البارت السادس🌹🌹🌹
بعد فتره من الوقت استعاد مروان وعيه كاملأ فوجد امه وسديم مازالوا يجلسون بجواره كانت رنيم تنام علي الأريكه اما سديم فتجلس على الكرسي وتسند رأسها للخلف مغمضة العين ولكنها شعرت فجاءة انه استيقظ ففتحت عيناها سريعا فوجدته ينظر إليها فجرت عليه وجلست بجواره وهي تنظر له
سديم: حاسس بأيه يامروان تعبان اجيب الدكتور
وجاءت لتتحرك فأمسك يدها وهمس
مروان: اقعدي يا ديمو انا كويس انا دماغي اللي حاسس انها ح تنفجر مش عارف افكر دلني ياصاحبي
فابتسمت لكلمته التي تذكرها لمدى قربهم فيما مضى
سديم: استحمل عارفه انك موجوع قوي بس انت ح تقدر تصمد استحمل واسمع كلام ثائر هو ح يوجهنا صح
وشعر مروان بالغضب لنطقها اسمه دون القاب فنظر لها
مروان: انتي لحقتي اخذتي عليه لدرجة تشيلي الالقاب يا سديم
فابتسمت لشعورها إنه يغيير عليها مثل السابق
سديم: انا شيلت اللقب ادامك بس ياموري فابتسم مروان
مروان: لسه فاكره
سديم: ولا عمري نسيت
مروان: ليه رفضتي وقبل ان يكمل وضعت يدها على فمه
سديم: نخلص من اللي احنا فيه ونتكلم كتير قوي قوي و بعدين حضره الضابط راح مشوار وراجع تاني علشان يبلغنا الخطة اللي ح نمشي عليها
مروان: مش ح اقدر استحمل اسيب لمار هناك يا سديم مش ح اقدر اخليها تشوف الحقاره دي
سديم: ماتخافش ماما نبهت كريمة واتفقت معاها تبعد لمار تماما عن أي حاجة وانت عارف لمار بتحب كريمة قوي
مروان: ربنا يهون
سديم: كله ح يعدي ماتقلقش
وهنا دخل ثائر بعد أن طرق الباب وسمح له مروان بالدخول وانتبهت أيضا رنيم وجلست هي أيضا وجلس ثائر ونظر لمروان وهو يبتسم
ثائر: دكتور مروان ياريت تسمعني كويس عارف انك ح تتجنن على بنتك لكن لو انت ظهرت دلوقتي اه ح ترجع كل حاجة لك تاني وح تطلق مراتك لكن مش ح تبقى اخدت حقك وللأسف احنا كمان مش ح نعرف نعمل حاجة لان مافيش دليل غير كلام انسه سديم وده ممكن اي محامي صغير يطعن فيه ويبقى ولا عليهم اي حاجة بس ساعتها مش ح تعرف تتقي شرهم ال زي دول أذى لازم نخلص منه
كان مروان يستمع له هو وسديم ورنيم ويفكر فيما يقوله ثائر من كلمات وهو شبه مقتنع بكلماته تلك فنظر له
مروان: طيب حضرتك شايف ايه
ثائر: حضرتك ح تطلع من هنا على بيت والد الانسه مع الست الوالده زي ما كانوا متفقين قبل مايعرفوا انك على قيد الحياه ولازم الانسه سديم ماتبينش انها تعرف أي حاجة عن مدام رنيم وتتصل تسئل عليها في البيت وتمثل القلق عليها فعلا وفي نفس الوقت لازم تظهر في المستشفى وتكون متواجده علشان تبقى عارفه خطوات وائل ايه والأهم بقى عايزك تحاولي تدوري على اي عامله او ممرضه تكون على علاقه ب نرمين علشان نقدر نوصلها اخبار وائل بعيد عنك
سديم: في ممرضه من اللي كانوا بينقلوا اخبار وائل ليه... دي زمان كانت جت اشتكت لي أن نرمين كانت عايزاها تتجسس على مروان ووائل بس هي ماعرفتش ترد عليها وجت قالت لي وساعتها انا قلت لها تبلغها اني شفتها بتتسنط كذا مره عليهم فنقلتها للبوفيه وفعلا بعدها سكتت وبعدت عنها
ثائر: تمام كده هي دي وح اقولك امتى تنفذ
