غزل _ فزيت الصبح باوعت عل ساعه بثمانيه هاي شنو شكد
نايمه شعجب محد كعدني كمت اريد اطلع حسيت بدوخه
ولعبان نفس كلش قوي قاومت وطلعت امشي وصلت للباب اريد افتحهه
الدنيا ضلمت بعيني...
كعدت بالكاع شويه وصحيت ورجعت نمت على جربايتي ما اكدر انزل ....
صابرين _ كعديت بالسته الفجر عجنت نجانه هاكبرهه وخبزتهه وحيدي للسبعه والحيايه نسوان اخوتي منطمرات
نطرتهن لثمانيه وما كعدن بعد ما تحملت جا انه الاخدمهن يو هنه أنه عندي خمس اخوان الله يحفظهم يسدون عين الشمس كل واحد منهم مزوج ثلاثه بس اخوي الجبير اسد ما قبل يزوج يكول اكره النساوين اله ما بيوم ازلمه من بغداد جتل اخوي الوسطاني واخذنه منهم فصليه لاخويه اسد
وهل فصليه شلعت كلبي من فهاوتهه ما اسميهه غير المايعه
عندي اربع خوات كلهن متزوجات كل وحده منهن محافظه شكل بس انه بقيت انطر نصيبي ليما يجي
افتريت اعليهن اكعدهن يعاونين البيت جبير وما اكدر وحيدي
صعديت لغرفه الفصليه ادك الباب ما تفتحه انغثيت ودفرتهه بكل قوتي وشوفهه نايمه بعدهه ...
صابرين _ خايبه نايمه نامت علج طابوكه أن شاء الله وانا من الفجريات جاكده اعجن وخبز ككووومي هسه تاخذين العجد وتترسين مي من الشط لا اطلع قهري بيج
غزل _ صابرين تعبانه ونفسي تلعب ما اكدر اكوم
صابرين _ مو عليه تمشين هل حجي كومي الزلم راح تجي تسبح تريد اميه بالحمام
غزل _ اي كايمه أنزلي قبلي وهسه اني انزل وراج.....
نزلت الدرج كوه امشي تريكت وغسلت شويه صحيت بس لعبان نفس عندي كلش قوي
اخذت السطله وطلعت للشط اترس مي ترست سطلتين وحسيت مغص بطني بس اذا كعدت شيخلصني من حجيهم
بقيت اترس بس الالم يزيد لأن السطله ثكيله كوه شايلتهه
بس تعبت حيل كعدت يم الشط ارتاح شويه غسلت وجهي
الم بطني زاد حيل كعدت ابجي من الالم ماكو احد بس وحدي كاعده وحيل مابيه ارجع للبيت
الالم يزيد اكثر كمت غسلت ورجعت للبيت كوه امشي
نص الطريق وحسيت دم ينزل عليه ودوخه حيل قويه
كعدت بالكاع ما كدرت امشي بعد شفت مره وصحتهه
كتلهه اني مرة الشيخ اسد
شهكت من سمعت مرة الشيخ هذا حالهه انطتني ايدهه استند عليهه
وصلت البيت صحت صابرين تاخذني للحمام من شافت حالي
تخبلت دزت طارش لاسد .......
