من تعينت كل سنه يجونه طلاب فدائما نقرا الاسماء من ضمن الاسماء اسم اب الطفل مألوف علية بالورقه مكتوب الثلاثي كتله تعال ابني وين بيتكم كلي بكذا مكان هنا صفنت نفس المكان ركضت للمعاونه كتلها انطيني فايل هذا الاسم جان تكلي خير شبي كتلها بس ادقق شغله اخذته قريت الاسم نفس الاسم لاياربي معقوله …. رجعت بالتاريخ
بسنة ال 2005 نجحت من السادس ونقبلت كليه عادية مو ذاك القسم العالي المهم قبل الدوام بشهر اني الح على امي خل نطلع نشتري ملابس بعد مالحك وكل يوم ازرف رجلها من يمه يمه كلي لابوي الى ان قبل يوم كال لامي يلا نطلع نشتريلها ملابس مال جامعة هذا الحجي بليل المهم ثاني يوم الصبح الساعة ب6 اني مبدلة و واكفه فوك راسهم من الصبح حتى البقال ما مفتح اني واكفة وفرحانه المهم طلعنه للسوك طبعا اول شي لازم نزور وراها نشتري زرنا وكملنه وتريكنه وشربنه ببسيي من هذا الكلاص الي بالشارع وراها رحنه للسوك نشتري ابوي طب لابو المحل كال ارقى تنوره كابوي عندك اني خاتله وره امي واشر لا مو هاي ذيج نزل وحده زركة كاحت متت عليها بس ماقبل ابوي كال عيب اخر شي اشتريت وحده ام الجيوب مكيفه بيها وياها بلوز و شال ابو اللماع وحذاء تكرمون واشترينا لاخوتي حامض حلو ومصقول وبيض حمام ورجعنه للبيت صادف يوم جمعة طبعا رجعت للبيت لبستهن كدام المرايه واسوي نفسي امشي بالجامعة وحاطه جنطتي وامشي ومحد عاجبني لان مو اي تنوره تنورتي كابوي وبيها جيوب المهم ثاني يوم بابا اخذني ورحنه للكلية طبينه وشفت الكليه واني بس اباوع شنو هاي الولد وي البنات يسولفون ويضحكون مستغربه ومستحية من يمي لان اول مرة ادخل للجامعة … وصلنا لقسمي وكملنا تسجيلنا وعرفت القاعة مالتي ورجعت وي بابا للبيت اسولف لامي بالمطبخ حاطه ايدي على حلكي واسولف خايفه من ابوي ومستحيه بصوت ناصي كتلها يمه ولد وبنات سوة يمشون وشفت ولد وبنيه واكفين يسولفون يمكن متزوجين هههه لان ماجنت اعرف شنو حبيب لو صديق … المهم مرت الايام وداومت وك رت اتعامل وي العالم الجديد ويوم عن يوم بديت اكون صداقات بنات وزملاء وجان الموضوع طبيعي مو مثل ماجنت متصورة بالبدايه … هنا تحديدا بدا شخص يهتم بيه ودائما يجي يسلم ويكلي شمحتاجه مامحتاجه بصراحة الولد محبوب بس اني جنت اخاف لان اعرف جان اباله نكون سوه وطبعا ماكدر اخالف رآي امي لان هي موصتني ممنوع تحجين وي ولد او تمشون سوه لان اغلب الولد يضحكون عالبنات وابوج دازج ادرسين ماريدج تفشلينه .. هاي الحجايات دائمًا تفتر براسي وفعلا خليت ثقة اهلي كدامي .. هنا الولد يوم عن يثبت انو هو مؤدب ومحبوب من الكل وبصراحه اني بديت ارتاح اله يعني ماشفت شي غلط سواه وصلنا لنهاية السنة تقريبا فترة الامتحانات وجنة مجمعين نراجع الامتحان جنت اني وصديقتي وخطيبها وهو جنة مركزين وره دقايق صديقتي وخطيبها كالو دقايق ونجي وطبعا اول مرة نبقى سوة وحدنه هنا جان الاحراج والخجب كلش قوي بينا وطبعا مبين من عيونه ساكتين وبس نباوع بالملازم .. وفجأة كال " ممكن اكول شي ؟
كتله: تفضل !
كال : اني من اول ما شفتج كلش نعجبت بيج ورايدج تكونين الي وكلش متعلق بيج ويمكن تعرفين هالشي ؟
اني ارتبكت وماعرفت شسوي وكمت ارجف
كتله : انت شلون تحجي هيج وياي احنه زملاء
جان يكول : خلص خلص لا تضوجين اني اسف وكام راح
اني ضليت صافنه وخجلانه على مرتبكه شعور مخلوط
جان يجون صديقتي وخطيبي سألوا عليه كال شو ماكو كتلهم راح جان خطيبي اختي كال راح اشوفه وين
هنا اني حسيت هم متفقين سوه عليه
لزمت صديقتي من ايدها كتلها : تعالي ولج هاي اتفاق بينكم مو ؟
جان تكولي : اخ ولج لا شلقضيه
كتلها : احجي لا اموتج
جان تكول : لج والله كال اريد اعترفلها لان كولش احبها وبعدين شجاج عيني ولد مايتفوت شدعواج هيج
كتلها : ياثوله غير تكوليلي ليش هيج ضليت ارجف ..
ضلت تضحك ..
راحت السالفه بس هو ابد مايلتقي من اني موجوده وفعلا حسيت بالذنب جان المفروض ما ارد هيج رد
فضل كل ما يشوفني يروح لو يدير وجهه
وصلنا لاخر امتحان طلعنا وضلينا نودع اصدقاء وصديقات جان تجيني صديقتي
جان كالتلي : لج الولد كولش حابج ورايدج انطي فرصه يحجي الي عنده ويكول هذا اخر يوم حتى اعرف شنو وضعي وكولش محرج منج
كتلها :وهسه شنو المطلوب مني ؟
كالتلي : يريد يحجي وياج دقايق
كتلها : اوك بس تكونون قريبين ماريد الطلاب تكول شي عنه
كالت : اوك
اجه وصديقتي وخطيبها على صفحة
جان يكول : اول شي اني اعتذر ثانيا اني ماعندي لا منا ولا منا ورايد موافقتج من الله ومنج والي تردينه يصير وواعدج الي تردينه يصير رايد اخطبج
كتله : اني مامفكره اريد اكمل دراستي
كالي : وياج لحد ماتكملين واني من هاي اللحظه وياج بس زميل …
بصراحة شفته صادق بكلامه وماعنده منا منا وهو معروف
كتله: الله كريم
كال : ونعم بالله بس اريد جواب
كتله : اني ما رافضتك هاهيه نفس ماتكول …
من كتله هيج جان يكول اوووف كلبي راد يوكف
ههه ضحكت
رجعنه واني الدنيا ما واسعتني حسيت بشعور كلبي يريد يطير
بحيث من رجعت عندي واهس مال شغل بيت حتى امي متعجبه بيه ههههه
المهم مرت الايام واني احسب شوكت نرجع حتى اشوفه لان لاتلفون ولا كولشي بينا واصلا تلفونات ماكو وحتى لو اكو بس غاليات وابوي لو اموت ميشتريلي .. مرت الشهور واني احسبهن على ايدي
ورجعنا للدوام بسنة ال 2006 الاحداث جانت كلش خطرة بالطائفية وجنه كلنا خايفين على ساعة ننخطف لو ننقتل لو مفخخه المهم دخلت الكلية والتقيت بي سلام وشلونك وشلونج وعيونه تسولف شكد مشتاقين لبعضنا
هنا بدينه نتعرف اكثر فاكثر واكتشفت هم يسكنون الريف جان يسولفلي شلون يربون حيوانات واني جنت كولش احب حياة الريف والجو مالتهم وهو جان كل يوم يجي يجيبلي ورد وياه وطبعا جان تسليم الورد مو كدام العالم جان تسليم الورد مثل المخدرات يخلي بمكان واني اجي اخذه هههههه
علاقتنا كولش قوت وبديت اتعلق بي وصار يومي كله بس هو ويوم الي مايجي للكلية كلبي ابد مايرتاح واكره الدوام
جان بيتهم بعيد لذلك يجي كيات وجان كلبي كلش قلق عليه لان مثل ماكلت الاحداث خطرة ..
المهم يوم الاحد المصادف ٢٠/٣/٢٠٠٦ كالعادة داومت وجان كل يوم ينتظرني باب الجامعة بس بهذا البوم اليوم هو ماكو كلت بس اوصل القسم اله ما احجي وياه عايفني ورايح وصلت القسم شفت هدوء ويم الباب جانو مجمعين يقرون البوستر الي ملزوك على القسم شنو السالفه ترقية استاذ لان جانو دائمًا الي يترقى يسوله بوستر تقربت ردت اشوف يا استاذ
كتلهم من رخصتكم خل اشوف
شفت البوستر مكتوب" تنعى كلية ال….. لفقدان احد طلبتها الطالب .. …
شنو شنو هذا منو شلون مات عزا العزاني صحت بين الطلاب ولكم شلون مات
جانت تركض علية البنات وصديقتي سحبني على صفحة حضنتني صديقتي لج قتلوهم الارهابيه كل الي بالسياره قتلوهم وهو من ضمنهن …. مات حبيبي … جنت اريد اعاتبه ليش ما انتظرني باب الجامعة … بس راح …
بجيت ومتت من البجي رجعت للبيت خفت من اهلي خفت اكلهم مات ويسالون منو هذا ووين تعرفي عصرن نفسي ورحت طبيت غطيت راسي وابجي وكل مايجون اهلي اسكت اصعب شعور ماتفرغ الي بداخلك هنا امي حست بي جان تقفل الباب كلتلي شبيج تبجي شصاير
كتلها ماكو شي كالتلي وج شنو ماكو شي خدودج ملختهن احجي كتلها مات حبيبي
جان تكولي شنوووو ؟ حبيبج منو
كتلها مات
جان تضربني راجدي ولج شنو حبيبج شنو مات شكتلج اني موديتج ادرسين لو تتمعشقين وغلطت عليه وطلعت .. وره ساعة اجتني حضنتني هنا اني نهاريت
جان تكلي يمه اني اخاف عليج ابوج مايرحمج احجيلي شصاير
حجيتلها من اول شي لاخر يوم بحياته حضنتني وكلتلي كومي توضي وصلي واقريله قرآن
كمت صليت وسجدت بس ابجي حسيت كلبي فرغ كل حزنه ضليت ايام مارحت للكليه
وره هالايام رحت للجامعة من هذا اليوم لحد ماتخرجت ماحسيت ولاطعم بيها ايامي وخلصت وتخرجت وتزوجت وراها بفتره تعينت لكن كلما يذكرون اسم الجامعة روحي اطير مني واتذكرة … بالاخير اكتشفت الطفل يختلف اسم الجد الخامس بس من ركضت للمعاونه واني افكر معقوله عايش تمنيته عايش بس الله يرحمة مايجوز بس الرحمة
( )
