف جسمي من البرد
وبأذني اجة صوت طفل يبجي شنهااي معگولة انا اتخيل اجاني الصوت وبكل صرخة يرجف جسمي ظليت اتعوذ من ابليس خوف من الطنطل الساكن بالبساتين ،اتذكر جدتي لمن سولفتلي على الطنطل وعن الجن شنهي هسة تذكر الطنطل واجاني مو هالكضيت هالسنين بين الزرع والگصب وماشفت منة شي مشيت بسرعة ونزعت الخوف من گلبي
ومن بعيد لاح لي شي ابيض ،هاذ طفل ،ركضت علية وعاينتة
منو هاذ العايف الطفل هيج وهالواوية تارسة القرية وبستانة متروس ماجزة وكت عن سالفة ابن مزيون الي ملختة الذيابة وهو ابن الاثنعش
أنت تقرأ
رواية:جبروت(باللهجة العراقية).
ChickLitقريبا.... تنخر سوسة العادات عظام الحق فتردي للباطل امام مجتمع توارث خذلان الامرأة . اواجه لكي اكون فأنا يحق لي أن اعيش لا أن ادثر بين عادتهم كطير في قفص ،خلقت لصنع التاريخ لا لكي ادفن بالحياة لاني امرأة .
