همسات لقلبك 🤝♥️

لطف 🤎🦋🥺

رايح يشتري لخطيبته هديه وكان حاطط في جيبه ٥٠٠ جنيه ، كانوا متراهنين مين هيجيب هديه أحلي للتاني
دخل المحل وقعد يدور ع حاجه مختلفه وتكون أحسن من الحاجه اللي هيا هتجبهاله ، بعد نص ساعه خرج من المحل من غير ما يشتري
وقف عند مكتبه قديمه ، لفت نظره نوته صغيره وتصميمها هادي ، أشتري قلم أبيض وقلم دهبي ورجع بيهم البيت
أستربع ع السرير بعد ما قفل الباب ، فتح اول صفحه في النوته وكتب أسمها ونزل سطرين وكتب أسمه ، وبين السطرين كتب بلون مختلف 
"اللهم إجتماعك" ورسم إيدين كأنه بيدعي ، كان شكلهم غريب ، كتب في النوته من تحت
"ملحوظه انا فاشل في الرسم "
وقف عند الشباك وهو بيقلب الصفحه ، كتب في أول سطر
"أسمحيلي اوصفك"
عدي أول وتاني ورقه وهو بيوصف ملامحها وتوترها وطريقه كلامها وضحكتها ، شكلها وهيا متعصبه ، حركات أيدها وهيا بتتكلم ، لما تيجي تعتذر برضاها ولما تعتذر غصب عنها
لاحظ إنه بيقلدها وهو بيكتب فضحك
وصف كل تفصيله فيها حتي طريقه أكلها
قلب للصفحه العاشره وهو مكمل وصف ، قعد ع السرير تاني وميل نفسه ع النوته كأنه طفل بيعمل واجب المدرسه
كتب تلاته وعشرين ورقه وهو بيوصف كل المواقف اللي جمعتهم ببعض ، بص لعدد الورق وقال "أنا حفظت كل حاجه فيكي كأني داخل أمتحان "
قسم النوته نصين وكتب في النص الأخير
"الركن دا في النوته أسمه ركن "العتاب" ، مش مسموح بالبعد ولا مسموح بالفراق مسموح بس بالعتاب ، لما نزعل من بعض هنلجأ للركن دا ، انتي هتكتبي وانا هكتب ، هنعاتب ونشتكي ونتصالح ويمكن نتعاقب بس أهم حاجه ممنوع إننا نتفارق أو نبعد بالأيام"
"جبت معايا قلم أبيض ، دا اللي هنتعاتب بيه ، عارفه أختارته أبيض ليه ، عشان مهما يكون العتاب قاسي هنصفي في الاخر ومهما الخصام يطول هنرجع من تاني"
قلب الصفحه وكتب  "القلم التاني لونه دهبي ، اختارته دهبي عشان كلنا بنجري ورا الدهب ، وأنا جريت وراكي ، لأنك مكسبي الوحيد"
كتب في أخر صفحه للنوته
"دي مش النهايه ، دي بدايه قصه جديده هتبدأ في بيتي"
"إحنا مش محتاجين هدايا ماديه ، يكفي إنها تكون من القلب" 🤎