H3-2 The Red Flame : Grape Wine and Cheesecake ( Completed)

Kabanata 11 : Online Buyer

Kabanata 11 : Online Buyer

Manila

One week later

Kanina pa nakatunghay si Wine sa online selling na isinasagawa ni Elle kung saan isang linggo ng ginagawa ng asawa ang naturang negosyo.

Gumawa si Wine ng panibagong account para mapanood ang asawa, kung bakit niya ginawa iyon hindi niya alam. Basta ang naisip niya panoorin si Elle sa pagbebenta ng mga gamit nito online.

Nasa opisina si Wine ng mga oras na iyon sa Manila dahil may kaso silang nakasalang sa korte na tinatrabaho niya. Isa siyang abogado sa isang papalagong Law Firm sa Manila na pagmamay-ari ng mag-asawang Bullet at Faith kung saan kaibigan niya ang lalaki o kagrupo. Parehong abogado ang mga ito tulad niya, bukod doon abogado rin sa naturang Law Firm si Run ang isa sa katriplets ni Elle.

"Atty Lopez."

Napatingin si Wine ng may kumatok sa pintuan ng opisina niya na bahagyang nakaawang at ng sumilip ang tao roon bumungad si Faith.

"Yes?" sabi ni Wine

"Nakita ko iyong online selling ni Elle, gusto ko sana makita iyong mga hindi pa niya naipapakita sa online selling na balak niya ipagbenta." nakangiting sabi ni Faith na ikinatingin ni Wine dito sabay pasimpleng pinatay ang laptop niya kung saan niya pinapanood si Elle.

"Tawagan mo siya." sabi ni Wine.

Napatitig si Faith kay Wine, ilang buwan na niyang napapansin na wala si Wine sa sarili dala marahil sa busy na schedule nila sa mga kaso na hawak nila na karamihan ay tungkol sa annulment na siyang forte ni Wine.

"Naisip ko, baka puwede makisuyo para mauna ako sa mga ipinagbebenta ni Elle. Magaganda kasi ang gamit niya. Gusto ko bilhin habang mura at hindi pa nakikita ng lahat." sabi ni Faith.

Napatitig si Wine kay Faith, galing ito sa mahirap na pamilya at alam niyang hindi ito naging maluho kahit nakapangasawa nito ng isang Cheung.

"Tawagan mo na lang." sabi ni Wine na ikinatango ni Faith sa nakikitang tila wala nga sa mood si Wine.

"Okay sige." nakangiting sabi ni Faith saka ito lumabas ng opisina.

Pagkalabas ni Faith muling binuksan ni Wine ang laptop at pinanood si Elle sa pagbebenta.

........................

Heather Island

"Ang unti pa ng benta ko. Isang linggo na, hmmn paano kaya?" sabi ni Elle sa sarili.

Napatingin siya sa mga komento sa mga nanonood ng online selling niya, kaunti lamang doon ang afford makabili sa gamit niya na hindi naman niya puwedeng ibenta sa murang halaga. Karamihan sa mga nanonood ay mga intresado sa buhay niya na isang Cheung at Valiente kasama pa na Lopez ang asawa niya.

May mga media din siyang nakikitang nanonood at nagkokomento na tila nag-babantay lamang sa pagkakamali niya, o sasabihin niya na puwedeng ibalita ng mga ito sa Business Site.

"Mama."

Napatingin si Elle ng magbukas ang pintuan, nagbreak lamang siya at iyon ang paalam niya sa mga online viewers niya.

"Bakit iyon mga anak?" sabi ni Elle na makita ang quintuplets na nakasilip sa pintuan ng guest room.

Isang linggo na ang nakalipas ng sabihin ng lima na sasali ito sa pagbebenta niya na hindi niya pinayagan dahil ayaw na niyang pagtrabahuin ang mga anak. Hanggat maaari sila na lang ni Wine o siya na lang ang kakayod para sa pamilya nila.