#أحببته_بلا_حدود (( قسمة ونصيب ))
« التمهيد، مع الجزء الأول»
كتابة أم أمـن 🌸,
******************
كان يوم دراسي متعب وشاق خشت سيارتنا الشارع وقتها كنت مروحة مع خويا زياد وقفت السيارة قدام الحوش ونزلنا منها كان في سيارة واقفة مقابل حوش جيرانا الي باعو وطلعوا في بداية أحداث بنغازي 2014
زياد بحت فيا : منو هذوم ؟
انا هزيت كتافي : نعرفش بالك جيرانا الجدد.
بحت زياد في الراجل الي نزل والتفت بحت فيا لقاني نشوفله دفني من عند كتفي : تي خشي يرا ف شن قاعده اتبحتي.
وفتح الباب وخشيت نا وياه : على فكره منبحتش بس نعرف من.
زياد : يرا ازح احترميني قاعده تشوفي لراجل قدامي 😑.
نا حطيت يدي على كتفه : زيادي.
ضحك زياد : ايوه ايوه اضحكي عليا بالاسم هذا .
طبعاً زياد هذا خوي الوسطي وهذا غير خوتي كلهم هذا مربيني ونحس انه اقرب ليا حتى من بابا والله لدرجة يقولي لما نجيب بنت من كبدي مش ح تجي ف غلاوتك انتِ بنت روحي ، جوي نا وياه ديما فري والله وبالله نبات ززعلانه من اي حد الا هو خيي الغالي ❤️ .
خشينا لقينا بابا مقعمز في الصاله ويقرا في جريدة : السلام عليكم
طلقت عليه نا وزياد السلام بابا ابتسم وبحت فيا : وعليكم السلام ورحمة الله
نا سلحت وشاحي وحطيته على كتوفي : ماما وين ؟
بابا : امك مبدري شوية مشت لـ خالتك حليمة.
نا : اها.
طبعاً بعد اسالة كـ العادة من بابا على الجامعة والدراسة ، اتجهت للمطبخ لقيت صبايا خوتي الثلاثه سهام وايه ونجاح
نجاح مرات خوي فتحي عنده صيدلية...وسهام مرات خوي بلال دكتور في الجامعه قرى اقتصاد....واية مرات خوي علي الله يرحمه اصغر واحد توفى في حادث زمان 💔 .
نا : شن الجو بنات ؟
سهام : الحمدلله يا نور شن جو الجامعه
نا قعمزت ع الطاولة : ظغط امتحانات كيف العادة.
ابتسمت ايه : شدي الهمه يا دكتورة اهو الطب.
نجاح : يا نعليا متخطرن عليا بكل ايام فتحي خوك خاطبني ويقرا في الصيدلة كنت كل ما نكلمه وين يا طالع من امتحان يا نقرا للامتحان يا بكرا امتحان يا نرجى ف نتيجة الامتحان 🤣.
نا ضحكت : صار تكلمي فيه وهو كان سوسة 😂.
نجاح : هيي احترمي نفسك الا قورة عيني ايوااااه.
أنت تقرأ
#أحببته_بلا_حدود
Romanceقصة مقتبسة من واقع ليبي مع إضفاء اللمسة الخياليه ❤ علاقة الحب التي تجمع بينهما فريدة ومميزة❤ قصة رومنسيه خفيفه بقلم أم أمن
