زهرة الشيخ علي ⚘

البارت الأول

بيت الشيخ جاسم ابو حارث

ام حارث : يمه زهرتي گومي راح تتأخرين على الدوام
زهرة : اي اي يمه كعدت .. صباح الخير يالغالية

ام حارث : صباح العافية يا نظر عيني يلا حبيبتي گومي غسلي وتعاي تريگي ابوج منتظرنه

زهرة : كمت غسلت ونزلت ورة أمي لگيت أبوي وحارث ومؤمن صبحت عليهم وكعدنه نتريگ

ابو حارث : بوية حظروا روحكم اليوم معزومين ع عشه عد بيت عمكم
الكل :  حاضر بوية .
زهرة : يابة يصير ما اجي ارجع من الدوام تعبانة وباجر عندي امتحان مهم
ابو حارث : لا بوية عيب عمج عازمنة وأكد علينه الكل يجي عمامج وعماتج لا ترديني بعد أبوج
زهرة : حاضر بوية تأمر لعيونك بس
حارث : يلا زهورتي كومي خل اوصلج بطريقي
زهرة : يلا حبيبي كملت .. رحنه للجامعة وصلني حارث وراح واني بلشت محاضرتي ب ٨ ونص من خلصت دوام خابرت ع مؤمن اجه اخذني لأن حارث عنده شغل

خل اعرفكم على عائلتنة
احنه ٥ افراد امي وابوي واخوي حارث عمره ٢٩ سنة عنده شغله الخاص
ومؤمن عمره ٢٦ سنة يشتغل وي ولد عمي عدهم معرض سيارات ( راح تتعرفون عليهم بالبارت القادم )
واني اسمي زهراء يسموني بالبيت زهرة عمري ٢١ سنة طالبة بجامعة البصرة كلية الهندسة جنت احلم اصير دكتورة بس للاسف معدلي جان اقل ف انقبلت هندسة

رجعت من الدوام بدلت وصليت وتغديت مثل كل يوم عادي وراها نمت نص ساعة لأن تعبانة ووراي روحه لبيت عمي
اجت امي كعدتني حته نروح بيت عمي مسافة قريبة علينه ١٠ دقائق بسيارة بدلت وكملت لبست عبايتي ونزلت لكيت الكل منتظرني
وصلنه لبيت عمي ماشاء الله البيت متروس ناس
تلكتني بنت عمي ابو علي فاطمة كلش احبها هل بنت مهظومة وتنحب عكس اخوها الشيخ يخووف

فاطمة :هلا  بزهرة البيت هلا بچنتنه .. وهي تباوع بنظرة حقد لبنات عمي البقية
زهرة : هلا حياتي شلونج بس بعد لتعيدين هل كلمة ماشي
فاطمة : اشاقة وياج يلا حبي تعاي سلمي ع عماتج اليوم كلها تسأل عليج 😉
زهرة : خير ان شاء الله ..
دخلت سلمت ع الكل كلش مشتاقة لهل لمة بس ماعرف شنو مناسبة هل عزيمة ، يلا يمكن عمي مشتاق لأخوانه وأخواته
كعدت يم حبوبتي ام قاسم
الجدة : شلونج يبعد هذن وهي تأشر ع عيونها
زهرة : زينه حبوبة والله مشتاقتلج ولسوالفج الحنينة
الجدة : اي يبعد حبوبتج ان شاء الله منا وغاد بعد ما تشتاقيلي وغمزتلي
ما افتهمت شنو قصدها يمكن راح تجي ويانه لبيتنه تبقه عدنه
بهل اثناء دخل الشيخ علي ابن عمي الجبير
علي : السلام عليكم
الكل : وعليكم السلام هلا شيخنه شلونك
علي : كعدت يم حبوبتي وبست راسها وعيني على زهرة الي ما شالت عينها من الكاع .. شلونج بنت عمي
زهرة : الحمد لله شيخ انت شلونك
علي : بگلبي ،اذا تحنين علي اني اصير زين ..
الحمد لله من الله بخير
ترخصت منهم وطلعت شعلت جگارة وضليت اسحب نفس قوي شسوت بيه هل بنية اوووف ربي
ليش هيج تخاف مني ليش ما تحط عينها بعيني ااااخ من عيونها .....

اني اسمي علي عمري ٣٢ سنة ابوي اسمه شيخ قاسم ورثنة الشيوخية اباً عن جد ابوي نصبني شيخ بيوم التخرجت من كلية الصيدلة وصرت شيخ والي كلمتي والناس تهابني امي وابوي بالوجود وهذول اغلى اثنين على گلبي ومن بعدهم زهرة عمري
وعندي اخ واحد مرتضى اصغر مني عمره ٢٨ سنة
واخوات اثنين بنين عمرها ٢٥ متزوجة وعدها ٢ اطفال ماخذها ابن عمي عامر يزن
وفاطمة ٢٠ سنة طالبة جامعة كلية طب