✍Poésies Bleues💙

Ou manke m [En créole]

Kè m kouri kou flach nan swiv vwa w

Vwa w se tankou lè zeklè ap mache sou nyaj yo

Anvan chak mo w antre nan zorèy mwen, yo pase nan chè m

E chak fwa w di m ou renmen m,
Se tankou yon eksplozyon klorat ki fèt nan kè m

Gen fèt nan kè m, lè limaj ou pran koule nan panse m

Lanmou tòtòy mwen, li soule ata zo m
Ou menm fwinen nan fantas mwen

Nan panse m, m panse m t ap ka panse, m pan!

Men m pran

Men m pran ekri pou jete lèt nan kandelam

Men santiman m pou ou kontinye bay gwo boulèt nan " camp de l'âme "

Nan chanje zam, m tante tèt mwen

Men w toujou ap ante tèt mwen

M ap mande tèt mwen:

Pouki l ret la menm si l pa la?

Pouki l manke m tankou l se ke m?

Pouki se bò l m vle sere m?

Lanmou an ret tou vèt li paka sèch

Lè vwa w mouye m, m paka sèch

Andan m ap konsonmen tankou yon manje ki toufe

M tou fe e m tou febli

Kilè w ap konprann ou se bonè m, bonè nè m

M pa ka asepte linezistans ou pandan m konnen w egziste

M menm ezite pou m reziste ak dezi m

Men w se ren, men m

M vle w renmen m b

San ou m ap santi m demanbre

Monic'Art