𝖣𝗂𝗆𝗉𝗅𝖾'𝗌 @𝗝𝗮𝘆𝘄𝗼𝗻

𝐖𝐡𝐞𝐫𝐞 𝐚𝐫𝐞 𝐭𝐡𝐞 𝐀𝐝𝐝𝐢𝐜𝐭𝐢𝐨𝐧𝐬 𝐒𝐭𝐚𝐫𝐭?

➪ 𝐓𝐡𝐞𝐬𝐞 𝐃𝐢𝐦𝐩𝐥𝐞𝐬 𝐀𝐫𝐞 𝐌𝐨𝐫𝐞 𝐀𝐝𝐝𝐢𝐜𝐭𝐞𝐝 𝐓𝐡𝐚𝐧 𝐓𝐡𝐞 𝐀𝐮𝐫𝐨𝐫𝐚𝐬.

• •

- UNICODE -

" မင်္ဂလာပါ သခင်လေး။ ကျွန်တော်က ဒီစံအိမ်တော်ကြီးရဲ့အိမ်ထိန်း ဂျိမ်းစ်ဝါ့ကာ ဖြစ်ပါတယ်။ "

လေးဆယ်ကျော်လို့ ငါးဆယ်နားကပ်နေပြီဖြစ်ပေမဲ့ ကြည့်ကောင်းလှသော ရုပ်ရည်ကို သူ၏အိုမင်းခြင်းအနည်းငယ်က တားဆီးနိုင်သည့်ပုံမပေါ်။ ပြုံးလိုက်တိုင်း ညာဘက်၌ ထင်းရင်းစွာ ပေါ်ထွက်လာသော ပါးချိုင့်ရှည်က တည်ကြည်ခြင်း၏ပြယုဂ်တစ်ခုလို။

" အိုဂျေး "

သူတို့သိပြီးသား အမည်နာမ။ ဖော်ရွေခြင်း ကင်းမဲ့ကြောင်း သတင်းသဲ့သဲ့ကြားထားကြပေမဲ့ လက်တွေ့ဆုံလိုက်ရမှ ယုံသွားကြတော့သည်။ အမည်အား ယတိပြတ် ပြောကာ မည်သည့်နှုတ်ဆက်စကားမှ ဆိုမနေတော့ဘဲ စံအိမ်တော်ထဲသို့ ဝင်သွားတဲ့ ဆယ်ကျော်သက် သခင်လေးက အရှိန်အဝါတွေတော့ မသေးပေ။

ခံစားချက် မရှိသလို ဟန်ဆောင်နေတဲ့ မျက်ဝန်းတွေထဲ၌ ကြောက်စိတ်တွေနဲ့ ဝမ်းနည်းစိတ်တွေကို အရှင်းသား မြင်နေရသည်။ အို ... ဘယ်အရာတွေကများ တောက်ပနေတဲ့ မျက်ဝန်းတစ်စုံကို ဤသို့ဖြစ်အောင် လုပ်ထားတာပါလိမ့်။ ဘုရားသခင် ပြောပြတော်မူပါ။

~°~°~

" လူကာ ! "

" လာပါပြီ ! "

" သခင်လေးက သွားမခေါ်သေးဘူးလား ? ညစာစားချိန်ရောက်ပြီလေ။ "

လူကာက ဆီမလိမ်းထားတာကြောင့် ခြောက်သွေ့ပြီး စုတ်ဖွာနေတဲ့ သူ့ဆံပင်တွေကို တဗြင်းဗြင်းကုပ်လျက် မှုန်ကုပ်နေသည့် မျက်နှာအမူအရာဖြင့် ပြန်ဖြေလာသည်။

" လွန်ခဲ့တဲ့ ဆယ်မိနစ်လောက်ကတည်းက ဆက်တိုက်ခေါ်နေပေမဲ့ ဘာမှပြန်မပြောပါဘူး မစ္စတာဝါ့ကာ။ "

" ဟုတ်ပြီ၊ ငါသွားလိုက်မယ်။ "

လူကာကတော့ သူ့တာဝန်ကင်းသွားတာကြောင့် သက်ပြင်း ခပ်သဲ့သဲ့ချသည်။ နှစ်အနည်းငယ်ကျော်ကြာမှ သခင်ကြီးကိုယ်တိုင် ပစ်ထားခဲ့တဲ့ သည်စံအိမ်တော်သို့ ခြေချလာတဲ့ သခင်လေးဟာ မောက်မာနေတာလား။ စကားလည်း တစ်ခွန်းပြည့်အောင် မပြောသလို အခန်းထဲကလည်း မထွက်။ သခင်ကြီးရဲ့နောက်အိမ်ထောင်ကြောင့်လို့ သတင်းတွေ ထွက်လာပေမဲ့လည်း သူတို့ မသိသလို မေးလည်းမမေးရဲကြ။ အိမ်တော်ထိန်းကြီးက မဆိုင်တဲ့ ကိစ္စကို စပ်စုခြင်း ခွင့်မပြုထားဘူးလေ။