They say all good boys go to heaven, but bad boys bring heaven to you
الدقيقة 0:49 بتختصر حالة الفصل دا😉
جاكيت أسود جلد بيلمع تحت قمر نص الشهر العربي، وتاتو أخضر رسمته غريبة، لا يا هانم مش مستذئب، بتحبيهم أنتِ أنا عارفة، ومتقاطعنيش رجاءً.
فخامة متحركة لابسة ستايل كاجوال يكتم الأنفاس رغم إنه ممكن يكون حاجة بسيطة جدًّا، بس العبرة بإللي لابس مش الملبوس.
طريقة وقفته ومشيته إللي بتملأ المكان وراها كاريزما طاغية وثقة بالنفس رهيبة قد تصل لجنون العظمة.
سيجارة كيلوباترا فرط علبتها كان مكتوب عليها في كل حتة السجائر تؤدي إلى الوفاة وسرطان اللثة وسرطان كعب الرجل وترابيزات بلياردو وبينج.
لو كان في مستوى اجتماعي أعلى شوية كان هيشرب سجاير مارلبورو.
أيوة آنساتي سيداتي، ومفيش سادتي عشان الكتاب غير مخصص للرجال.
الشخصية دي في كل الطبقات الاجتماعية، في كل حتة حوالينا، مش بعيد نكون واقعين في غرام واحدهم منهم، غرام الـ«باد بوي».
بس يؤسفني يا عزيزتي إنه إللي أنا قلته فوق وشفت القلوب طالعة من عينيك وقتها دي نظرتك لوحدك للباد بوي، أنت شايفاه بعينك كدا، لكنه في الحقيقة غير كدا تمامًا.
لو فكرنا بمنطقية مش هنلاقي سبب نظري وواقعي يفسر ليه بننجذب للباد بوي؛ لأنه المُعطيات بتقول عكس دا، إيه الجذَّاب في إنسان مستهتر وضايع؟ بس عمليًّا في أسباب كتير أوي.
يمكن لإنه دا حاجة متسجلة في عقلنا اللاوعي من المسلسلات وأفلام الأكشن التعبانة إنه الراجل هو إللي يدخل يقلب ويكسر ويضرب؛ فبقينا بنحس إنه الرجولة هي التكسير والرزع والصوت العالي والسلوك المنحرف. ونظرتنا للجود بوي المحترم الطبيعي إنه واد طري كدا وملوش فيها.
أصل أنا دائمًا بقول إنه الشخص بينجذب للي عكسه، للي بتكون فيه صفات ناقصاه وعايز يكملها بصفاته؛ فالست بتنجذب للراجل عشان بتكون معجبة بتصرفاته الذكورية، وهو كذلك معجب بتصرفاتها الأنثوية، بغض النظر عن مدى صحة السلوكيات دي.
والستات مش بيقدروا يعملوا الحركات اللولبية دي، أو مش بتلاقيهم بيتزعموا عصابات المافيا ويحطوا السجاير ورا ودنهم زي أحمد السقا.
فتعالوا كدا آخدكم من إيديكم نعرف إحنا ليه بننجذب للباد بوي.
حبيبي على نياته كل البنات إخواته:
إحنا الستات أغلبنا بيحس بالنشوة لما تحس إنها أجمل من واحدة تانية، أو وصلت لمكانة معينة في وظيفة ما، فما بالك بقى بمكانة عالية في قلب إللي بتحبه أو معجبة بيه؟
واحدة من الأسباب إللي بتخلي البنات تحب الباد بوي هي كتر علاقاته العاطفية، اتصدمتِ؟ آسفة.
أنت تقرأ
سيكولوجية وردية
No Ficciónهرمونات؟ تنويه: الكتاب لا يناقشُ حقائقَ علمية مُطلَقة؛ إنَّما هي ظواهرُ مُجتمعيةٌ نرويها بشكلٍ ساخر لا يهدف إلى التقليل من شأن أحد. Cover by: Nancymedhat7
