- انا مش فاهمة اشمعنا هو بالذات؟!!
قالتها بنت خالتي وهي بتقعد قدامي ف ابتسمت ورديت
= حسيت انه اشارة من ربنا
- اشارة؟!! ازاي يعني؟
= انتي طبعاً عارفة اني اتأخرت في الجواز وإن عندنا البنت اول ما تتم ٢١ سنة بيتقدملها ناس وانا كنت قربت على ال ٣٠ ومفيش حد دق بابي خالص .. كان فاضل شوية وابويا يلف يدلل عليا وامي كانت مقتنعة اني معمولي عمل علشان البنات بتغير مني .. ماكنتش بهتم بكلامهم في الاول بس مرة ورا التانية كلامهم بقا يوجعني ونظرات الناس ليا وكل حد فيهم يرمي كلمة زي عقبال عوضك يا حبيبتي ولا عقبال ما نفرح بيكي ومعاها ضحكة سمجة .. وكله كوم واني لما اروح ابارك لوحدة اتخطبت او اتجوزت او حملت او خلفت احس في نظراتهم كأنهم خايفين اني احسدهم .. نظراتهم دي كانت بتقتلني .. بقيت ألجأ لربنا .. اصلي وادعي واقول يا رب لو انا وحشة حليني في عين الشخص اللي انت كاتبهولي ولو اللي موقف حالي ذنب عملته اغفرلي .. لقيت الراحة في القرب من ربنا .. كل مرة كنت بقرأ القران كنت بحس بكلام ربنا بيطبطب على قلبي
عيوني لمعت بشكل لطيف وابتسمت وانا بقول
= تعرفي، اول مرة سمعت صوته كان وانا في المسجد .. صوته دخل قلبي بدون استئذان .. حسيت براحة في صوته وعيني اتملت دموع .. لقيت لساني بيردد سبحان الله .. بقيت خايفة ل احسده من كتر حلاوة صوته .. وقتها كان نفسي اعرف هو مين او اشوفه بس خفت ربنا يغضب عليا بسبب كدا .. استغفرت ربنا وقومت روحت بس ماقدرتش امنع نفسي اني اروح تاني يوم المسجد في نفس الوقت .. وسمعته تاني .. بقت عادة عندي اني انزل اسمع صوته واروي شوقي ليه .. كل مرة كنت بسمعه بقلبي .. فجأة لقيت دعواتي نصها بيروح ليه .. كنت بدعيله ان ربنا يثبته ويكرمه ويرزقه .. كنت بدعيله ومش عارفة سبب دعوتي ليه .. تفتكري ممكن حد يحب حد عمره ما شافه وسمع صوته بس؟
- ماعرفش .. المهم وبعدين .. حصل ايه؟
= قررت اني مش هنزل تاني المسجد علشان ماتعلقش بيه اكتر من كدا .. كنت بحس بعذاب كل ما الساعة تيجي على ميعاده بس كنت دايماً بفتكر جملة قريتها .. لا تعص الله من اجل من احببت فإن قلب من احببت بيد من عصيت
- كملي .. ايه اللي حصل بعد كدا؟
= فات اسبوع .. ٧ ايام عدوا عليا كأنهم ٧ سنين .. وفي اليوم السابع وكان يوم جمعة لقيت بابا راجع بعد الصلاة فرحان وبيناديلي وبيقولي ان جالي عريس .. لو كان دا حصل قبل ما اسمع صوته كنت هكون فرحانة بس وقتها حسيت كأن قلبي بيتعصر .. شوفت الفرحة في عيون ابويا وامي وقررت ماكسرش فرحتهم .. دخلت اوضتي وفرشت مصليتي وقعدت اصلي ودموعي تنزل على خدي ومش عارفة اوقفها .. خلصت صلاة وفتحت المصحف وأول آيه عيني جت عليها "وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ")) .. ساعتها قلبي اطمن وقلت اكيد ربنا كاتبلي الخير ولازم ارضى بيه أيا كان هو ايه .. عدى الوقت ولبست خماري وجهزت وخرجت منغير ما احط نقطة واحدة مكياج في وشي ودا طبعاً ضايق ماما جدا بس قولت انا مش هغضب ربنا علشان اتجوز .. عايزني كدا أهلا وسهلا مش عايز يبقى خلاص .. دخلت الصالون وانا باصة في الارض ومجرد ما قعدت على الكرسي بابا قام وقف وقالي انه هيدخل البلكونة اللي في الصالون علشان نتكلم براحتنا بس برضو يقدر يشوفنا .. فضلت باصة في الارض وصوابعي بتمسك طرف الخمار كعادة بعملها لما بتوتر .. فجأة لقيت قلبي دق جامد لما سمعت صوته .. نفس الصوت .. رفعت وشي وانا مش مصدقة وبصيتله .. وشه مدور وملامحه هادية .. بشرته قمحي وشعره اسود ودقنه مهذبة بشكل يخطف القلب .. ثواني وسحب عينيه عني وبص في الارض وانا خدودي احمرت وعملت زيه .. لقيته بيسألني ليه بقالي اسبوع مش بروح المسجد .. ماقدرتش امنع نفسي من اني ابصله تاني بصدمة وسألته ازاي عرف اني بروح اصلا .. رد ساعتها وقالي انه كان بيسمع خطوتي وانا خارجة من مصلى الحريم وكان بيخرج بعدي وبيمشي ورايا بس من مسافة علشان بس يطمن اني روحت .. قلبي ساعتها انخطف .. كان عايز يطمن عليا انا؟!! ليه؟!! .. زي ما يكون قرأ السؤال اللي كان بيدور في دماغي وقالي انه هيجاوبني عليه بعد كتب الكتاب .. ساعتها قومت ودخلت اوضتي وانا مش قادرة امنع ابتسامتي .. بلغت بابا موافقتي وعملنا خطوبة صغيرة وكان طول فترة الخطوبة ماشي على ضوابطها .. لا فكر يلمس ايدي ولا يقولي كلمة كدا ولا كدا وبصراحة دا علاه في نظري اوي .. كل اسبوع كان بيزورنا هنا في البيت وفي حضور بابا وكان بيقعد معايا ويسألني اسبوعي مر ازاي .. كان لطيف وهادي وخجول شوية وكل مرة قبل ما يمشي كنت اطلب منه يقرأ سورة من القرآن بصوته واسجلها علشان اسمعها قبل ما انام .. فضلنا على الحال دا شهرين لحد اهو النهاردة فرحنا وانتي مخلياني اقعد احكيلك الذكريات الجميلة دي ونسيتيني انه جاي ولازم استعد
*دق خفيف على الباب وبعده بابا بيدخل*
-- حبيبة ابوكي .. عبد الله والمأذون وصلوا والمأذون بيسألك موافقة
اتكسفت وحطيت وشي في الارض ف بابا سألني تاني بنبرة حنينة
-- موافقة يا عائشة؟
= موافقة يا بابا
-- مبروك يا قلب ابوكي
حضنته جامد وانا بحاول ماعيطش بس طبعاً ماقدرتش وزاد عياطي لما ماما دخلتلي علشان امضي وعينيها هي كمان كانت مليانة دموع .. بعد فترة من العياط الكتير اوي مضيت .. البيت اتملى زغاريط وبابا وماما دخلوا يباركلولي وشوية وبابا خرج وبعده ماما كمان وقعدت لوحدي في الاوضة .. شوية ولقيت باب اوضتي بيخبط تاني بس المرة هو اللي دخل .. ايه دا ازاي يدخل اوض الناس كدا .. مفيش اهل ربي
$ مبارك يا عروسة
= احم، الله يبارك فيك .. بس .. انت ازاي تدخل اوضتي كدا؟ مش عيب يا استاذ انت!!
$ عيب اني ادخل اوضة مراتي؟!
ايه دا!! هو قال مراتي؟! يعني انا مراته بجد .. طب قولها تاني كدا علشان اتأكد
= ولو برضو ماينفعش
$ اصلي كنت عايزك في موضوع
= موضوع ايه؟
$ كنت بسمع عن حضن كتب الكتاب .. وبصراحة هو يلزمني
ايه دا فيه ايه؟!!!! هو فين الخجول اللي كان مش بيبصلي ؟؟!!!! ازاي تخضوا الناس كدا
= لا طبعاً انت اتجننت!!!
$ لا بقولك ايه انا صابر بقالي ٥ سنين مليش فيه انا قتيل الحضن دا
كنت هموت من الكسوف بس فجأة انتبهت لجملته
= ٥ سنين ايه؟
$ ايوة ماتستغربيش .. انتي كنتي دعوتي لمدة ٥ سنين .. ٥ سنين ولساني بيردد نفس الدعوة في كل صلاة .. ان ربنا يحفظك ليا ويجعلني نصيبك .. ٥ سنين وانا بدعي ربنا انك ماتتجوزيش غيري .. ٥ سنين وانا بشتغل بكل قوتي علشان اجهز نفسي وأجي اتقدملك
يعني هو اللي كان موقف حالي!! اه يا ابن اللاظينة .. حاولت اتكلم بتقل شوية
= ودا ليه إن شاء الله؟
$ علشان بحبك
حد يخض حد كدا!! هيفرح هو لما اقع من طولي بسببه .. قرب مني خطوة ومسك ايدي بحنية وهمس
$ بحبك يا عائش
= عائش؟!
$ ايوا .. الرسول عليه الصلاة والسلام كان بينادي السيدة عائشة رضي الله عنها ب عائش .. كان بيدلعها بيه يعني
اتكسفت وماعرفتش ارد لقيته بيقرب مني تاني ف اتكلمت بارتباك
= انت.. انت بتقرب ليه؟!
$ مش قولتلك انا قتيل الحضن
شدني لحضنه وانا خدودي احمرت زي البنات العاديين يعني .. ازاي حضنه جميل بالشكل دا .. ريحت راسي على صدره وايدي لفت بخجل حوالين وسطه وحضنته جامد .. طول عمري بحلم بالعوض .. طول عمري كان نفسي اتجوز شخص ياخد بإيدي للجنة .. معاه هو حسيت بالمودة والرحمة اللي ربنا وصانا تكون بينا .. حسيت معاه اني مطمنة .. مين قال ان لو ماتجوزتيش في سن معين القطر هيفوتك .. مع احترامي ليهم بس يغور القطر لو مش رايحة حتة انا عايزاها .. ربنا كاتب لكل حاجة ميعاد وانا راضية بالميعاد اللي ربنا كتبهولي .. وراضية بأجمل عوض ربنا رزقني بيه
""جاءنا من ارتضينا دينهٌ وخلقهْ ف رضينا ♥️""
بقلم #حورية_الابداع 💜✨
