(رقه)بقلمي:آيه الخواجه

البارت الاول من (رقه) بقلمي آيه الخواجه

المرايه هي سر الحكايه ومن يوم حادثه الغرق واللغز بدا يتفك حته حته والنهارده كانت آخر حته في الحكايه بس طبعا عشان تعرفوا الحكايه لازم نعرفكوا بنفسي من الاول خالص
اني ( رقه)
اسم غريب مش كدة
استنوا الاغرب لسه جاي
الحقيقه اني مش عارفه امي شافت فيا إيه لما بصتلي اول مااتولدت عشان تسميني كدة اصل امي هي اللي سميتني واصرت علي الاسم ده وابويا عشان بيحبها مارضيش يزعلها واتكتبت في شهادة الميلاد رقه وطبعا ده كان في شهادة الميلاد وبس اصلي ماخدتش من اسمي حاجه خالص برغم اني المفروض حلوة ومن اسكندريه والمعروف عن بنات اسكندريه انهم من اكتر البنات رقه ودلع وجمال بس انا لا كان عندي رقه ولا بعرف اتدلع اصل هكون كدة ازاي واني ابويا الحاج (حسين)كان مسميني( رزق) اه والله زي مابقولكوا كدة طول النهار روح ياواد يارزق تعالي يا واد يارزق كنت دراع ابويا في كل حاجه ومايستغناش عني ابدا طبعا عاوزين تعرفوا ابويا ليه سماني كدة وليه بيتعامل معايا علي اني واد مش بت اني هنقولكم
اصل ابويا كان نفسه يخلف واد يشيل اسمه ويساعده علي المركب بتاعه في صيد السمك ولسؤء حظه اني جيت بت لا وايه ؟
جيت بعد شوقه ٠٠٠٠٠٠٠٠
اصل ابويا وامي فضلوا ١٢ سنه مايخلفوش لفوا علي طوب الارض ماخلوش ولا دكاترة ولا حتي مشايخ اصلهم كانوا فاكرين ان معمولهم عمل ولاد الحلال ضحكوا عليهم وفهموهم كدا خصوصا بعد مالفوا علي دكاترة وجه بحري كله وبعد مانزلوا القاهرة كمان وكل الدكاترة أجمعوا ان ماعندهمش عيب يمنعهم من الخلفه وأنهم كويسين جدا المشكله في عدم توافق أجسامهم يعني لو ابويا اتجوز غير امي يخلف عادي ولو امي كمان اتطلقت من ابويا واتجوزت تخلف عادي فولاد الحلال قالولهم انهم ماسمعوش عن حاجه كدة قبل كدة وان ده اكيد عمل وفضلوا يلفوا علي كل الشيوخ في الصعيد والشرقية والزقازيق والمنوفيه لفوا محافظات مصر كلها علي امل يفكوا العمل ويخلفوا حته عيل
لكن للأسف فضلوا ٧ سنين ع الحال ده لحد ماامي قالت لابويا يتجوز عليها وهي راضيه عشان يخلف العيل اللي نفسه فيه ومارضيتش تتطلق منه وتخلف هيا كمان من كتر حبها في ابويا وطبعا ابويا رفض عرض امي وخدها في حضنه وقالها يا نعمه اني مانقدرش نقرب من ست غيرك انت حبيبتي وبنتي وكل اهلي واني مش عاوز من الدنيا غيرك وراضي والله كفايه أن ربنا يباركلي فيكي يا نعمتي اصل ابويا وامي كانوا روحهم في بعض ومتجوزين عن حب ومش اي حب دي قصه حبهم كات مسمعه في وجه بحري تما ورضيوا بنصيبهم وبطلوا يلفوا ولا علي دكاترة ولا علي شيوخ وفضل الحال علي كدة لحد ماجيت بعدها بخمس سنين من غير دكاترة ولا شيوخ بقدرة ربنا سبحانه وتعالي امي كانت فرحانه بيا اوي وابويا كمان بس هو كان نفسه اني اكون واد بس كان لما بيشوف الفرحه في عين امي وهي واخداني في حضنها وبتلاعبني يقول لنفسه ياواد وانت كنت طايل ضافر عيل احمد ربك ع النعمه لا تزول من وشك يا جاحد النعمه انت وكفايه فرحه نعمه وفضلت الحياه هاديه وجميله لحد ما جه ابويا في يوم وانا عندي ٧ سنين وقال لأمي كفايه دلع في البت اني عاوزها تطلع بت جدعه زي امها و١٠٠ راجل اني بنفكر ناخدها معايا ع المركب امي وقتها خافت وفضلت تتحايل علي ابويا وتقوله دي عيله وبعدين ايه اللي يفهمها في شغله الصيد والمركب قالها اني ابوها يا نعمه ونخاف عليها زيك كل الحكايه اني عاوزها تنشف وتطلع بت جدعه ولا اني ماليش حق في بنتي يا نعمه ؟
قالتله يا حسين اني مانقصدش اللي فهمته اني بس خايفه تتشغل عن البت تتخبط في حاجه ولا تتعور حقك عليا يا حبيبي اني هنغيرلها هدومها عشان تنزل معاك بس ماتتاخرش علي الغدا زي عادتك هعملكوا غدوة حلوة وقامت جهزتني ونزلت فعلا مع ابويا بس اللي حصل وقتها كان شئ مرعب ومالوش تفسير لحد اللحظه دي وهنا خلص البارت الاول من ( رقه )لو عجبكوا البارت الاول ادعموني بلايك وكومنت واستنوا البارت التاني من ( رقه) بقلمي: آيه الخواجه