ورود في ارض الطغيان

مشهد

"ورود في ارض الطغيان "
لـ نــور حيـدر ✨🕊...

تعبانين..
بلوه احنه ابتلينه من انخلقنه بطين
كلشي بينه ما مرتاح.
حتى دموعنه تزاعلت وي العين
ملت من بجيه وظيم الأيام
وفوك همومنه انحطت نياشين
قطار الحزن مرنه بسجه من دم
عشكنه كبور اهلنه ولذت الموت
ومن وجوهنه يعرفونه ميتين 🥀✨...

————————————————-
(الـمـشهد الاول)

طلعت من الحمام ماكدر امشي من الم ظهري احسه متكسر
رحت وكفت كبال المراية بقيت صافنه على نفسي ماكو شي صاحي بوجهي
خليت ايدي على خدي عطت من الوجع اي مكان اخلي ايدي بيه اصرخ منه..

ما بقالي مكان سليم اباوع على وجهي اكو ضربه جوه شفتي صايره لونه
ازرك اخذت المشط و أيدي ترجف

خليت المشط على شعري اريد امشطه صارلي فترة ما مشطته و احسهن متشابكات بعدني بس خليته على راسي ذبيت المشط كبل ..

غمضت عيني من الالم حتى راسي ماكدر الزمه وامشط شعري
احسه يموتني احس احد يعت بيه ..

دمعت عيني واني كاعد اشوف روحي ذبلانه مهزوزه شكلي متغير يكول وحده عجوز جسمي كله زراك صاير من الضرب وجهي هم ..

كعدت بلكااع ودموعي تنزل وادعي الله ياخذني واخلص من هذا العذاب
همست : دخيلك يارب خلصني منه لو اموت لو اطلع من هذا السجن
بعد ما اتحمل تعبت ..

اجاني صوته : مراح اطلعين منا الا واني ميت

رغم وجعي بس قاومت و كتله بأخر قوه بقت عندي
: يجي يوم  و اغرز السجينة بصدرك و اخلص من شرك هذا ..

أبتسم على كلامي و كال : خير ان شاء الله ..

عرفته كاعد يستهزء بكلامي بس اني صدك حجيته اريد اتخلص منه و من شره..

***************
***************
(المشهد الـثـانـي)

رحت طلعت اركض اريد انهزم صار عندي امل اطلع
شردت بروحي واني اكول يلا هاانت وصلنه راح نطلع يروحي ونخلص من كلشي ..

امشي حافية  واركض ما اشوف شي كدام بس سواد
وهيج خيط امل انو اطلع من السجن ما احس الا واكعه
تعثرت بحجارة وكعت احس ركبي تزلغت غمضت عيني بألم
بس مع هذا ما اهتميت حجيت وي نفسي توجعتي هواي هذا قليل بلنسبة الج اتحملي..

وصلت يم الباب ابتسمت كلت يالله هاهيه خلص
مديت أيدي اريد افتح الباب ماحس الا صار كبالي لزم أيدي و يجر بيه يرجعني لسجني ..

امشي وياه بدون روح مصدومة هستوني ردت اتحرر هستوني حسيت نفسي طير ورجعله جنحانه وهسه رجع سجاني وكص جناحي ورجعني لقفصه المظلم
دخلت للبيت وشمرني بلكاع ..

كتف أيده وكال بحدة : شحسبالج بوية اني غشيم واخليج وحدج بلبيت
حتى تنهزمين و لا عبالج هيج صارت عليج سهله طلعتج ترى اني خليت كل البوب مفتحه ردت اشوف شتسوين وجانت ابالي انو راح تفكرين تنهزمين كلت خل اشوف شتسوي..

باوعتله بصدمه و بحقد كتله : يعني انت الي فرغت المكان وخليت الباب مفتوح ردت تعيشني بأمل انو هاهيه راح اخلص من ظلمك وسجنك وخليتني افرح لدقايق بعدين رجعتني لقبرك ..

بقه ساكت ما حجه شي اني كمت ماشوف شي حسيته ظلمت بعيني
كمت بسرعه ورحت عليه بقيت اضرب على صدره ودموعي تنزل
اضرب بكل قوتي كتله : ليييشش هيج سويت ليش خليتني اعيش بأمل
ورجعتني لو مبقيني تحت سجنك ولا هيج حرام عليك الله ياخذك الله ينتقم منك ..

طوقني بأثنين اديه وحضني ثبتني يريدني اسكت صااح بوجهي :
كااافي اهددي بسج عااد ..

صرخت بألم : الله ياخذك اكرهك ..

انتهى...
ملاحظة/ قصة حقيقية مأخوذة من الواقع من قبل بعض الابطال من داخل احد المنازل العراقية✨..
نزلو اتمنى الدعم++ انشره من بعد قصة (مكاتيب العشك) لان ان شاءالله راح ابدي بنشر و اكمل مكاتيب العشك 💙..

الغلاف الجديد للقصه تصميمي