سارق الحب

part 1

( الفصل الاول سارق الحب بقلمى بسمه شفيق)

فى قصر شامخ يظهر الثراء حول هالته البهيه التى تخطف الأنظار تقف تلك الشابه فى بدايه الربيع الثانى من العمر و يتأكلها القلق الشديد و هى تسير ذهابا و إيابا أمام باب قصر عائلتها الفخم

دخل اخيرا من انتظرته ليرحم توترها و معه خادم عائلتها المخلص .. هرولت نحوهم قائله بلهفه : ها عملت ايه يا متر

المحامى بأنفاس متقطعه : اصبرى يا بنتى لما أخد نفسى

رغد بلهفه : طيب ... ماشى بس قولى عملت ايه

المحامى بفرح : لقيته اخيرا ....

رغد بفرحه شديده : بجد يا متر .... لقيت اخويا

منصور بسعاده : ايوا ... بعد ما لفينا عليه 18 سنه بحالهم اخيرا لقيناه و مش هتصدقى فين

رغد بفرحه : فين يا عم منصور ... قولى عاوزه اروح و اشوفه

المحامى : هقولك أنا ... أنا و عم منصور روحنا المستشفى اللى مدام مريم الله يرحمها دخلتها بعد الحادثه و هناك سألنا عن ملفات الحوادث من 18 سنه

منصور : طبعا طلع عنينا لحد ما رضيوا بس الفلوس بتمشى الحال

رغد : مش مهم ادفع اللى ورايا و اللى قدامى بس الاقى اخويا

المحامى بسعاده  : لقيناه يا رغد خلاص لقيناه

منصور : بعد ما شوفنا الملفات عرفنا أن بيه دخل المستشفى مع مريم هانم الله يرحمها لكن بعد ما المدام ماتت فيه ممرضه من إياهم  اتمسكت و عرفوا أنها كانت بتخطف الاطفال و تبعهم 

رغد بتساؤل : ازاى

المحامى : فيه راجل اتمسك بتهمه خطف الاطفال و تسرحهم فى الإشارات و غيره عشان يتسولوا و لما اتمسك اعترف عليها انها هى اللى كانت بتساعده فى خطف الاطفال دول و فيه ناس تانيه مشتركين دا كانت قضيه وقتها بس محدش رضى يعلن عنها عشان سمعه المستشفى متنزلش الأرض

منصور : فاحنا قولنا نروح القسم و نشوف القضيه جايز تكون اخدته و باعته مع العيال للراجل

رغد ؛ و بعدين وصلتوا لايه

المحامى بابتسامه سعيده  : وصلنا لأن الراجل اعترف وقتها أنها ودت طفل ليه فى نفس الوقت اللى مدام مريم دخلت فيه المستشفى ... و فى نفس الوقت احنا روحنا ملقناش حازم بيه هناك معاها بعد الحادثه معنى كده أنه بنسبه كبيره هو

رغد برعب : يعنى ايه ... يعنى أنا اخويا فين  بالظبط دلوقتى ... أنا ايه اللى يأكدلى ان هو كان لسه عند الراجل دا ولا لا

المحامى  بسرعه : متقلقيش يا بنتى .... احنا روحنا القسم عشان نشوف القضيه دى اتعمل فيها ايه و عرفنا أنه كان بياخد الاطفال و يسرحهم فى الإشارات و اماكن تانيه عشان يجيبوا ليه فلوس يعنى مكانش بيعمل فيهم حاجه ولا بيبعهم ولا بيموتهم ... و بعدين هو اتمسك بعد الحادثه بحاجه بسيطه يعنى مستحيل يكون قدر يوديه فى اى مكان