حكاوى " سهرة لطيفة " ✨

« كاتب أحلامها »

( كانت موجودة عند الكورنيش الساعة كانت ٣ الفجر مفيش حد فى المكان غيرها الدنيا هادئة وفاضية هى سرحانة ومعها ورقة وقلم وبتكتب ما البطلة كاتبة .. بطلتنا كاتبة ! )

- خبط على كتفها برقة -
_ حضرتك مين ، وازاى تدى لنفسك حق تلمسنى ؟
= أنا آسف مش قصدى أخوفك ، ممكن أتكلم معاكى شوية يا لينا .
_ حضرتك عارفنى ؟؟؟
= ولو مش عارفك إنتى هعرف مين طيب !
_ إزاى عارفنى أنا معرفكش .
_ دليلك هو طريقة جلوسك ، عنوانك هو ورقتك وقلمك ، أى حد مثقف وواعى هيقدر يعرفك منغير ما يسألك عن اسمك لأنك مش حكاية مبهمة إنتى قصة جميلة .
= بس أنا كاتبة مبتدئة تعرفنى إزاى ؟
_ إنتى عمرك ما كنتى مبتدئة إنتى مش مشهورة كفاية ؛ لكن كاتبة ذات خبرة وخبرة واسعة كمان ، كونى واثقة أن اسم لينا الجمال دة هيتصدر أعمق الكتب ، و هيكون موضوع على أغلفة روايات كتير .
= طب إنت مين طيب ؟
_ مش مهم اسمى مش مهم أنا مين أنا موجود هنا عشان أسألك سؤالين وهمشى مش هزعجك .
= هعتبرك الأستاذة منى الشاذلي ومهتم أوى تعرف طريق كفاحى اتفضل اطرح أسئلتك .
_ السؤال الأول ... مين قدوتك فى مجال التأليف والكتابة .
= شخصيات كتيرة عمرو عبد الحميد ، عمرو محمود ياسين وعلى رأسهم اكيد نجيب محفوظ بس دونا عن كل دول فى كاتب واحد يغنينى عن أى قدوة تانية .
_ مين هو ؟
= كدة ٣ أسئلة مش سؤالين .
_ لأ بجد ممكن أعرف اسمه .
= زيد .. زيد الشافعى ، شخص قلمه بيرسم حياتى مش بس بيكتب قصصه ورواياته ، شخص مختلف مؤثر ، شخص من عالم موازى فكر عميق فكر مسالم فكر نقى فكر ناضج ، لو قلبى دولة هو العاصمة ، لو ليا حلم لقاه كافى مش مجرد كاتب مشهور لأ دة حلم مبنى جوايا .
_ يعنى نقدر نقول فارس أحلامك ؟
= أنا مش بتكلم عن شخص عجبتنى عضلاته المفتولة ولا عجبنى أناقته نضارته وبدلته ، مش بتكلم عن إعجاب ، أنا بحب سطوره إبداعه بحب فكره شخصيته نضجه ، بحبه هو .
_ طب وعارفة شكله ؟
= هى قصة غامضة وغريبة بس هو مجهول ، مش شخص مجهول الهوية ، لأ شكله مجهول أو مجهول بالنسبة لى أنا .
_ يعنى بتحبى واحد للدرجة دى ومتعرفيش شكله !
= صدقنى جوايا حاجات كتير تشفعله فى قلبى ، قادرة أتغاضى عن شكله تماماً ، شكله من وجهة نظري مجرد كافر لفكر وعمق ونقاء ، وبعدين أنت مسألتنيش معرفش شكله ازاى .
_ قولت لو مهم بالنسبة لك تحكى تفصيلة زى دى هتحكيها منغير ما أسألك .
= لا اطلع من الشويتين دول ، أنت مش عايز تسأل عشان ميتحسبش عليك سؤال بس مش كل العمق دة .
_ هو أنا مقفوش أوى كدة !
= بص أنا معرفش شكله لأنه الكاتب الوحيد إللى مش بيحط صورة ليه فى كتبه وفى نفس الوقت على مواقع التواصل الاجتماعي مفيش أى صور ليه ، محترمة طريقته عشان يفصل بين حياته الشخصية والعملية ، أو جايز مش بيحب الشهرة مكتفى بتأثير قلمه ، دى تفاصيل محدش يعرفها غيره ، وبعدين أنا سرحت ثانية واحدة أنا مش المفروض أحكيلك كل دة ، إيه سؤالك التانى عشان أمشى ؟
_ بصى أنا كنت بلعب مع صحابى ولما جيه الدور عليا كان فى طلب واجب التنفيذ لازم اساعد حد أنه يقضى يوم كامل سعيد والشخص دة انتى ، موافقة تكونى معايا ؟
= الفكرة لطيفة بس اشمعنا أنا اللى قررت تسعدنى ليوم كامل ؟
_ اشمعنا انتى دة موضوع مبهم شوية، لو وافقتى تكونى معايا نهاية اليوم دة هقولك اختارتك انتى بالذات ازاى وليه ، لو موافقة تكونى معايا هتتصلى الساعة ستة الصبح بالرقم دة ... دة رقمى لو اتأخرتى دقيقة واحدة فى الاتصال هعرف انك غيرتى رأيك .
= طب استنى انت ماشى ؟
_ إيه هوحشك !
= توحشنى ايه يا عم بس انا اعرفك امشى أنا غلطانة .
( رغم أنه كلمها لمدة قليلة بس كان فى حالة انجذاب جواها تجاهه متعرفش مصدرها ايه يمكن مصدرها وسامته شعره الناعم عينيه الخضرة ! ولا مصدرها انبهارها بالطريقة اللى كلمها بيها ، هى مش عارفة ، واحنا مش عارفين هنستنى نشوف باقى القصة سوا )
[ لما وصلت بيتها الساعة كانت ٤ الفجر مقدرتش تنام طول الليل بتفكر تقبل ولا ترفض ، حالتها تشبه حالة طالب فى امتحان MCQ محتار فى إجابة سؤال مش فاهمه أصلا ، مش عارفة تمشى مع قلبها واحساسها وتقبل ، ولا تسمع كلام عقلها اللى دائما صح وترفض اصل هتقضى يوم مع واحد مش عارفاه لمجرد أنها عايزة تجرب حاجة جديدة ! ]
- ومع دقات الساعة الخامسة صباحاً -
" بعد مرور ساعة يعنى مش قادرة ابقى عميقة اكتر من كدة "
= أنا قررت أوافق بس لازم أنام حتى ولو هنام ساعة واحدة بس .
( Alarm ⏰ الساعة ٦ الصبح بالظبط واضطرت توافق على الصحيان بدرى عدوها اللدود عشان تنبسط يوم واحد بس ! )
_ أدينى برن عليك اهو والساعة ستة بالثانية أقابلك فين !
= أنا تحت بيتك البسى وانزلى مستنيكى .
( قابلها بابتسامة لطيفة وجميلة )
_ صباح الخير يا لينا .
= صباح النور يا .... مش عارفة اسمك .
_ انتى عارفة أن اسمك دة أرق حاجة سمعتها اخر خمس سنين مثلا مفيش حاجة هادئة وجميلة زى اسمك غير اسلوبك طبعاً 👀
= مش عارفة انت بتتريق ولا انت رومانسى ولا ايه بس مش موضوعنا ، روح هاتلى قهوة لأنى مش نايمة غير ساعة ومفتحة عينى بالعافية .
_ عامل حسابى اتفضلى قهوتك .
= دى مظبوطة انت عرفت منين انى بشربها مظبوطة ؟
_ يعنى أنا أعرف اسمك واعرف عنوان بيتك ، استغربتى لما لقيتينى عارف بتشربى قهوتك ازاى ، هرد على كل الأسئلة اللى بتدور جوا عقلك بس اخر اليوم زى ما وعدتك ، يلا نبدا يومنا ؛ عشان الوقت .
= أنت هتعمل اللى هطلبه منك طبعاً .
_ لأ أنا هعمل اللى يسعدك .
= ما اللى هطلبه هو اللى هيسعدنى .
_ لأ ، متهيألك بنبقى فاكرين أننا اكتر حد عارف سعادتنا ، وأتاريها سر مجهول ، احنا بنجرب عشان نوصل للسعادة هى مش عنوان معروف بيتراح بالمواصلة كذا ، دى رحلة بنخوضها منغير ما نعرف ميعادها ولا طريقها ولا عندنا اى معلومة عنها .
= أنت قريت كتاب " سقم الفراق " لزيد الشافعى ؟
_ لأ بتسألي ليه ؟
= أصل طريقتك شبهه اوى وكلامك نفس كلامه تقريباً .
_ دى حاجة كويسة ، انك مع حد يشبه فارس أحلامك .
= طب يلا مش هنبدأ رحلتنا المجهولة .
_ أول محطة بس من رحلتنا ليكى حق تتحكمى فيها قوليلى حبه نروح فين ؟
= عايزة أشوف تيتا .
_ وانا معنديش مشكلة العنوان فين ؟
= مقابر عائلة الجمال .
_ إيه !
= تيتا اتوفت الاسبوع اللى فات وانا كنت مسافرة مقدرتش اشوفها كنت ناوية اشوفها لما ارجع بس ملحقتهاش ، ممكن تودينى عندها وحشتنى اوى .
( الدموع ابتدت تنهمر على وجنتيها )
[ مقدرش يستحمل يشوفها بتعيط حضنها]
_ هعملك اللى انتى عايزاه ادينى العنوان وهنروح سوا .
( بعد ما انتهوا من رحلتهم الأولى )
_ أحسن دلوقتى .
= بحس إن شخصيتى بعد وفاة تيتا أشبه بطفل رغب فى الحلوى ، قتلته موادها الحافظة .
_ بصيلى فى عينى ، مش عايز أشوفك زعلانة، هاخدك فى رحلة تانية مختلفة من نوعها وهتعجبك 😉 .
[ وصلوا قدام مكتبة بيع أدوات مدرسية ]
= ايه دة أنا مقولتلكش ، مش أنا كبرت ومبقتش بروح مدرسة .
_ ما باين .
= طب مدام هو باين جايبنى هنا ليه بقى .
_ لما اشرحلك هتفهمى ، بما إنك بتحبى مسلسل " حب للإيجار " ، وبما أن بشرتك بيضة وشعرك كيرلى شبه بطلة المسلسل ، تعالى نجرب حاجة البطلة كانت بتعملها جايز تكون مغامرة جديدة.
= ثانية واحدة أنت عرفت منين انى بحب المسلسل ؟
_ قولتلك هتعرفى كل حاجة نهاية اليوم ، دلوقتى هتدخلى المكتبة تختارى ألوان، واسكيتش رسم وتجيبيهم نصمم أحذية زى عمر وديفنى مع بعض .
= بس انا مش ديفنى ، وانت مش عمر .
_ متفكريش كتير واسمعى كلامى .
( بعد ما اشترت الألوان )
= طب دلوقتى أنا مش بعرف أرسم ، أعمل إيه ؟
_ هعلمك .
= الله انت رسام !
_ لا بس هتعلم ، بصى هنتعلم سوا .
( فى مشهد مفحم بالرومانسية بيمسك ايديها ورسموا سوا )

       ( صورة لإحدى الأحذية التى رسمتها لينا )

_ إنتى مش بتعرفى ترسمى دة انتى فنانة .
= طب دلوقتى هنعمل ايه يا عمر ابليكتشى ( اسم بطل مسلسل حب للإيجار ) .
_ هو باقى ٣ ساعات ويومنا يخلص أنا لازم امشى الساعة ١٠ .
= ليه هو انت سيندريلا ؟
_ لأ عشان ميعاد دوا والدتى .
= أنا آسفة مكانش قصدى اهزر فى حاجة جد ، طيب هنعمل ايه فى الوقت الباقى ؟
_ هنقرا حاجة انتى كنتى كاتباها وهقيمها .
= سورى يعنى بأى حق وبأى خبرة تقيمها ، هو انت كاتب .
_ لا مش بالظبط المهم هنقرا ايه .
= تحب تقرأ قصة قصيرة ؟
_ موافق .

( بعد مرور ٣ ساعات الساعة كانت ١٠ بالظبط )
= إيه رأيك ؟
( وفجأة بتبص جنبها ملقتهوش ...........
بعد مرور سنة )
              --------------------------------------
لينا : بشكر كل حد ساهم فى نشر كتابى الأول بشكر كل حد كان معاون عشان اقدر اوصل للى وصلتله بشكركم كلكم على مجيىكم .
( وبنفس الطريقة إيد خبطت على كتفها )
_ انت ... أنت مشيت ليه ... أنت جيت ليه... أنت ليه عملت كدة ؟ ليه علقتنى بيك واختفيت ، طب ليه مجاوبتش على اسئلتي ليه كل دة .
= أنا مشيت عشان مكانش ينفع تاخدى إجابات على اسىلتك فى الوقت دة ، مكانش وقت مناسب ، لكن دلوقتى هحكيلك القصة كاملة ، بس قبل ما اقول اى حاجة عايز اعترفلك بتلت حاجات اول حاجة أن القصة اللى قريتها من سنة فى اخر تلت ساعات قضيتها معاكى كانت تجنن وكانت دليل انك هتكونى كاتبة كبيرة ، تانى اعتراف أن كتابك اللى بنحتفل بنشره انهاردة انا صاحب أول نسخة هتتباع ، تالت حاجة ودى الأهم انى بحبك .
= ا..ا .. ايه ؟؟؟؟؟
_ بقول انى بحبك يا لينا ، وعلى فكرة مش انا بس اللى بحبك دة فريدة صاحبتك كمان بتحبك جدا لان هى كانت السبب فى كل دة .
= لا ثانية انا مش فاهمة ازاى ايه علاقة فريدة اصلا !
_ ساعت وفاة جددتك انتى كنتى منهارة وهى كانت بتحاول تفرحك بأى طريقة اتواصلت معايا ، أنا أعرف عنك كل التفاصيل دى من فريدة .
= طب فريدة هتكلم واحد أنا معرفهوش ليه ، صفته فى حياتى ايه عشان يكون مصدر سعادة ليا .
_ صفته فى حياتك أنه
زيد الشافعى !..........

★ حكاوي " سهرة لطيفة " 💙
# مايرن عبد التواب 💎
                                                     10/2/2022 ✅