ياتعبي العشڪته

الباره الاول

طلعت من بيتنا و اني اسمع صوت خالي الي يصيح عبالك عندو مسابقة أعلى صوت..

مشيت ناحية بيت رونق..و اني ادعي و اگول يا رب
يفتحلي الباب سلطان ابو السلاطين
احنا اثنينه بنفس الفرع و بيناتنا بيت

دحگت لـ ام عامر و بداخلي اگول اويلي يابه راح تتلگاني بالاسئلة و اني شلون مزاجي اليوم ما اتحمل كلمة

من فتت من يم بابها هي چانت تشطف الگدامو
سلمت عليها سلام سريع و كملت طريقي بس وگفتني من گالت

- اولي ربى شبي خالچ

انداريت عليها و گلت و اني اتخصر

- ليش خالة ؟

- مو صوتو واصل ل سابع جار..

ابتسمت و بسخرية گلت

- كالعادة متكاون..تحبين احچيلچ المشكله لو ما حاجه ؟

لوت بوزها و گالت بعدم رضا من كلامي

- لا خية روحي لمدرستچ

ابتسمت بمجاملة و كملت طريقي..
دحگت هيچ و هيچ ماكو احد بالشارع رغم الساعة بالسبعة اغلب الموضفين طلعوا..

رفعت نفسي على اطراف اصابعي و دحگت من فوگ الباب و ضحكت من شفت سيارة سلطان طابگه بالحوش..

دگيت الباب و محد فتح.. ظليت ادگ و ماكو احد يفتح
أكيد رونق لحد هسا نايمه من نامت عليها طابوگه.

استغفرت ربي و رجعت ادگ بالباب دحگت عالگاع و شفت حجرة اخذتها و گمت ادگ بيها الباب

سمعت صوت باب المطبخ الخارجي ينفتح رجعت رفعت نفسي على اطراف اصابعي و شفت سلطان طلع

گلبي گام يدگ مية دگه بالثانيه
گبل عدلت وگفتي و هو طلع و اني اسمع صوتو يحچي و يدردم

من فتح الباب ابتسمت ابتسامة واسعة و گلت

- صباح الخير

- يا صباح الخير الي يجي من وجهچ

- ليش يابة شبي وجهي

مادري بنفسي من على صوتي.. بلعت ريگي من خزرني
و دحگت لـ ام عامر الي اندارت و گعدت ادحگ علينا

رجعت التفتت لـ سلطان و گلت

- صيح لـ رونق ما ظل وكت

تخصر و گال

- مو اشتغل عند الخلفوچ
الساعة بالسبعة و نص روحي لمدرستچ

- و رونق ؟

- ما اداوم الوكت تأخر

هزيت ايدي و گلت بسخرية

- و انت ليش تقرر عنها

رفع تك حاجب و گال

- ربى روحي من هين ترا طابگات عندي
رونق لحد هسا مطموره روحي انتي و گولي للمديره مريضه

- اييي و ليش تفاول عليها ؟ اگوللها مخموده و تأخر الوقت و ما لحگت

حچيتها و مشيت و أني بداخلي اگول من اشتعلوا اهلك على هاي النفسيه الشايلها

رحت للمدرسة و اني ادردم  و كل ما أتذكر كلام سلطان مدي هيچ اهجم عليه اشبعه بوس
لا اقصد بوكسيات

وصلت للمدرسة و دخلت للصف و چان وقتها درس رياضيات تجينا ست خولة بيه
ما صدگ على الله يخلص الدرس تا اطلع عوذه شگد نفسيه و حقنه چنها النسخة الانثوية مال سلطان..

رجعت للبيت و من فتت استقبلني صوت خالي الي يصيح..تنهدت و گلت

- جينا على مشعول الاهالي الي ما يسكت

طبيت للبيت من باب الصالة لگيت خالي گاعد ويمه امي الي تحاول تهدا بيه
دحگت عليه شلون عاگد حواجبو و معصب فول

ما حچيت كلمة و لا گلت شكو..لأن متعوده على هالشي
خالي عندو محل مال ملابس معروف بالسوگ بس ما شاء الله يوميه متعارك وي واحد

فتت لغرفتي ولگيت طيبة گاعد تدرس
طيبة اختي وهي هسا مرحلة ثانية كلية اقتصاد

ذبيت الجطنه بالگاع و مددت على چربايتي و گلت

- شبي عُميد

رفعت راسها و دحگتلي من ورا نظراتها الطبية المستحله معظم ملامح وجهها

- كالعادة متكاون وي واحد بالسوگ

ضحكت باستهزاء وگلت

- يعني ما كافي المعارك الي بيني و بينو

- تؤ ما تكفي ما تشبعو

حچتها طيبة بضحكه
و اني رجعت گمت وگلت

- شو ما مداومه

- ماخذه اجازة

تأففت و غيرت ملابسي و رجعت طلعت برا الغرفة
صبت امي الغدا و گعدنا نتغدا

دحگت لـ خالي عماد شوية هسا هدا..والله ما ادري شلون لحد هاي اللحظه متحملين وجودو بينا
بس شنسوي ما عدنا غيرو من بعد رب العالمين

هسا اجا الوقت حتى اعرفكم بي على نفسي
اسمي رونق عمري 19 سنة ادرس سادس علمي
صح دخلت اله بالدفرات و رزايل خالي عماد على الطبه و الطلعة..چان طموحي ادبي صح سمعتو بين الناس مو حلوه بس يعجبني و اغلب موادو سهله
بس شنسوي حكم القوي على الضعيف
ضاعت عليه سنتين بسبب احداث داعش
بوقتها طلعنا من منطقتنا و رحنا لـ كركوك من بدت العالم ترجع رجعنا اول الناس تقريباً من صلاح الدين و عندي اخت وحده اسمها طيبة..اكبر مني بـ 3 سنين.. ساكنه اني و امي و اختي و خالي عماد

ابوية ميت من جيت على الدنيا..و عمامي بغير منطقة ساكنين عندي عمام اثنين و اصلاً علاقتنا مو حيل قوية من عهد ابوية دايماً معارك طاحنة بينهم
صح كل فترة يجون يسألون علينا و يشوفون شنو محتاجين..و دائما عمي جابر الچبير يجي و يسأل اكثر من عمي الصغير