ديلان ، العمر ١٨ سنة طالبة سادس اعدادي اجتماعية ومحبوبة ،
يتيمة امها وابوهاواختها ماتو بحادث سيارة من جان عمرها ٨ سنوات عمها تكفل بتربيتها
مرت عمها جانت حبابة وياها وعمها هم ممقصر عليها بشي
وعدها ولد عم ثنين (محمد وموسى)
موسى متزوج ويشتغل مدرس رياضة ، ومحمد ثاني كلية عصبي، وبنت عم وحده(هند) ارملة وعدها طفلين
ياسر ،العمر ٣٠ سنة ابن شيوخ عصبي الكل يسمع كلامه اكبر اخوته كلمته متصير ثنين يشتغل طيار
____
ديلان: كعدت الصبح بدلت وطلعت صار اسبوعين من بدأ الدوام وطلعت لصديقتي رند ومشينا للمدرسة وصلنا وانتهى الدوام ورجعنه دنحجي اني ورند قبل لنطب للطرف انتبهت اكو سيارات عمامي وولد عمامي كلهم وهوسه بلشارع زلم طابة وطالعة نقبضت روحي رحت اركض من باب الخلفية ويا رند وشفت مرت عمي تلطم وتبجي وهند كاعده وتبجي والجوارين يمنه وبنات عمي والبيت مكلوب واحجي اريد افهم شنو الموضوع محد يجاوبني شفت سارة(بت عمي عمرها ١٢ سنة)
ديلان : سارة شكو شصار
سارة : محمد تعارك ويا واحد وضارب راسة بلرصيف والولد منفجر دماغه ومات
ديلان :نصدمت وكمت ابجي واواسي ب مرت عمي وهي تبجي وتصيح ابني راح ياخذو يكتلو افتهمت ماخذي للمركز وهو هسه مسجون والي كاتله ابن شيوخ وعمامه يردون الدم بالدم لليل خفو الجوارين كاعدين ننتضر اجه عمي وكال عشيرة الولد كوة قبلو نكعد نفصل باجر يجون تحضرو بلكي تنحل وصعدنه كل واحد لغرفته بس محد نام اليل كله نفكر بمصيرنه واحتمال يقتلون عمي واحتمال يحركون البيت واحتمال الدم يوصل للركب نمت بل٣ حسيت بل٥ هوسه البيت ديحضرون علمود الشيوخ الي راح يجون كمت ساعدتهم وكلنا ندعي اليوم يمشي على خير وبدون مشاكل صار بل١١ وصلت السيارات ماكدرت احسب السيارت هواي سيارات سدو الشارع ونزلو مسلحين ومخيفين طبو للاستقبال وقسم راحو
لبيت عمي الي بصفنه لان ميكفي استقبالنا وكعدو يتفاهمون واهل الولد يصيحون ويعيطون وبس يكولون الدم بالدم طلعو الشيوخ وهمه يهددون
دخلنا بعد ماطلعو وعمي كاعد وحاط ايده على راسة وعمامي كاعدين مهمومين وولد عمامي واحد صافن بوجه الخ مرت عمي : خير شصار ابو هند احجي راح يطلعون ابني
عمي (ابو طه): اهدي ام هند جبير العشيرة العم كال نقبل بفصلية لو نكتل الولد
ام هند : يمه عززززة العزززاني راح ابني راح
ابو هند : اسكتتتي ميصير شي عليه راح ننطيهم الفصلية
ابو طه: شنو تنطيهم فصلية ماعدنه بنات كلها صغار واني بناتي جبيرتهن ١٤ سنة ما انطيها علمود خطأ محمد المتهور
ابو هند: ديلان الفصلية
ديلان : شنوووو شنو فصلية
ابو هند : يعني تزوجين واحد من ولدهم
ديلان : ما ماا اتزوج اني اكمل دراسة
عمار( ابن عم ديلان ): ماكو محد ينطي ديلان ديلان اني اريد اخطبها
ابو طه: انجب ننطي اختك احسن
ديلان : يعني بنتك اعز مني اني بنت اخوك تنطيني شنو ذنبي ودخلت لغرفتي ابجي اجتي ورا ساعه مرت عمي تبجي وتتوسل عفية ديلان اقبلي لخاطري ابني راح يضيع مني بس انتي تنقذي
ديلان : عمه اني شنو ذنبي هو غلط اني ليش تدخلوني وتنهون مستقبلي
مرت العم : انتي اذا تروحين فصلية تضلين عايشة بس ابني يموت فدوة اقبلي
ديلان : عمه اروحلج فدوة لتسوون هيج بيه
مرت العم : غصبآ ما عليج تقبلين لعد اخلي ابني يموت احسن
ديلان لزمت ايدها : لا عفية عمه فدوة
دفرت ايدي وطلعت وكعدت ابجي لحد ما نمت ومحسيت على نفسي الا بل٩ الصبح تكعدني هند
هند : كومي دلو يردوج عمامي
نزلت وشفتهم كاعدين
ابو طه : ردينالهم خبر العصر نوديج الهم
ديلان : شنووو ما اقبل ليش تضلموني
ابو عيسى :ماسألناج دنكلج بس
ديلان عفتهم وطلعت ابجي للعصر بل ٣جتي بت عمي سهى
سهى : كومي ديلان بدلي راح ياخذوج
ديلان : مااا مااا ماروح
ابو طه سمعها واجه كفخها👋
ابو طه : صوتج ما اسمعه بدلي عشر دقايق الكاج جاهزة
ديلان : حسبي الله ونعم الوكيل يتيمة هيج تسوون بيه راح اروح بس لان ما اتحمل اعيش ويا ناس ميريدوني اروح اعيش هناك واصير خدامة احسن
ديلان : بدلت واني ابجي لبست عباية اسلامية وشال ماروني وطلعت حتى غراضي ما اخذتهن بس صورة ماما وبابا واختي وطلعت صعدت بلسيارة بدون ما اودع احد واني اباوع من شباك السيارة بنات عمي يبجن عليه وعمار واكف صفح ويشرب جكاير ( جنت معجبة بي بس ماصارحته ابد )
وطلعت وعيوني غركانه بس ابجي عمي ابو طه وابو هند وابن عمي موسى ودوني وصلنه لمنطقة مبينه مال كبارية قصور وبيوت عالية وكفنه كدام باب حديد ونزلو عمامي نزلت وكفت اباوع هذا سجني واني ماعرف شلون راح يكونون اهل هل بيت وشلون يعاملوني طلع رجال جبير بلعمر تقريبا بلستينات سلم على عمامي وورا ٣ ولد تقريبا اعمارهم عشرينات الى ثلاثينات....
يتبع...
