مذكرات تائب:
مذكرات تائب 1:
فكره انه الواحد يرجع لربنا ولعبادته تاني وربنا يهديه ويستقيم دي حاجه جميله جدا
إنه يبدا يلتزم ويصلي ويقرأ قرآن ويصوم وووو ده شئ جميل
بس فيه حاجه كده هتقابلك خد بالك منها
الموضوع في الاول بيبقي صعب
لأنك مش متعود
فهتبدأ بعباده صغيره
زي الصلاه في مواعيدها بس من غير سنن
تقرأ قرآن بس مش كتير وهكذا
هنا لازم تاخد بالك لأنه الشيطان مش هيبقي عاجبه حالك ده وانه ربنا هداك وهيحاول يبعدك عن الهدايه بس بالطريقه
فببساطه هيجيلك ويقولك
بص ده بيصلي ازاي الصلوات والسنن وتلاقيه كمان بيصلي قيام وانت يدوبك بتصلي الفروض بالعافيه
يقولك بص ده بيقرأ كام جزء ولا ده حافظ كام جزء وانت مش حافظ غير سورتين تلاته
طب قولي بقي توبه ايه دي بقي
الطريق طويل عليك يابني وعمرك ما هتبقي زيهم
اوعاك تسمع كلامه او تديله فرصه إنه يبعدك تاني
اوعاك تقارن عبادتك بعباده الصالحين مره واحده كده علطول
بس ده مش معناه إنك متحاولش تبقي زيهم
أنت حاول خطوه خطوه
تبصلهم بس بنظره تانيه كالآتي
ده بيصلي سنن وبيقرأ وحافظ ووووو
انا هبدأ بعد كده بعد كل صلاه أصلي السنن بتاعتها وهلتزم بده
تمام خلاص التزمت بده خش علي يلي بعده
أنا بعد كل صلاه هقرألي صفحه ولا إتنين
تمام خلاص التزمت تزود الورد شويه
التزمت تزود اكتر وتبدأ تدخل في مرحله الحفظ
تحفظ سور قِصار تصلي بيهم غير السور المعتاده (ده هيساعدك جدا إنك تركز في صلاتك وتخشع ) وتزود في حفظك شويه شويه
تحاول تاخد وقت من الليل حتي لو ربع ساعه تصلي فيهم ولو ركعتين قيام وهكذا
الكلام ده معناه إنه تحاول تجيبها واحده واحده وتلتزم وتبص للصالحين دول وتشوف بيعملوا إيه وتقلدهم
ولما تحب تقارن نفسك
ببساطه قارن نفسك بنفسك قبل كده
انا كنت من فتره بعمل كذا ودلوقتي بعمل كذا وكذا وكذا
وكل مره تحمد ربنا علي هداتك وتسأله الثبات والزياده
المهم في الموضوع انك متبصش للطريق الطويل ده بنظره انه طويل
ركز في الخطوات يلي قدامك الاول
ركز علي نفسك وطورها في عباده ربنا
مره في مره هتلاقي نفسك بتصلي فروض وسنن وقيام وبتقرأ قرآن وحافظ قرآن وبتصوم تطوع وبتقرأ اذكار وووو
واهم حاجه انك متتكسفش من نفسك لما تشوف الصالحين وعبادتهم
علطول تفتكر نفسك قبل كده وتحمد ربنا علي هدايتك وتحاول تقلدهم في يلي بيعملوه واوعي تلتفت لكلام الشيطان ليك إنه الطريق طويل وصعب
💗💗💗
مذكرات تائب:
مذكرات تائب ٢:
طب الحمد لله أنا التزمت وبقيت احسن بكتير من قبل كده الحمد لله
وكمان بقيت بشوف الصالحين دول والاقيني بعمل حاجات كتير هم بيعملوها
انا كده تمام اوي
ثانيه واحده خد بالك من لعبه تانيه الشيطان هيلعبها عليك
الشيطان لقي انه مفيش فايده من انه يبعدك عن ربنا وشايفك كل يوم والتاني بتزود في عبادك وطاعتك والوضع كده بقي مقلق ليه
ازاي بعد ما كنت زبون عنده يبقي ده حالك لأ وكمان بقيت بتزود في عبادك اكتر واكتر
فيبدا يجيلك بلعبه جديده
يجيلك وانت في اي حته
ويقولك بص ده بيعمل ايه ده لا بيصلي ولا بيقرا قرآن ولا اي حاجه خالص وانت بسم الله ما شاء الله عليك بتصلي وبتقرأ قرآن وبتصوم تطوع وحالك جميل
ده انت نسمه
بقولك ايه ما تكبر من قرايه القرآن كتير اوي النهارده يعني مش كفايه الصفحه ولا الصفحتين بعد كل صلاه دول
وبعدين شوف يلي حواليك ده انت نسمه بالنسبه لهم ده انت مفيش زيك
وبعدين يا اخي راعي نفسك شويه كده مش كل يوم كده وكفايه اوي يلي انت بتعمله ده عايز تزود في ايه تاني
ده انت الناس حواليك فين وفين لما حد بيصلي وانت بتعمل كل ده
اوعاك ثم اوعاك تسمع كلامه
اوعاك تغتر بعبادتك وتشوف نفسك هيرو
وانك بتعمل كل حاجه
بلاش تخليه يجيلك من السكه دي
مره في مره هتلاقي نفسك بتقلل وبتقول ده انا احسن من غيري
بعد ما كنت بتزود في عبادتك
بقيت بتقلل منها
المهم انك في نظرتك للناس يلي اقل منك في العباده تكون مش سخريه ولا انك تفرح بنفسك
علطول تحمد ربنا علي هدايتك وتسال ربنا الثبات والزياده وتدعيلهم ان ربنا يهديهم
بلاش تديله سكه ليك وتخليه يقلل من عبادتك
هدانا وهداكم الله اجمعين
