"أُخفي لك بعمق صدري شيء أعمق من الحُب"
كلمت لمياء عشان تمشي معانا لكن قالت زهجانه وما نفسها تطلع قدر ما حنستها رفضت فخليتا على راحتها اما امون قالت طالعه مع اكرم ونور عندها كورس بتاع زومبا ما بتقدر تفوتو.
طلعنا عصريات كدا سقنا علا ومشينا توتي ولقينا ادهم هناك واقترح علينا نقعد جمب خالتو بمشي ليها طوالي لكن دقاش اعترض فاخترت انا وحسمت النقاش ختينا الكراسي بعيد عن الناس وجات شافعه كدا عسل تشيل الطلبات غلبني ما ابوسها وفي العاده بشيل معاي حلاوه ولا حاجه عشان مرات بشتهيها وما بلقاها فاديتها ليها وفرحت بيها جدنن لدرجه انها باستني في خدي وقالت لينا عايزين تشربو شنو
علا:شيريا
أدهم:جبنه خالي جنزبيل وعسجد زي
دقاش:شاي لبن بغرنفل وعسجد بتشرب جبنه تقيله وجنزبيل تقيل مع ملعقتين سكر وتتحرك تلاته مرات
-لخمتو راس البت ح تتذكر دا كلو كيف ردت لي انا شاطرة وبحفظ سريع قلت ليها ياعسل انت ربنا يخليك لامك قالت لي امين جمعا ومشت
علا:بتحبي الشفع
-عشان هم بتحبو اساسا
+ظاهر انو دقاش بعرف عنك حاجات كتيرة
-طبيعي ما نحن عايشين في بيت واحد
+مرات بغلط وبناديني عسجد
-عاده اللسان بقول اكتر اسم بذكرو
+دايما بحكي لي عنك وانكم مشاغبين وعندكم مغامرات
-اسكتي سااي نحن شنو الما عملناو
أدهم:عملتو شنو مثلا
قبلت على دقاش وقلت ليو احكي انا ولا انت اشر علي قلت ليهم ابدا من وين ولا من وين؟
المهم من زمان شديد وقت يجي العيد بنطلع ونحن شايلين معانا شنطه
دقاش:شنطتك البمبيه الفيها فراشه ديك
-ومن كتر الدعك قلبت كلب(خخخخ)المهم اول ما يقدمو لينا الشياله نعمل فيها شفع مؤدبين ومحترميم وبس مرت جيرانه تمشي بي جاي
دقاش:نخمش بي يدينا الاتنين وما نخلي حلاوه ورانا ونملي الشنطه
-ولمن نجي راجعين بكون شايلين حلاوه اكتر من الجابوها للعيد لمن ناس امي يستغربو مننا
دقاش:وايام يكون عندها تسميع ولا املاء وهي البليده ما عايزة تمشي المدرسه بتمثل انها عيانه بعد ما نكون لعبنا بالمويه وقعدنا تحت المكيف بقول ليهم جاها التهاب ياحليلا مسكينه وتقعد في البيت لكن بتكون خدامتي طول الاسبوع
-انت كنت مستغلني والله
دقاش:اذا كنت هبله لازم استغل الحته دي
-ح انتقم خليك حذر
دقاش:نشوف
-وكمان متعودين كل يوم بليل بنطلع السطوح نتكلم ونتكلم ونتكلم في شنو ما عارفه لكن بنرغي كتير وبكون جايبين اكل وعصير ومساند وفرشه نعاين للنجوم ونتونس ولي هسي العاده دي مواظبين عليها
دقاش:ونستها كلها عبارة عن ود جيرانه في الحله عاجبها والمشكله هو اكبر منها بي الف سنه الود كبير وبقرا في الجامعه وهي كانت بتحبو وعايزة تعرسو لمن يشوفها في الشارع ويسلم عليها يومين ما بتنوم من الفرح والعجب لو قال ليها يالسمحه التقول خطبها عديل بتقعد ترقص
-يخسي عليك والله بالجد كنت بحلم اعرسو كان فارس احلامي لكن هو كسر قلبي
دقاش:لمن عرس بكت لمن جاتها نزله وانا من الضحك عايز اموت
-انت عواليق على فكرة مفترض تحزن لي حزني
دقاش:مالي انا الكنت عايز اعرسو
-سغييل
دقاش:عارف
-لكن الشغب الحقيقي بدا لمن دخلت تالته ثانوي يااخ كانت ايام مبالغه نطلع من البيت بي حجه انو ماشه درس العصر ونحن بنكون حايمين في الشوارع من ست فول لي ست تسالي وبعد المغرب ولا قريب العشاء حتى نجي بعد نشتري طعميه حاره وناكلها في الشارع
دقاش:كنت فجعانه يااخ جنك اكل
-العلمني منو ما انت يا جوغار
دقاش:لو الحيطه وقعت ح تقولي انا السبب
-عايز تنكر انو بي سببك اتعلمت حاجات كتيره
دقاش:انا مسؤول عن المفيده لكن الباقي اجتهادك الشخصي
-الموضوع ما انتهى هنا ح نتناقش خليك عارف
دقاش:جاهز بكل الحجج والبراهين اللازمه
-اها اكمل ليكم
هدينا لمن الامتحانات قربت ومن بعدها رجعنا لي روتينا
طلعت النتيجه والحمدلله مشرفه
دقاش:قبل ما تطلع بيوم ما خلتنا ننوم الليل للصباح نحن قاعدين في السطوح تبكي وتشكي ولمن اقول ليها ما كان تقري تقول لي بسببك ما قريت تقول انا الحميتها
-انت بتكذب لي لو ما انت احتمال كانت جبت 100%
دقاش:نومي بدري وان شاء الله بتجيبيها
-مالك قايلني بليده ولا بليده؟
دقاش:بليده(خخخ)
-عواليق ما ح ارد عليك
يلا عشان يكافئني طلعنا بي عربيه خالو لفينا كدا ما خلينا مكان ونحن راجعين وقفتو في الميدان عشان اسوق مع انو ما بعرف لكن اصريت وهو ما كسر بي خاطري
دقاش:شوباره يعملو ليك شنو وراسك زي طوبه البلك ما بتسمعي الكلام
-يلا من شلاقتي عملت شنو انت يا عسجد سقتي العربيه وخشيتي بيها في العمود طفجتيها للحظه فكرنا نهرب من البيت وهو اتبرى مني عديل
دقاش:الشغله دي ممكن تجيب ليها طرد من البيت اعمل بيك شنو انتي
-اخخ يخاين
اها تاني رجعنا وعملنا فيها مضروبين وفي زول عرض لينا ويالله حتى طلعنا منها حمدو لينا السلامه ومشت على خير من غير اضرار ونحن ميتين ضحك انو ما اكتشفونا والله يومها صلينا ركعتين شكر وحرمنا ما نعيدها.
