"كان مثلي يهرب من الحب حتى أصطدمنا ببعض
وتورطنا في الطريق"
حفله اشتغلت في البيت من الفرح ما كنت عارفه اعمل شنو شلت جردل المويه وبقيت اغني وازغرد وارقص وديل كلهم عملتهم كيف مع بعض والله ما عارفه
جنات:بسم الله الجن ولا النفسيات
-سمعتي امي وابوي ح يعرسو تاني
جنات:الف مبروك يتهنوا وعقبالك
-الله يهنيك ويسعدك
جريت شلت تلفوني وضربت لي ابوي عشان اتأكد قال لي انو الخبر صاح زغردت ليو في اضانو لمن صنت قلت ليو اها جاي متين عشان تعقد قال لي اصبري شويه قلت ليو لا والله خير البر عاجله انت بكرة تجي ونعقد قال لي ياحنين خلي امك تجهز على راحتها قلت ليو امي ما ناقصها شيء غيرك تعال وكل حاجه ح تكون تمام
اتكلمت معاو واقنعني العقد يكون بعد اسبوع على الاقل امي تجهز شويه لكن اشترطت عليهم يعملو جرتق امي اعترضت وانا بت متين لمن اسوي جرتق والناس ح تقول علي شنو.... ما خليتها الا لمن وافقت
خلال الاسبوع دا ما قدرت امشي الشغل كتير كانو البنات بخلصو دوام وبجوني في البيت عشان يساعدوني في التجهيزات
يوم الخميس مشيت مع امي الكوفير وقلت ليهم عايزة رسمه عروس لانو لو خليتها ح تعمل وردتين وتجي وخليتهن يميجو شعرها ويكو ليها ودا غير نضافه الوش اقسم بالله طلعت نار منقد تبارك الله
رجعنا البيت خالتو جنات قالت لي انت بدلتي اختي ولا شنو قلت ليها طلعت الجمال الكانت مخبياو مننا
البيت كان شبه مليان صحباتي وخالي جاء من البلد عشان يعقد ليها وفي اهلنا القراب برضو جو
اصريت الا اكوي لي ابوي جلابيه العقد مشيت مع دقاش من الصباح كويتها ليو وبخرتها وبعد لبس لفيت العمه وغنيت ليو الجلابيه البيضاء مكويه وياحبيبي بسحروك ليا الجلابيه كدا بس كدا بس ومع الطاقيه حاجه ما تخلص باسني في راسي وقال لي ربنا يخليك لينا قلت ليو ولا يحرمني منكم ويرزقني زي حبكم قال لي اميين عشان بتستاهلي اتصورت معاو وانا مبهدله بي العبايه لكن ومالو كفايه هو سمح.
وبعدها رجعنا البيت عشان مفترض اجهز للغدا مسافه ما صلوا كنت جهزت لبست لي فستان حلاوي على فوشي كدا ساده وطرحتو مُشكله وانا بلف فيها سمعت العقد بدا جريت برا نور قالت لي اصبري يالشفقانه حالتو ما حقك وضحكت لي قعدت جمب امي وهي بتسمع في العقد ودموعها جو نازلين حضنتها وقعدنا نبكي سمعنا صوت السلاح وتم العقد والله الفرحه الحسيت بيها يمكن في عقدي ما افرح زيها الناس بقو يباركو ليها وانا اشيل وازغرد طلعت الشارع واستلمت ابوي من الباب زغاريد وبكى.
بعد الغدا لبست امي التوب وعملت ليها ميكب يقول ياليل عشان رفضت تمشي كوفير وانا حلفت ما بتطلع اقل من عروس وانا غيرت بي فستان اصفر فيو شغل بالفضي من الرقبه لحدي الكتف والباقي ساده مع هيلز فضي الجرتق كان في الصالون ونسوان بس عشان كدا اخدت راحتي وما لبست طرحه جرتقتهم عمتي الكبيرة وعمو قرا ليهم يس حبوبه باركت ليهم وطلبت من امي العفو وهي عشان قلبها كبير وطيب ما رضت حبوبه تعتذر ليها وقالت ليها انت في مقام امي وربنا يخليك لينا والحمدلله شفت اللحظه دي قبل ما اموت لمياء وامون ما عرفو يمسكوني من البكا نور شالت لي السفنجه حتى سكت.
