أمنية مستحيلة

الجزء الواحد والعشرين

وقع الكلام عالريم مثل السهم ..
الريم وبدون سابق انذار قالت.: شووووو تقصين علي صح؟ .. امي دخيلج قولي انه كلامج صح دخييلج والله قلبي ماعاد يتحمل والله ماعاد يتحمل وانهارت مغشي عليها .
امها بسرعه راحت يابت ماي رشته ع ويها ماقامت .. يابت عطر شممتها اياه وبدت عينها تفتح..
الام حست بإيد الريم تمسكها من ايدها .. الريم ودموعها تنزل : اميه قولي انج تقولين الصدق.
ام خليفة: بسم الله عليج ياحبيبتي والله اني اقول الصدق ، لو اعرف انه جي بيستويلج جان قتلج بطريقة ثانيه.
الريم تمت تصيح وهي حاضنه امها ع الأرض والام تسمي عليها.وتقرا عليها المعوذات.
عقب ساعه فالمستشفى .. حمدان كان فالحجره وخوانه من الصبح عنده يعوضون الوقت اللي ماكان فيه معاهم .
شوي اندق الباب.
الهنوف راحت تفتح الباب جان يطلع في ويهه خليفة ..
ذياب من شافه تضايق وحاس ثمه يتحرطم بصوت خفيف ونهيان تم ساكت.
حمدان: هلاوالله بولد العم ، شهالغيبه. وهو يضحك.
خليفه: الحمدالله عالسلامه وماتشوف شر ، الحين انا اللي غايب ولا انت اللي سويتها فينا تقول مقلب.
الريم كانت ورا خليفه .. ومن سمعت صوته ..
حست انه هي في حلم .. شوي تسمع الهنوف تقول وسط مسامع حمدان والكل.
الهنوف: والحلوة لين متى بتم منخشه ورا اخوها ومابتي تشوف خطيبها.؟
حمدان دق قلبه 3 سنين وسط كل هالاحداث عاشها وهو يتخايلها جدامه ويتخايل كيف بيكون حالهم لو ماصار اللي صار .وعيونه كانت تترقب الباب عشان يشوف عيونها،ملامحها وويها اللي انحفرن في مخه .
الريم من سمعت كلام الهنوف تاكدت انه كل شي واقع وانه مب حلم .. الهنوف مدت ايدها وسحبتها..
تلاقت الأعين واختفى كل شي صار نظرها فيه بس وهي تشوف ملامح ويه اللي تغيرت شوي الكدمات اللي عويه عيونه الذبلانه. ودمعت عيونها.
حمدان .. يتأملها وكأنه يشوفها أول مره ووده يحضنها .. لكن الدين يرفض .. وقال: الريم.
الريم من سمعت اسمها بصوته .. قالت: حمدان ..وهي تشوفه وعيونها تعبر  عن الشوق اللي فيها له. وسط هالأحداث ولانه حمدان والريم ماكانو منتبهين نهيان وذياب والهنوف وخليفة تسحبو عنهم وطلعو برع الحجره بس خلو الباب مفتوح .
حمدان : تعالي قربي..
الريم ابتسمت بحياء : ان شاءالله وقربت من سريره ، صار بينه وبينها خطوة..
حمدان مد ايده لـ ايدها .
حمدان: اشتقت لج.
الريم وهي تحس بدفا ايده اللي انحرمت منها ومن استشعارها.
الريم: اشتقتلك.

الريم : ليش،ودموع عينها تشكي حالها.
حمدان:آسف والله آسف،لاتصيحين ماحب اشوف دموعج .
الريم :ماقدر.
حمدان:ودي ألف عليج ودي والله.
وفي نفس الوقت الهنوف برع يالسه عدال اخوها نهيان وتتبادل النظرات مع خليفة بسرية.
نهيان دزها بخفيف.
الهنوف بشكل لا إرادي قامت تضحك بصوت عالي،هههههههههههههههههه اخخ بطني.
نهيان:سكتي فشلتينا.
خليفة يوم سمعها تضحك جي لف عليها طالعها بنظرة انه حسابي وياج بعدين.
الهنوف يوم شافته جي حبت تقهره اكثر وقامت وراحت لذياب اخوها.
الهنوف:ذياب ذياب وهي متعلقه عجتفه وتهمس عند اذنه .
خليفه وهو خاطره يعرف شو قاعده تقوله ، ويحس بالغيرة وهو يشوفها لاصقه في اخوها جي.
وبلا احساس قال: خلاص بصوت شوي عالي . لفت عليه الهنوف وهي ماسكه ضحكتها ونهيان وذياب شافوه مستغربين انه شو السالفه.
خليفة خاطره يضرب الهنوف الحين عالموقف اللي حطته فيه وبترقيعه قال: يعني خلاص عطيناهم ويه وايد قومو دخلنا عندهم.
هني الهنوف انفجرت ضحك ماقدرت تمسك نفسها اكثر . ماتحس الا ذياب يضربها عراسها.
الهنوف: اخخ راسي حرام عليك.
ذياب: لااه؟ وانتي قاعده تضحكين بصوت عالي وبدون سبب ضحكينا وياج؟
خليفه في خاطره يقول"ليتك زدتها ياذياب"
الهنوف: لاحول الواحد مايروم يضحك ولفت عنه ودخلت عند حمدان والريم.
الهنوف: عصافير الكناري خلاص ماشبعتو؟
حمدان: انتي لازم نسميج "مخربة الاجواء الرومنسية"يالله تحب تخرب.
الهنوف:جب جب كيفي تراها اختي اللي مايابتها امي قبل لاتكون خطيبتك انزين.

نهيان وخليفة دخلو عقب الهنوف ومع تبادل الاحاديث .
حس حمدان انه فيه شي صاير مع خليفة ونهيان بس مايعرف شو هو.
دخل ذياب عقب 5دقايق
ذياب:حمدان الافراج وصل اخيرا تقدر ترد البيت.
حمدان:يالله صارلي يوم اتريا الافراج المستشفى لوعة جبد والله وخاصه يوم اتم يالس جي.
خليفة والريم رجعو البيت .
الهنوف شلت اغراض اخوها وحطتهن فالشنطة وطلعت ورا حمدان اللي كان يوقع اوراق الخروج ،ابوهم وامهم كانو فالبيت من الصبح .
حمدان دخل البيت: يالله اشتقت لريحة الدخون والعوود اللي تلفحني من ادش البيت، وهو يطالعهم واشتقت لأهلها وناسها.
عقب ساعه راح حمدان حجرة نهيان وذياب ويلس بينهم .
شوي تنحنح وقال: شو بينكم وبين خليفه؟في شي انا ماعرفه؟
نهيان:ماعرف شقولك ،بس السالفه تخص الهنوف هب نحن .
حمدان: افا وشو مستوي فالهنوف هذي اشوفها تضحك وكل شي عادي ؟.
ذياب:ماشفتها قبل لانسافر ايطاليا.الحمدالله انها ردت طبيعيه.
حمدان:انزين بلامقدمات فكوني وقولو عاد .
وقال نهيان لحمدان كل شي صار .
حمدان:ماتوقعت ابدا انه خليفه ممكن جي يسوي وفي اختي بعد؟وانتو ما استفسرتوا عن سالفة الحريجة منو وراها؟مستحيل تكون جي من الله لازم نطلع الفاعل.
وبعد مرور 3ايام .
الجو كان متكهرب في بيت عمهم بو احمد .
يتريون اصدار الحكم عشان احمد .
وطلع بو احمد متضايق وفاصخ الغتره والعقال حاطنه عجتفه وهو مكسور ماكان يتوقع من ولده جي كان متخيل شي ثاني متخيلنه في اعلى المنصاب ورافع راسه فوق فيه بحكم انه ولده الوحيد كان يتريا الناس اتيي تشكره فيه مب تذمه وصارت سيرته عكل لسان من اللي يسوا واللي مايسوا ونزل راسه فالقاع هو وعيال عمه اللي وويوهم متحسره عولد عمهم . اللي حكمو عليه بالسجن 4 سنوات وغرامة 10آلاف.
الكل رجع البيت ..
وبعد شهر ..
الهنوف كانت فالحجرة ترمس خليفه.
ماتحس الا امها تدق الباب.
الام: الهنوف تعالي تحت ضروري ابوج يبا يرمسج الروحج في سالفه.
>>>>>>>>>>>>>>>>>
رايكم فالبارت وتوقعاتكم للاحداث الياية🏃🏻‍♀️
فديت كلامكم والله شكرا لكل اللي كتب تعليق حلو
للاسف الشديد باقي جزئين وبتخلص الرواية🥲
كيف كان الويكند وياكم؟
منو مثلي بعده ماتعود على انه اليمعه يبدا الويكند؟🤣😭😭
بينا فالبارت الياي🤍
ادعولي انه الله يوفقني ويرزقني
باللي اتمناه محتاجة دعوة غريب🥺🚶🏻‍♀️