ပယင်းကြိုးသီ ချစ်သောမောင့်ဆီ(Complete)

အပိုင်း✨🍁(၁၈)

ပယင်းကြိုးသီချစ်သောမောင့်ဆီ
အပိုင်း✨🍁(၁၈)

ခတ္တရာ ကံကော်ပန်းပွင့်များကိုဘုရားကပ်ဖို့သီကုံးနေရင်း ယမန်နေ့ကအကြောင်းအရာများကိုလည်းစဉ်းစားနေမိသည်။
ဘယ်လိုပင်စဉ်းစားစဉ်းစား ဘယ်ရှူ့ထောင့်ကပဲတွေးတွေး နားမလည်နိုင်ခြင်းတွေပဲဖြစ်နေကာ အဖြေဟာထုတ်မရ။

အရှင်၏ပယင်းရောင်မျက်ဝန်းများက မောင်ငယ်လေးအပေါ်ကြည့်သည့်အကြည့်မှာ ခမည်းတော် မယ်တော့်အပေါ်ကြည့်သည့်အကြည့်လိုမျိုး နူးညံ့လှသည်။
ချစ်မြတ်နိုးမှုတွေပါဝင်နေသည်။ထိုကဲ့သို့သောအလားတူအကြည့်မျိုးဖြင့် အရှင်ဟာ မောင်ငယ်လေးကိုကြည့်နေခဲ့လေသည်။
သူတို့နှစ်ဦးကြားတွင်ရှိနေသည့်အားကောင်းသောတစ်စုံတစ်ရာကို ခတ္တရာခံစားမိနေသည်။
ခတ္တရာအတွေးလွန်နေခိုက် ကံ့ကော်ဆောင်အတွင်းဝင်လာသည့် အရှင့်၏ကိုယ်ရံတော်အားသတိမထားမိ။

မဏိ အရှင့်မှာကြားချက်အတိုင်း နောက်လိုက်အနည်းငယ်ဖြင့် ကံ့ကော်ဆောင်၏စားဖိုဆောင်သို့လာရောက် စစ်ဆေးဖြည့်စွက်ခြင်းဖြစ်သည်။ထိုအချိန်ကံ့ကော်ပင်များအောက်တွင် ပန်းတွေသီကုံးနေသော သခင်မလေးအားတွေ့သည့်အခိုက် ရင်ဘက်ထဲမှအချက်ပြမှုနဲ့အတူ အကြည့်မလွှဲနိုင်အောင်ဖြစ်သွားရသည်။

ဖြူလွှလွှရင်ပြတ်အဝတ်ပေါ်တွင် ပဝါပါးလွှမ်းခြုံထားကာ ဆံနွယ်များကို အသာအယာချပြီး နားနောက်သပ်ထားပုံကမဟာဆန်လှသည်။
နှဖူးပြင်တည့်တည့်တွင် တွဲလောင်းကျလျှက်ရှိသော ခေါင်းမှ အဆင်တန်ဆာလေးဟာလည်း လှုပ်လီလှုပ်လဲ့ဖြစ်နေပုံအား မနီးမဝေးမှ မဏိမြင်နေရသည့်အထိပင်ဖြစ်သည်။
မဏိပဲအမြင်အာရုံကောင်းလွန်းနေသည်လားမသိ သခင်မလေးနှင့်ပတ်သတ်လျှင် ဆံချည်မျှင်လေးလှုပ်ခတ်သွားသည်ကအစ သတိထားမိသည်။
ငေးကြည့်နေ၍မဖြစ်သေး မဏိကိုယ်ဟန်ကိုပြင်လိုက်ကာ အရှင်မှာကြားလိုက်သည့်ကိစ္စအား ‌အသိပေးရန် အနားကိုသွားလိုက်သည်။

ခတ္တရာကိုယ့်အာရုံနှင့်ကိုယ်အပြင် မောင်လေးအကြောင်းလည်းတွေးနေသည်မို့ လက်မှာကိုင်ထားသည့်ပင်အပ်က ကံ့ကော်အညှာအားချော်ကာ မိမိလက်သို့စိုက်သွားသည်ကိုသတိမထားမိလိုက်။