#خلف_الشناشيل_حكاية_2
من كتابات نور ام مصطفى
حـ❤ـلَقـ❤ـةّ 2
)اذا يطلع البارت مكطم مكرر عبارات او احرف مبتورة مكررة ناقصة صوج الواتباد حذفو القصة من مكتبة وعيدو تحميلها وتتحدث مرة ثانية وتثير طبيعي وكاملة)
......نبدأ
شفت الوادم ملتمه يم بابنا و مصايح
-سيد عبد الرحمن ابو عبد الله لا تدخل لا تدخل البيت يحترك لا تدخل..
جان يوم اربعاء شهر اب يصادف 11
بالشهر..من عام 1948
وكفت وانة اشوف بيبي بالشارع وتلطم وهي تصيح
-حركت روحها هي وفروخها يمة عبد الله يمة فضة خايبة ام عبد الله شرايحلج وهيج تسوين.
حاجيت بيبي واني اشهك و امسح بعكس ايدي وجهي
ومرهوب واتراجف واحس بلشتي مغص ورجيف من الخرعة وما اعرف امي جوة هي واختي لو بس البيت احترك...
-بيبي امي واختي جوة..؟
شافتني شبكتني
-يمة وليدي.
دفعتها ورحت هديت اريد ادخل اطلع امي واختي جان الهول بس دخان والي، يحترك المطبخ..
موجة دخان معباية برماد حسيته بوجهي و يخنك ريتي و طعم الضخام وي ريحة اللحم المشوي حسيت بحلكي وطعمه قتل اخر امل الي
اتنشق اريد هوا نظيف تعبي ريتي رماد ما تبقى من ذرات علوية جانت اسمها امي هيلة...
حرارة الممر حسيتة يصهر برجلي الي ما يغطيها الا حذاء ابو نيوة لاستيك..
شمرتة من رجلي وتحزمت اريد ادخل اكثر وي اصوات المنقذين الي يتدافعون يصايحون اسم ابوية
-بشر مولاي عبد الرحمن ابو عبد الله بشر لكيت المرة و جهالها خاف طالعة مو بالبيت
والي يدعي وياه
-بلكت المرة والجهال مو بالبيت وطالعة بشغلة...يا رب بجاه داحي خيبر عندك تحضر العلوية و جهالها
والي برة مصايح نسوان وبجي
-يبووو العلوية هيلة احتركت وي فروخها يبوو راحت المرة تفرهدت هي والجهال..
ادور بظلام الدخان قريب الممر خيال الرجال ظلام مينشافون كد الدخان قوي وخانق
عيوني كمت كوة اشوف وتهمل بالدمع(لحرقة الرماد بالعين تسيل دموع مع حرقة )
صوت ابوية يبجي وهو يريد يوصل للمطبخ وكاضيه لان المطبخ بعدة مشتعل بالنار
-بردا وسلاما هيلة ام عبد وينج لا تكولين بالمطبخ يوبة انت والجهال وينج اجيتكم يهيلة
"قلنا يا نار كوني بردا وسلاما على ابراهيم"
ظليت بصوت ابوي اتلمس طريقي مو بالحيطان الحيطان حارة.. اخاف تجويني زغيرون مو بيدي و ما اكدر ادور بطولات بس الام عزيزة لاجلها كلت انطي الروح.. لو اصير رفات
أنت تقرأ
خلف الشناشيل حكاية 1
Historical Fictionخلف الشناشيل حكايه 1 قصه طويله جداً ... قسم الاجيال فئة رومانسية تأريخيه اجتماعية قصة احب ان اكتبها بأدق التفاصيل بحدث عادي او مهم او حتى تافه لما فيها من عبر ...حتى بين السطور ان لم تفهم بين السطور كتاباتي الافضل الا تقرأ لي فتأتي بتعلق سطحي
