قمر بنت الصعيد

البارت الأول

_وه وه وه انتَ في عقلك يا ولد عمي يا امني يا ضهري في ايه يا نوح اللي عاتقوله ده صوح

بص نوح في الأرض وقال:
وانا قولت ايه غلط اياك عاوزين نستروكي وكله بالحلال حلال ربنا ولا انتي ما تعرفيهوش

_حلال ربنا ، دلوك عرفتوه عاوزيني اتجوز واحد قد جدي وتقولي حلال ربنا

نوح بعصبية:
احنا اللي عندنا خبرناهولك وان مانفذتيش امر ابوي انتي خابره صوح ايه اللي هايوحصل لك يا قمر

سابها ومشي وقعدت في الارض تعيط ..

_شوفت يا بوي قمرك بتتبهدل من بعدك كانهم مالكيني ومالكين روحي ودلوقتي عاوزين يبعوني لواحد قد چدي

لمعت عينيها وهي بتقول :
چدي أكيد مش هايرضي بالظلم ده اكيد هايوقف معايا

لبست طرحتها فوق شعرها الحرير الأسود الطويل وراحت وخبطت علي باب ..

_ادخل

دخلت وهي عيونها مليانة دموع وباست ايد جدها اللي قاعد علي كرسي متحرك وباين عليه الوقار

قمر: كيفك يا چدي وهدان

وهدان: بخير يا بتي ربنا يديمها نعمة ..مالك فيكي ايه

قمر قعدت قصاده بدموع:
دريت يا جدي باللي عاوزه عمي عاوز يجوزني واحد كركوبة

وهدان:
دا عمران بيه من يوم ماشافك وهو هايتهبل عليكي وجه طلب يدك كل شغلنا وحالنا تحت ايديه ولو ماوفقناش بيه هايدمرنا وافقي يا بنتي مش هانتعري قدام الخلق بعد ما كنا اسيادهم ..

وقفت بصدمة:
دا كلامك صوح أقنعوك ! بتدمروني وتدمروا مستقبلي وحياتي عشان الفلوس بتبيعوني لواحد باين انه ماعندهوش نخوة ولا شرف وبيلوي دراعكم من دلوك

حطت ايدها علي دماغها:
ده يعيشني خدامة  وان موتني ماحدش فيكم هايتكلم ولا هايقدر يقف قصاده هي دي وصية ابوي ليك يا جدي دي وصيته !

بص في الارض بخجل:
يا عبيطة كلها سنة ولا تنين ويموت وكل اللي وراه واللي قدامه يبقي بتاعك انتي ودا راجل كبير لو اتدلعتي عليه تاخدي عينيه

وقفت والدموع في عينيها:
قولت ربنا عوضني بيك عن غياب ابوي وسند بيك ضهري لكن دلوك حسيت اد ايه انا ضهري محني من غير ام ولا ابو ولا سند الله يرحمك يا بوي الجوازه دي مش هاتم ولو علي جثتي!

خرجت من أوضته قابلت نوح قدامها بص في الارض بصت له بصه عتاب وطلعت اوضتها

اتنهد نوح بعصبية وراح لأوضه ابوه عثمان..

كان قاعد علي المكتب ...

عثمان: مالك داخل بزعبيبك ليه

نوح: الجوازة دي مش هاتم يا بوي انا طاوعتك بس لاه