قصص عراقية:
٣____٤
سبحة وتراچي
من كتابات زهراء العراقية
الفصل الثالث
" ليس هناك قتل مشرف، ولا دمار معتدل ؛؛
لا شيء جيد في الحروب سوى نهايتها "
-كيفت من خلصت من الحرب الايرانية
بعدني ما جريت انفاسي راح الرجال وابنه
اريد اعرف ابني وين.........افتر السجون سجن سجن وافتر المراكز وانشد اعليه حتى لو ياخذوني وياه عاد اعرفه وينه وبيا كتر
جاوبتها خالتي
- تخبلتي لج شنو راح اسوين الي يروح يمهم بس الله الي يعلم شنو يسون بيه
هاي اذا ما مي...
كطمت الكلمة خالتي
نزلت دموعها لامي واحنه نباوع الها بقهر
و وجعتنا گلوبنا بهذا الطاري
- بجاه ام الحسن يردلي سالم ربيته بماي العين
ااااخ
يا زهرة
عافني الرجال وما اخذ ابنه عافني بالظيم
ليش ما اخذني عاد
گالتها بقهر ممزوج ببچي ونشيج قوي
خالتي كاعده بصفها و هم مدمعة
- رجلي يعرف واحد بالاستخبارات
لزمت ايدها امي وكالت بترجي
- عفية يعني يكدر ينشد على اوليدي
هزت راسها بنفي
- خليته يسأل اني قبل لا تحجين قبل لا نجيج ردت اروحلج بخبر بس
سكتت
امي سألتها بفزعة وفزعتنا وياها
-شنو ميت؟
-لا لا والله ما گال شي
بس رجلج
-اشبيه هو الثاني عرفتو مكانه؟
- ما نعرف بس اهواي نزحو لرفحا و اكو مخيم ثاني اسمه الارطاوية يمكن فر بيهن يكول الاف الناس والعوائل اهناك بس دايتعذبون ويتعرضون للانتهاكات من الحرس السعودي كتل واغتصاب اطفال ونسوان و و
سكتت
-شنو رجلي مات
احجي عاد
-لا بس صديق زوجي كله ما اكدر اكلك و اطلع اسرار الك بس اهواي جاي يسلمون منهم السعوديين للمخابرات العراقية
خاصة القادة ورجلج جان قايد
بس ما كال مسلمي لا
ما عرف رجلي منه شي يشفي ،
تنهدت خالتي وكالت
-يمعوده زين من بقيتي اهنا عبالج ترتاحين اهناك يكتلكم الضيم
-لبالج اهنا ما شايفه الظيم؟!
بس خالج ودكة عليه كافي
لو ابنه
سكتت ما كملت وهي تباوع النا وصاحت بينا ننام و خالتي ما ناقشت امي بظلتها اهنا اعتقدت انها مو جادة من قهرها هيج كالت...
انطرحنا اني وعروبة على اسرة حديد مبينه مال الولد وحده بصف الثانية ماكو مسافة الا قليلة بينهم وعليهن فرش قطن مريح ذكرني بفراشي كان عندي قريولة انام عليها لونها ابيض صغيرة اوووف قريولتي راحت يمكن فلشوها
امي وصفاء وعون جوة فرش مطروحين عليهن
و اكو سرير ثالث يم الحايط الثاني وحده
ويمه ميز مكتب صغير وكرسي عليه كتب
وكدامنا كنتور صاج خشبي جوزي بيه اربع ابواب و يمة طاولة دائرية صغيرة عليها مزهرية زجاجية كلها فصوص من زجاج هم و بيها ورد صناعي ملون هذي الغرفة بالطابق الأرضي معرفت المن بالضبط
