Sorry sorry 💔
Ka lu vun chu a pawt hik mai dawnin ka hria, ka na ti lutuk chu ka ṭe chiam chiam a. Min mantupa lah chuan engah mah a ngailo lehnghal. Ka sama hnuk chung chuan lobby-ah min luhpui a, Tae pawh palian zetin a rawn kuah lut ve mek. A taksa zawi danah chuan nikhua a hrelo tih ka man ve mai, a chal a duk raih bawk.
Mi pakhat, jean kekawr ha, hmai chik hrep hrup, mitmu rawng pawl vawt ruih a min lo en rengtu hmaah chuan min theh phei thuai a.
"Tunge i hming, ?"
A accent atang chuan American a nilo chiang. Tunge ka nih a hrelo tak tak emaw nile? Ka hmaia thisen kai nuaite vang hian min hre lo pawh ani maithei. Huat hmel zet chuan ka melh let ve kar a, ka dula a rawn pet takah chuan ka thlep hnawp a ni ber mai.
Thaw ka lak kawk kawk lai chuan, "Tunge i hming?" a rawn ti leh a.
Ka bula let reng chu Namjoon a ni, a dula a hliam dawm pah chuan a thaw ri hrawp hrawp a. JHOPE, Hari leh Josua-te ka hmu ve miah lo. Panic room-ah an biru hman pawh a ni maithei. Lalpa leh, chu chu ni lul rawh se. Anni tal an dam chhuah a ngai. Ka hmaa ding chuan ka khabeah dawmin min kuai dak a.
"I hming min hrilh dawn nge, he lai a Sam senpa hi ka sawisak tir dawn?" tih pahin Tae, engmah hrelo a chhuata mu lam chu hawiin a bu nghut a.
"J-Jimin" ka tawng ring theilo.
"Jeon jimin i tihna maw?" Nui deuh vur vur chungin min zawt a, ka bu nghat.
Phat buai vel kha awmzia a awm tawh lo. Russian tawngin engemaw a sawi a, an nui hluah hluah mai. Min en dan chuan ka tiril a fan a, ka rap lutuk tlat.
"Khawiah nge midang, i hlimthla leh naupangte kha?"
I hlimthla a tih awmzia chu ka hre mai lo a, mahse Jhope a sawina a ni.
"Ka hre lo," Igor a tih chuan Tae chu a pet nghal chawrh a, a ṭe nghal thawt.
Tae chuan thei leh thei lovin min rawn en ṭawk ṭawk a, a hmelah chuan engmah sawilo turin min duh tih ka hria, mahse engtin nge a na tuar lai hi ka thlir liam tawp theih ang.
Pawnlamah chuan au thawm leh silai kap thawm a lo ri a. An hotupa niawm tak chuan min pawmbetin ka nghawngah chuan a chemte ken chu a nawr bet nghal
. Insual thawm leh silai kap rite chuan ka thisen a ti khang vek tawh. Chet tumna pawh ka nei tawh lo. Ka nghawnga chemte tin reng chung chuan living room lamah min tawlh luh pui a, Igor pawhin Tae samah hnukin a rawn chhawm lut ve mek bawk. Tae chu din pawh a ding ṭha thei tawh lo.
Chutih lai tak chuan kan bul maia Russian mobster pakhat nghawngah tak mai chuan silai mu a rawn lut a, paih ang thlawrhin a thal nghal.
"Kan kutah i pasal a awm tawh, Mr.Jeon. A taksa hi chansawm lo tura min duh anih chuan i hriamhreite kha paih la, tlawm mai rawh." A tih lai mek chuan Jungkook chu silai pahnih hum chungin inchhungah chuan a rawn pen lut chiah a. Yoongipawh a rawn lang ve nghal.
"Chuan hei hi i pasal maw, Jungkook?" Min kuahbettu chuan a ti leh a, a tawng paha a thaw lum huk huk pawh ka hre thei. Tal chhuah tum chuan ka bei ve bawk a, ka hneh lo kher mai.
Min kuah nghet tawlh tawlh. A chemte chuan ka nghawng a rawn tai takah chuan ka che ngam tawh lo. Jungkook hmel chu thinrim vangin a dur khup khup a, min kuahbettu chu a melh kar bawk. Yoongi lah chu thaza tih hriat zetin a chemte ken lai chu a tuai vir sek a.
Chhuata Tae khur dar dara mu chu a hawisan miah lo bawk. Namjoon pawh tunah chuan a rum chhuak tawh bik lo a, a thla a muang deuh tawhte pawh a ni mahna. Mahse zanin hian alwsam takin kan nunna tih tawpin a awm thei tih chu kan hre tlang vek ang.
