لحگتهم للصالة و گعد على القنفة
طيبة جابتلو معقم و گعدت تمسح وجهو و هو كل شوية ينتر بيها لأن يتأذى
گعدت گدامو على القنفة و گلت
- منو هذوله
- انتي شعليچ
صاح بعصبية و أني رفعت ايدي و صحت بي
- ايي لا تصيح..چان طلعت صوتك عليهم لو بس عليه
أني حچيت هيچ لو هو وخر طيبة من گدامو
و اجا ناحيتي..كمشني من زندي و خلاني اگف على حيلي.. امي كمشتو تا يوخر عني
بس ما فاد وياه و هو يهز بيه و بعصبية يحچي
- انتي بالذات تنچبين و تسكتين
سوياتچ و طلعتچ بنص الزلم لا حسبالچ افوتها لچه
دفعتو بيدي الثانيه و اني اصيح
- تعرف مو صوچك..لا والله صوچي اني الخفت عليك و طلعت اشوف شبيك
- اسم الله شكو شصاير؟
اندارينا كلنا على صوت ام سلطان الي فاتت للصالة يمكن عافو الباب الخارجي مفتوح و ما شاء فاتت عبالك مداهمه
صديت عنها و أني اكتم غيضي من خالي الي گال
- هلا ام سلطان تفضلي
امي راحت عليها و سلمت.. گعدت وهي ادحگ عليه و گالت
- يمه جبتلچ جنطتچ نسيتيها..زين عماد شصاير
هذوله منو الي ضربوك
رحت عليها و اخذت الجنطه و طلعت امي صاحت وين
انداريت عليها و گلت
- للمدرسة..خاله رونق راحت ؟
- اي يمه راحت سلطان وصلها
هزيت رأسي بـ أي و طلعت
من اشتعلوا اهلو..من اني وياها ما يوصلنا
الأخ يستغل الفرص شافني مو وياها فـ وصلها
طلعت و شفت الطريق ما بي طلاب الوكت تأخر
بس اروح متأخره للمدرسة و لا اگابل عماد
فوگ ما چنت خايفة عليه و اريد ادافعلو
احصلي رزالة منو..همزين جتي ام سلطان چان الله و اعلم شصار
وصلت للمدرسة متأخره
و گوه فوتتني المدرسة للصف..گعدت بمكاني يم رونق الي گالت بهمس
- عبالي ما راح اداومين
و بدون ما ادحگ عليها گلت
- و استغليتي الوضع و جيتي وي سلطان
شگد نحيسه
- والله سلطان گال امشي اوصلچ..ومن گلتلو عليچ گال يجوز ما ادوام
ما جاوبتها وركزت بالمعلمه الي گاعده تشرح..
بالفرصه طلعت للساحة..وياي رونق
گعدت على دچه و بيدي نستلة و عصير..لأن ما متريگه و راسي گام يوجعني
رفعت رأسي على صوت ضحكات..يجرنها جر
شفتها لـ هديل وتك القندرة مالتها اماني
يدحگن عليه و يضحكن..ما درتلهن بال
و هنّ من شافني ما مهتمه بيهن
جني صوبي..و بدون ما ارفع راسي گلت لـ رونق
- ما عليچ بيهن..اشگ حلگچ اذا حچيتي كلمة
هزت رأسها بـ اي
وصلن عدنا و اني ما زلت مستمرة أكل
- شلونچن بنـات
حچتها و هي تجر بـكلامها
يا الله شگد غثيثة و تنرفز و ترفع الضغط
- زينين
حچيتها بدون ما ادحگلها و بنبرة بارده
- ايي عفية..اگول رونق
اليوم سلطان وصلچ مـو ؟
سألت سؤالها..و قبل لا ترد رونق انـي گلت
و نظراتي عليها
- ايي وصلنا
رفعت تك حاجب و گالت
- و دانتي وياها ؟
ابتسمت و أني اگول باستفزاز
- ايي غير احنا جوارين
و هو ابن خالة امي
لوت شفتها وهي تكتف أيديها لصدرها
- عجل ليش يگول لـ ضحى ما گاعد احچي وياها ؟
ابتسمت و أني اغمزلها و اگول
- غير حتى ما تغار اختچ.. بعدين ترا علاقتي بـ سلطان قوية..و بينا ميانه زفره
مع ما ختمت كلامي ضربت بكوعي ايد رونق وهي گبل افتهمت قصدي وگالت بضحكة متوتره
- اي اي..غير ربينا سوه
تخصرت هديل و گالت و هي تقلص عيونها السود
هي صح حلوه بس عيونها عبالك دگم قميص..
عكس اختها ضحى حلوه بشكل..بس طبعها زفت..
- و منو يگول كلامـچ صحيح ؟
يجوز تحچين هيچ حتى تغيضيني و تغيضين اختي
وگفت و اني اهز راسي بـ لا و اگول
- تؤ تؤ..شلون اغيضچن و انتن بنت الحجي الفاضل العابد اخاف يروح يشور بينا وحوبتچن تطلع بينا..يمـه عود يصير بيه اني وين انطي وجهي
مع ما كملت كلامي تقدمت عليه و هي تضغط على حنچي بقوة..رونق حاولت تدفعها بس أني ما تحركت من مكاني..بس دفعتني على الدچه و اني اسند نفسي بيدي حتى ما اوگع
غمضت عيوني من حسيت باظافرها تجرح خدي و يم شفتي
و مثل فحيح الافعى گالت
- انچبي ربى..و لا تجيبين طاري ابويه على لسانچ لأنو اشرف منچ و من كل عشيرتچ
هزيت رأسي بـ اي و هي وخرت ايدها من وجهي بنتره
و أني بس ابتعدت ايدها..گبل عطت و اني الزم وجهي و اصيح و ابچي
فتحت عيونها على وسعهن و هي تلتفت و تشوف البنات بالساحة يدحگن عليها..
كمشت ايد رونق وگلت
- امشي .. امشي محد يگدر يأخذ حقنا الا المديره
حاولت تكمشني تا ما اروح بس اني تجاهلتها
و مشيت للمديرة و أني حاطه ايدي على حنچي اضغط عليه تا يصير احمر بالزايد
و بنات چانن شاهدات على تهجمها عليه
حسيتهن ورانا يمشن
وصلت للمديرة و گبل گمت ابچي و اشوفها حنچي گبل صاحت گالت خلي تجي هديل..
البنات صارن عش نحل يم الباب
فاتت هديل و هي ادحگلي بنظرات نارية
و اني من بين دموعي دحگتلها بشماته
- احچوا شصاير ؟ يعني انتن ما نخلص من مشاكلچن
- ست والله چنت گاعد اكل بالساحة و هي چتي و گامت تحچي و سألتني عن شخص و گلتلها اي اعرفو و هي تهجمت
- والله چذابة ست..مو هيچ السالفة
صاحت هديل..و المديرة نترت بيها و سكتت و هي تنصي رأسها
شبكت أيديها بعضهن و گالت بشبة عصبية
