قـصـص مـن الواقـــــــع

قصص من الواقع .🤍

قصة الاعتراف الأخير

احنه ليش نلبس فستان العرس الابيض ....الابيض؟بالتحديد ؟والكفن ابيض....وكماط الطفل ابيض؟
وليش العروس بجهازها ممنوع أسود ...ليش عود  ها؟

جك...  ضربة وضحكه  عاليه اجتني كفخه على راسي ..فزيت من صفحتي باوعت اختي الي أصغر مني سيما ،تمشي وتتمضحك وتباوع عليه كعدت كبالي وبايدها جبس بتيته ماما مسويته النا بالبيت حاركه البتيته حرك...بس عادي ينأكل...

ايييييه اني اني بثينة مواليد ١٩٩١ من الحله
عندي أخت أسمها سيما مواليدها١٩٩٦
واخ اسمه حسن ١٩٨٧

امي ماجدة

وابوية بهجت...

ماريد اذكر اعمارهم حتى لاتطير البركة ...

منين ابدي...ابدي حكايتي من ٢٠٠٥ ...

بوكتها اعمارنا بهذاك الوقت ....

بثينه الي هيه اني ١٩٩١=١٤ثاني متوسط

سيما:١٩٩٦=١١خامس ابتدائي

حسن:١٩٨٧=١٨ طالب كلية ....

بشهر ل١١ ،٢٠٠٥ جان أبواب شتاء ...وبالنصف الاول من السنه الدراسية ...جنت صف ثاني متوسط  هستوني داخله سن المراهقة وبالغة وكلشي غريب ..وكلشي يمر كدامي افكر بي حتى مرات افسر نظرات الشخص الي يمر من يمي أعجاب ومستحيل وحده مامرت هيج ومستحيل تنسى هيج فترة بحياتها....بس ؟

بس المشكلة وين تكمن بالصوندة وحديدة البوري المكسور الي تتكسر على عظامي من قبل أبوي بهجت بسبب حسن وطلايبة

ابوي شخص انفعالي وعصبي الى درجه من يعصب ميشوف شي كدام عينه بس يعتبرنه كان احنه حيوانات ودك كتل لحد ما امي تدك وتلطم وتملخ نفسها يله يعوفنه ....

ابويه الي هو بهجت رافع خشم حسن ...حسن عنده الكل بالكل لان الكبير ...حسن من يرجع من الدوام ومالاكي الاكل يخبص الدنيا حتى ويه امي يتعارك بس يرجع يعتذر وكان كلشي ماكو ...

بيوم من الايام...ومثل كل يوم معتاد عندي وعند كل البشر ....اساسا احنه عباره عن نسخ متشابهه ووكل نسخه الها نمط حياه خاص ....

بهذاك اليوم جنت نايمه الساعه ٦ونص بالتحديد....غرفتي اني وسما ننام سوة ....٦ونصف بالدقيقة نهجمت باب الغرفه علينا من الصباحبات مالرب العالمين حسن يصيح وين حذائي....لج بثينة كووومي
فتحت عيوني باوعت بوجهه حصلت كفخه
صحت بصوت عالي "

_بثينه:اهوووووووو

اجت امي تركض وتكول:

امي(ماجدة):شكو شبيكم ...

حسين:هالحيوانه نايمه حذائي وين

بثينه:تدري ليش هالغلط ليش شمدريني وين انت تجي للبيت تشمر بغراضك....