ساعات كدا شيفت الصيدلية بيهدأ والناس بتبطل تروح وتيجي على الصيدلية كتير، فالدكتورة بتقوم تعملنا كوبايتين شاي كدا، بالمناسبة مش بشرب شاي أحمر غير من إيديها وابتديت أحبه يعني.
المهم أنا لاحظت إنه اسم الصيدلية مختلف عن اسم الصيدلية المكتوب على الكياس، مكتوب اسم دكتور مختلف عن المكتوب على الصيدلية من برا.
فبسأل الدكتورة ليه الكياس مختلفة؟ قالت لي إنه الدكتور الصيدلي إللي باع لهم ترخيص الصيدلية فجأة جت عليه فترة وقرر يسحب الترخيص منهم، فقرروا إنهم ينقلوا مكان تاني ويشتروا ترخيص دكتور تاني.
المكان الجديد إللي راحوه دا منجحوش فيه وكانت المنافسة عالية، وفي نفس الوقت الصيدلي إللي أخد منهم الترخيص عطاه لحد من قرايبه، وقريبه دا معرفش يمشي الصيدلية زي ما هما كانوا ممشينها في الأول.
فأخيرًا يعني رجعوا مكانهم تاني، لكن بعد ما صرفوا فلوس كتير على افتتاح الصيدلية الجديدة منها الكياس إللي عليها اسم الصيدلية الجديدة، فقرروا إنهم يستعملوها في صيدليتهم القديمة عادي.
لحد هنا كنت بسقسق البسكوت في الشاي وعادي مندمجة مع البسكوت وهو بيبوش.
لحد ما الدكتورة قالت لي تعرفي إنه الموضوع دا كان هيبقى سبب طلاق ومشاكل بين واحد ومراته؟
لحد هنا أنا أدركت إنه في حاجة أهم من إني ألحق البسكوتة قبل ما تبوش، وسألتها باهتمام كبير: ليه؟
قالت لي في مرة، جت واحدة ست الصيدلية بتسأل هي الكيسة دي تبعكم؟ قالوا لها آه تبعنا.
الست كانت منفعلة جدًا وقالت لها إزاي يعني؟ عنوان الصيدلية دي مختلف عن عنوان الصيدلية المكتوب على الكيس دا! فالدكتورة قعدت تشرح لها كل إللي حكيته دا.
قالت لها إنها في مشاكل بينها وبين جوزها بسبب ست كان يعرفها ساكنة في نفس عنوان الصيدلية دا، وهو يوم ما جاب الدواء دا كان متأخر أوي برا البيت، وهي لما شافت العنوان شكت أنه كان عندها، وهو راجع جاب الدواء من أي صيدلية قريبة من بيت الست دي.
فهي شكت إنه رجع يروح لها مرة تانية من مجرد قراءتها لعنوان الصيدلية، متخيلين!
يعني تاخد الدواء وتسكت؟ لا، طالما شكت في حاجة لازم تجيب قرارها.
طبعًا أنتم فاهمين أنا جاية أتكلم عن إيه، الحاسة الخارقة إللي عند الستات وقدرتهم الرهيبة على التحقيق وإنه مفيش تفصيلة تفوتهم.
أصل إللي تعرف تفرق بين درجات الأبيض وتسمي كل واحدة بيها باسم أكيد هتعرف أنت متغير ولا لا، وعامل مصيبة ولا لا.
هي صحيح الست كانت مفترية والراجل معملش حاجة، بس شوفوا الدماغ يا جماعة!
أنت تقرأ
سيكولوجية وردية
Non-Fictionهرمونات؟ تنويه: الكتاب لا يناقشُ حقائقَ علمية مُطلَقة؛ إنَّما هي ظواهرُ مُجتمعيةٌ نرويها بشكلٍ ساخر لا يهدف إلى التقليل من شأن أحد. Cover by: Nancymedhat7
