ZSWW MM FC ကနေ ပြုလုပ်တဲ့ Sway with the Kindness ဆိုတဲ့ Donation Project လေးမှာ ပါဝင် ရေးသားဖြစ်ခဲ့တဲ့ One shot လေးပါ။
Admin ဆီက ခွင့်ပြုချက်တောင်းပြီး ပြန်တင်ပေးခြင်းဖြစ်ပါတယ်။
▪︎▪︎▪︎▪︎▪︎▪︎▪︎▪︎
အချစ်ဦး...
ငယ်ရွယ် ပျိုမျစ်မှုကို ကိုယ်စားပြုတဲ့ ကဗျာတစ်ပုဒ်။
အကြင်နာကြိုးလေး တစ်ချက် ခက်မိတော့ လွင့်ပြယ်လာတဲ့ ချစ်ခြင်း သံဇဥ်။
နှလုံးသားရဲ့ လစ်ဟာမှုကို နံရံပေါ်မှာ အလွမ်း ခက်ဆစ်ဖွဲ့လို့
အသက်ဓါတ်က တငွေ့ငွေ့ ဝေဒနာမီးက တဟုန်းဟုန်း။
ပထမဆုံးအကြိမ်အဖြစ် တစ်စုံတစ်ယောက်အပေါ် ကျရှုံးခြင်းမလို့ ဆုံမှတ်တွေမလွဲရအောင် သင်ယူစရာ မှတ်တမ်းမျိုးမရှိဘူး။
အချစ်ဦးပုံပြင်တိုင်းဟာ သဘာဝဆန်ဆန်လေး တွယ်ငြိသွားမိခြင်းကစသလို
သဘာဝဆန်ဆန်လေး ချစ်ခဲ့ကြပြီး
သဘာဝဆန်ဆန်လေး ခွဲခွာခဲ့ကြလို့။
နွေဦး ရွက်ဝါကြွေမှ လွမ်းတာမျိုးမဟုတ်ပဲ
အိုမင်းတဲ့အထိ တမ်းတချင်တာမျိုး။
▪︎▪︎▪︎▪︎▪︎▪︎
June လရဲ့ နှောင်းပိုင်းနေ့ရက်တွေမှာ မိုးတစ်ရက်လေးမှ ပျက်တယ်ရယ်လို့ကိုမရှိ။
မနေ့ည ညဥ့်ဦးပိုင်းလောက်ကတည်းက တဖွဲဖွဲရွာနေတဲ့ မိုးတို့ဟာ မနက်လင်းအားပိုင်းတွင် လေပြင်းတို့ကိုပါ သယ်ဆောင်လို့ သည်းသည်းမဲ။
တစ်ညတာလုံး မိုင်ကုန်ရွာထားသည့် မိုးကြောင့် ကားလမ်းမတစ်လျှောက် ရော ၊
လူသွားလူလာ ပလတ်ဖောင်း ပေါ်တို့ပါမချန် ရေအိုင်ငယ်တို့ဟာ အနှံ့အပြားနေရာယူထားသည်။
နိစ္စဓူဝ ကိစ္စအရပ်ရပ်ထွေပြားလို့ အားချိန်ရယ် စိုးစဥ်းမရှိ ဇောတစ်ခုကပ်ကာ လှုပ်ရှားရုန်းကန်နေရသူတို့အဖို့ တပေါက်ပေါက်ကျနေသော မိုးသားကို အရောင်အသွေး စုံလင်သော ထီးတို့အကာအကွယ်ဖြင့် အံ့တုလျက်။
အရှိန်ပြင်းပြင်း ခြေလှမ်းတို့ဟာ မိုးရေအိုင်တို့အပေါ် ရှပ်ပြေးတော့ အိုင်ငယ်ကြည်လွှာအထက်တွင် ထင်ဟပ်နေသော ပုံရိပ်ယောင်တို့မှာ လှုပ်လီလှုပ်လဲ့။
