ابو غريب ضل بالبر يومين ما راجع ..
جانو الولد يعينون امهم بكلشي ..لان ولادته جانت كلشش صعبه
استبطو ابوهم همين ..بس امهم كلتلهم كلبي يكول ابوكم مابيه شي ويرجع وتصير الامور طيبه
رجع ابو غريب من البر ما صايد شي ..مو مثل كل مره
استقبلوه ولده كالعاده من يرجع من البر
شي تنزعه حذائه وشي تساله شسوه ما سوه
وشي تحظرله الحمام جانو ولد مطيعين ومعلمهم ابوهم ع الطيب
اجتي بدريه شايله هديه
وهديه عمره ٣ايام
طفر اخوانه كلهم وعافو ابوهم والتمو ع امهم
صاح بيهم ها ولكم عفتوني
ولد الــ
علمود اختكم مو جاي تعبان
ضحكو وكالو لا ولله بويه بس امنه متخلينه نقربله كلشش ولا نبوسه تكول زغيره ماتتحمل
شال ايده ثنينهن واشر لبدريه
انطينياهه اشيله
اخذه بايده حاضنه وعيونه تهلهل من الدمع
ياربي احفظ ابنيتي يارب خليه النه
هاج هاج اخذيه اني متلف وصخ وتراب ليصير بيه شي ونبتلش
كوموني ولكم للحمام
كوموه ولده وضلوو يتناشبون منو يفرك ابوي
كل واحد يكول اني جانت عليه اخر مره
ويضحكون
وكالعاده ابوهم اختار غريب
...
طلع من الحمام اكله جاهز ..كلشي تمام
وعينه تراقب هديه ها بجت ها غصت ها كعدت ..
كام لا يطلع من البيت ولا يسوي شغله بكاعه وذاب الحمل والشغل ع ولده
وبنفس الوكت ..كللهم الي يترك دراسته اعدمه
والي يجيب درجات ناصيه ينحرم من كلشي
اريدكم مثل ما انتو فالحين بكاعي تفلحون بدراستكم
اني صح تعبان بس اراقبكم من بعيد لبعيد
جان رضا
مايحب الدراسه وغريب صارت ضروف وماخلته يداوم بس البقيه طلعو حيف ذولي الثنين
بس الكل جان ماحاب العيشه بهذا المكان المعزول الي لا صاير بالمدينه ولا صاير قريب ع قريه لو شارع جانو يعانون من هاي الشغله
وجانو يجتهدون بدراستهم ع امل يطلعون من هذا المكان ...ولو فاتحو ابوهم بالموضوع كللهم الي ينجح بدرجات عاليه اخذه يشوف الدنيه وارجعه ...جان هذا دافعهم بالنجاح ..
بس كله ومثقفين ويجيبلهم كتب ويطلعون ويناقشهم بكلشي بالدين والسياسه وبامور ثانيه ويستشيرهم اذا عصه عليه شي بمحصول الكاع لو الزرع تعرض لفد شي ..
الاب سعيد تحسه بلمه ولده وولده راضين بحكم ابوهم عليهم ...
لحد ما فد يوم من الايام رجع رضا من المدرسه قافل ..
وكال اني صارلي سنين بصف ثالث متوسط
بعد دوام ما اداوم ..لان عيروني وكلولي غيرك عبر القارات
يبه احنه هم معزولين وهم تريدنه ننجح ؟؟!!!!
ابو جاوبه: ليش تخليني اغلط عليك واهينك كبال اخوتك وامك حالك من حالهم تره ولله تصير حالك حال غريب
طلع صوت من غريب : ورد ع ابوه
ليش بويه اني شبيه ؟؟
سكت ابوهم : وماحجه شي حس هو سوه غلطه من حجه هيج حجايه وهو ما قاصده
وصعدت الغصه لصدر غريب وحسه ابلعومه
وراح باخر غرفه بالبيت وكعد بيه وماطلع منه
ولا راح للكاع ولا سوه اي شي بذاك اليوم
صاحه ابوه ع العشه ما اجه
وثاني يوم ع الريوك وما اجه
ومن دره الاب انو ابنه زعلان ...وخر صينيه الاكل ..//
وكال: ما اكل وابني زعلان كله من وره رضيو
اني ماقصدت شي تره اني صاير هواي افلت اكوم اصيحله
ديرو بالكم احد ياكل اله اخوكم الجبير يجي ياله
حسين ورضا التوم ما اتحملو كامو يسحبون شوي شوي بالاكل ويتمضحكون
مازن جان كلش هادئ ويراقب من بعيد عل وعسى يجي ابوه وويا غريب
ليث واحمد هم ساكتين لان يعرفون
شخصيه غريب
غريب من النوع الحساس ويتحسس من كلشي ودائما ساكت ..وينفذ الاوامر بكل اريحيه وما يعارض ابوه ..باختصار الابن الاكبر المطيع عكس حسين ورضا التوم صاحبي المشاكل والهوسات
اما مازن الابن الثاني ..وهم رزن وذكي وعده لسان لبق ينفع تاجر 🤣
وامشي كل معاملات كاع ابو من محصول من بذور
ليث ومصطفى واحمد ذولي الثلاثي المرح ينفعون بكلشي خابصين الدنيه بسوالفهم وضحكهم وينصبون ع كل نفر بالعائله
محد سالم منهم الا غريب دومه ساكت ..وتجي ايام ينعزل والكل يعرف هو شنو ومحد يحاول يدخل ..
رضا كام يريد يروح يصنط عليهم شيحجون امه رزلته
وضل الكل يراقب يمته يجي ابوهم
اجه ابوهم لوحده وجان ضايج كال يلا اكلو
ولو التوم مخلصين الصينيه بس ناكل الباقي والله كريم رادت امهم تكوم تحمي الجاي
كال ابوهم ميحتاج
....... ..... ...... ................
ومرت ايامهم عاديه
بس غريب كثر عزلاته ...وضل بس ينام
وقل اكله
بدريه حاولت ع محمود انو يعرض غريب ع دكتور
بس ابوه رفض
وكثر انعزاله للولد
وكله ساكت ومايحجي ..وماعده اي تفاعل ويا احد
لحد ما اجه يوم طب للغرفه ماطلع منه
فتحت امه الغرفه شافته(( شانق روحه ))
شلون وليش ويمته ماتعرف ..
لطمت امه ع خده لطم هستيري وجلبت هديه بذيال امه المذعوره من المنظر ((طبعا هديه هنا عمره سنتين))
وشلون ابنه شانق نفسه بالسكف وشلون ركبته مايله تتحسس اطراف رجليه البارده رادت ترفعه ع امل تنقذه بس ماكو فايده فزعو اخوته
وطفر مازن لان هو ضخم وجثل ونزل اخوه
حسين ورضا وخرو امهم الي تنوح يردون بس يسعفوه يردون يعرفون ليش هيج صار حسين واحمد وليث يفترون بالغرفه مايعرفون شيسوون بعد ما اقتنع مازن اخوه الجبير ميت من زمان شك فانيلته ع اخوه من شكه امه سكتت باوعتلهم ورجعت تلطم ع خده
ركض احمد وليث لابوهم يكلوله ع الي صار وجانو يتعثرون ويبجون
احمد : شنكول لابونه ولك ليث عيني
ليث :نكله مات
احمد: انته جاي تعرف شنو اخونه مات تره هذا مو مقلب
وكع ليث ع الكاع والتراب ولطم بدون وعي
مجاي اصدك ولك احمد اضربني ولك اني بحلم امشينه نرجع لامي بلكي غريب كاعد
جانو ثنينهم بحاله صدمه تصرفاتهم ماتنعرف شيردون يسوون
بس يردون يوصلون لابوهم
ومن وصلو
كلوله
امشينه بويه غريب متخربط
حس محمود من شكلهم ووجوهتهم غريب ما متخربط
ابد
جانن رجليه يتلون اطب وحده بالثانيه ..مره يعثر
ذولي يبجون
لزمهم بالطريق وشبعهم كتل
احجو شبيكم
كلوله غريب شانق روحه
ابوهم وكع من طوله وحط ايده ع راسه
صاح بويه غريب اني صوجي
شيلوني
ولد الـ...
شالوه كوه وصلوه للبيت راح زحف لابنه
كـله غريب چفيتي بالطريق وكعت
اي نفسه الچفيه الي تضحك عليه و تكول لازكه باميري يا بويه ماتوكع من ادنك لو تكوم
اني من دنكت اليوم تلفلفت بالتراب
من عسه التراب يلفني ولا يلفك بويه
يباوع لبدريه
بدريه بغير عالم مشخط وجه ناشف دمعه
كلله بت المصيوب وين جنتي وين جنتي
ماسمع منه جواب
لزمه طلعه بره
طردهم كلهم بره الغرفه كعد وتربع
...
نهايه البارت اتمنه تعجبكم الاحداث
تصويت + تعليق حلو مثلكم
