باسطة بالغصب

(3)

انا وشروق بقينا مخلوعيين.. طبعا كنا قاعدين ف الارض.. عاينت فوقي لقيت امي وكانت غضبااانه.. شروق بقت تحاول تكتم الضحكة.. حمرت ليها.. امي قالت لي م لقيتك في البيت عرفتك قاعده هنا.. لكن برودك وتبلد مشاعرك د حدو ويين؟؟ م ممكن اخوانك مختفين ليهم كم ساعة وانت ولا على بالك! قلت ليها ماما اناا قالت لي اسكتي يا عديمة المشاعر يعني حتى تلفون غلبك ترفعيهو ليهم؟ رصيدك د بس مكملاهو في النت والمصايب! قلت ليها اسف.. قالت لي الاسف م بنفع اسه.. قلت ليها م ضربتي ليهم؟ قالت لي ضربت وقالو مشو عفراء عشان فيهو مكيف وكهرباء.. انا وشروق في نفس اللحظة قلنا م ساقوناااااااا معاهم.. امي عاينت لي من فوق لتحت قالت لي اسه د همكم؟ شروق قالت ليهاا يا مزدلفة اولادك ديل بالغو عاد يعني خالننا في السخانه د! قالت ليها لو كنتي وافقتي تعرسي رامي اسه كان ساقك معاهو.. قالت لييها رامي عمرو 28 انا شافعه وعمري 16.. قالت ليها غايتوو المهم اسه قالو راجعين لانو زهجو من المول اي شي عملوهو تزلج وسينما واكل وتحلية وشراب وجابو اولاد رغده دخلوهم الالعاب واتسوقو لما الله غفر ليهم تاني شنو!! شروق قالت ليها حتى رغده غشوها وساقوها معاهم! انا ورزان م عافين ليهم! انا قلت لامي الكهرباء لسه م جات لكن يادوب ليها 5 ساعات من قطعت! قالت لي خلاص قالو زهجو وجايين وجايه رغده معاهم.. قلت يااا الله البت د اسه مش كانت معانا امبارح هي وشفعها ديل! تاني شنو! وكمان في الكهرباء القاطعه! يا الله الصبر يا الله! شروق قالت رزان معاها حق د شنو د كل يوم ناطين هي وشفعها وقاضين على الاخضر واليابس.. امي حمرت لينا وقالت انا شايفه اخير تسكتو.. زينب جات داخله وهي بتضحك قالت خلاص شاكلتيهم قليلات الادب ديل؟ امي قالت ليها ااي زينب قالت ليها تعالي نشرب الجبنه ونتونس.. قالت ليها والله اتغدينا عند ناس التايه طبعا كلنا وشربنا الجبنه لكن م مشكله نشربها تاني! بس فقدناك في لمة التايه والله قالت ليها عندي غسييل كتير قلت انتهز فرصة الكهرباء قاطعة وماف موضوع اغسل! قالت ليها كلنا عندنا غسيل بس الكان تفرقي على روحك شويه بالونسه ومكيفهم البارد د.. قالت ليها المرة الجاية ان شاء الله اصلهم بعملو اللمة د كل يوم كلما الكهرباء تقطع.. امي قالت ليها على قولك والله.. ومشو مع بعض وانقطع صوتهم!! المغرب قرب يأذن قلت لروحي وااي م صليت الضهر ولا العصر! تاني اتزكرت جاتني الدورة قبيل.. شروق قالت هي برضو عندها ف يبقى الاتنين بدون صلاة! المهم كملنا طقتنا وشلنا اكلنا وديناهو المطبخ رجعنا نتونس بس نطينا بنهرة من زينب قالت لينا قومن غسلن عدة اكلكن د! بقينا انا وشروق الاتنين نتشاكل انا بقول ليها انت تغسلي وهي تقول لي انت تغسلي.. في النهايه زينب شاكلتنا وقالت لينا انتن الاتنين تغسلن والكلام انتهى! فعلا مشينا غسلنا الاتنين مع بعض وجينا راجعين كملنا ونستنا.. بس في صوت شاحنه او حاجه ضخخخمه بتتحرك كان في الشارع.. لبست توبي وشروق لبست توبها وطلعنا.. لما طلعنا لقينا امهاتنا برضو طلعو والحلة كلها طالعه واقفه تتفرج! كان في عريبة زرقاء فخمة ماشه في الشارع براااحة ووراها شاحنة كبييرة فيها عفش كتيير وفخم ماشاءالله تبارك الله! شويه العربية وقفت في بيت جمبنا! اي م جمبنا ملاصقنا لكن المهم بعدنا بكم بيت بس! د كان بيت صحبتنا انا وشروق قبل ما ترحل هي وعائلتها بسبب ظروف شغل ابوها!! ف المهم من الوقت داك البيت بقى فاضي! ف اسه من المتوقع انو ديل ناس جايين يسكنو في البيت د! لكن د م الغريب في الموضوع.. الغريب انو حلتنا حلة اقل من عادية في البساطة.. والناس ديل شكلهم ناس غنيين وكدا يعني نوع الناس الي مفروض يسكنو فكافوري! شنو البجيبهم حلة شينة زي حلتنا؟؟ المهم كدي نتابع ونشوف.. نزلو 4 انفار من العربية!! ام وابو.. وطفلين.. سامعه زينب بتقول لأمي التوب اللابساهو المرة د براهو سعرو اغلى من سعر دواليبنا كلنا مجموعة سوا!! الناس فتحو باب الشارع ودخلو وشكلهم عندهم المفاتيح.. شكلهم اجروهو من المالك! المهم هم دخلو جوا واختفى اثرهم والحلة كلها متاوقه ومادة راسها وشويه وتدخل معاهم!! وهم طبعا م اشتغلو بولا زول من الناس الواقفين يتفرجو فيهم ولا من الزحمة البتتفرج فيهم ولا أي شي! بعديها نسوان الحلة ومن ضمنهم امي وزينب كلهم عملو دائرة وبقن يتوسوسن.. انا وشروق دخلنا جوا وكملنا شغلتنا!! قلت ليها عايني ي هنايه انا اشتقت لجوالي والباور بانك بكون زاتو كمّل ماشه اشوف جوالي وجايه.. قالت لي طيب اطلعي بالبـ.. قبل م تكمل جملتها كنت تلبت بالحيطة ولقيت روحي ف حوشنا.. فجأة حسيت بجوطة وكركبة كدا اتلفت لقيت باب الشارع اتفتح واخواني كلهم جو داخلين!! ومعاهم رياض ومرتو وبتو!! سلمت عليهم ودخلت جوا شلت جوالي لقيتو شحن كم وتسعين.. فتحت البيانات وبقيت بتصفح وكذا فجأة من حيث لا ادري جا ايان ولد رغده اختي وبقى بمعط لي في شعري.. زحيتو بعد تعب وصريخ شلتو ختيتو في كنبة الصالة وجريت سرعة قفلت باب الغرفه بالمفتاح! جو اخواتي كلهم بقو يخبطو لي قالو لي على فكرة د م غرفتك براك افتحي عايزين نغير! قلت ليهم قبيل طلعتو من غير م تغيرو كيف! قالو لي هدومنا طالعه من الغسيل قاعده فالغرفه التانيه وكانت هدوم سمحه وحقت مرقه.. قلت ليهم طيب ببرود.. ربا كوركت فيني قالت لي شنو طيب افتحي الزفت د ميتينك زاتو! قلت ليها الشتيمه حرام قالت استغفرالله.. رنا قالت لي افتحي.. قلت ليهم اوووف وفتحت الباب.. اول ما فتحت ايان جا جاري ومعاهو ايريم واليان وايلا وكلهم نطو فيني واستلموني عضعيض وقريص وخربيش وضريب وبقو ينططو فيني عديل.. وانا راقده ف الواطه وهم ماسكني الاربعه م قادرة اتحرك!! بقيت بصرررخ واخواتي ضحكو فيني شويه وبعدها كل واحدة شالت غيارها وبقو يدخلو الحمام بالدور! وانا بكووورك وبستنجدهم وايان ماسك شعري ويمعططط وانا اصرخخ مف زول حاول يساعدني.. بقيت بصرخ قلت رزازززز رزة انا مش بستك؟ يا رزتي نسيتي انو انا your favourite sister؟ قالت لي م ناسيه ليك شكلة قبيل وقفلتك للاوضه فينا! قلت ليها يلا قلبك اسود انا زاتي م دايرة منك مساعدة.. قالت لي تمام ورجعت تعاين في تلفونها.. ايلا طلعت في بطني وبقت تنطط انا هنا بقيت بصررخ باعلى م عندي ورزاز قالت لي خلاص اسكتي فضحتينا! وجات ساعدتني وشالت الشفع مني وشغلت ليهم سبونج بوب في تاب استبرق!! استبرق جات قالت لااا تابي.. رزاز قالت ليها فتحت فيهو نت وشغلت اسبونج بوب.. استبرق قالت ليها فتحتي فيهو نت؟ ياااي شكرا.. وجات باستها.. رزاز قالت ليها يلا امشي احضري معاهم سبونج بوب!! وفعلا استبرق مشت!! رزاز عاينت لي بنظرة قرف (استهبال طبعا) وقالت لي انقذتك بس عشان م تعملي لينا فضيحة في الجيران.. يلا هنا انا اتفقعت ضحك بصوت عااالي قلت ليها شنووو؟؟ انا كل يوم فاضحاكم مع الجيران لما عرفو واسه بكونو سمعو الصريخ د لكن م عملو شي عشان عارفين انو ديل اولاد اختك مجننني! في اللحظة د ربا طلعت من الحمام قامت رزاز طوالي قامت وخشت هي!! بعدها حتستحمى رنا وبعدها استبرق وكدا يكونو استحمو كلهم عدا رغده الي شكلها استحمت في بيتها! مشيت لرغده قلت ليها اسه فزول بخلي الكهرباء قااعدة ويجي يقعد في الكهرباء القاطعه؟ قالت لي الكهرباء قاطعه عندنا برضو! قلت ليها مش خطكم كان عكس خطنا؟! قالت لي عندنا عطل.. (طبعا الغرفه الي بنوم فيها او الي كنتو فاكرنها غرفتي هي م غرفتي براي!! هي غرفه فيها ستة سراير لي انا ورزاز ورنا وربا واستبرق والسرير السادس حق رغده قبل ما تعرس!! ف الغرفه د م حقتي براي لكن خسااسه مني بقفلها بالمفتاح).. المهم كنا قاعدين ف الغرفه رنا قاعدة ف سريرها الملصق في الحيطة ومنطويه على نفسها ومركزة في الجوال رغده قاعدة فطرف السرير بترضع في بتها اليان الي قبل شويه كانت بتحضر سبونج بوب!! ايلا وايان وايريم واستبرق راقدين في الارض على بطونهم وعاملين شكل حلقة والتاب في نصهم شغال فيهو سبونج بوب! انا راقدة في الارض وخاته راسي ف مخدة وبتصفح فالجوال.. ربا بتتمسح ورزاز بتستحمى!! فجأة كدا جات داخله شروق وبتردح باعلى صوت عندها تقريبا الحلة السابعة سمعت رديحها.. جات ناطه فيني وعاتبتني عشان م جيتها راجعه.. بقينا نتصور سوا وفي عز تصويرنا داك سمعنا صوت امي! شكلها جات راجعه من المكان المجهول المشت ليهو هي ونسوان الحلة.. سمعت امي بتقول اتفضلي اتفضلي.. ايريم بفضول قامت فتحت الباب وطلعت على مصدر الصوت!! من فتحة الباب شفت نفس المرة بتاعة جبيل الكانت لابسه التوب السمح داك! المهم امي اصلا بطبعها لما تتكلم صوتها عالي يعني ونستها بتسمعها الدول المجاورة! رغده قالت لي اقفلي الباب د ي رزان سريع.. قبل م اقفلو ايلا وايان طلعو رغده بقت تكورك ليهم.. اليان قامت منها وطلعت وراهم كلهم مشو.. سمعت مرة بتقول ماشاءالله ديل احفادك؟! قالت ليهاا ااي اسه بعرفك عليهم زول زول وبتعرفي كلل شي.. المرة قالت ليها بلهجة مدلعة م فهمت؟! قالت ليها اسه د بتفهمي حبيبتي.. رغده همست لي بغيظ قالت لي رزااان اقفلي الباب د.. قلت ليها اسه اولادك بجو يفتحوهو تاني.. قطع كلامنا الشفع الجو داخلين بعد م عملو جولة استكشافية في الصالة ورجعو عشان يكملو سبونج بوب! عادة بستكشفو كويس بس المرة د لهفتهم لسبونج بوب غلبتهم!! واستبرق كانت في انتظارهم!! رغده قالت لي يلا اهو جو اقفلي الباب.. قمت قفلتو.. بس لسه سامعين اصواتهم.. امي قالت ليها انا مزدلفة وراجلي اسمو الفاتح شغال سواق بص سفري يعني بغيب بالايام!! اولادي البكر توأم ربا ورامي عمرهم 28 سنة خريجين ادارة اعمال!! زمان ربا عندها صحبتها شدييييد زي اختها عديل اسمها استبرق!! رامي وربا واستبرق وقعو في شلة سوء علمتهم المخدرات! بقو مدمنين ووصلو مراحل بعيدة ورامي وربا دخلو المصحة واستبرق اتوفت باوفر دوس!! ومن الوقت داك وربا بتي نفسياتها م تمام حتى بعد م طلعت من المصحة كانت م تمام لانو استبرق كانت جزء من روحها وهي فقدت الجزء من روحها د!! ربا ورامي رجعو الجامعة بعد م جمدو بسبب المصحة وكملو واتخرجو!! رامي بقى عاطل ودخل في كومة من الاحباط وبقى يقضي يومو كلو من غير فائدة ومنعزل و م عندو اصحاب!! ربا اتعينت موظفة في شركة صغيرة ومع الوقت قدرت توفر مبلغ كويس اشترت بيهو سيارة بسيطة!! لكن ياها نفس حالة رامي مكتئبة ومحطمة داخليا و م عندها صحبات ولا اي زول ياها بس عايشه وحيدة حتى هظارها وضحكها معانا د م من قلبها! بعد التوائم ديل عندي بنتي رغده عمرها 25 سنة صيدلانية ومتزوجة ليها 5 سنوات زوله ماشاءالله ظرييفة ودمها خفيف عندها بنت اسمها ايريم عمرها 4 سنوات وولد اسمو ايان عمرو 3 سنوات وبنت اسمها اليان عمرها سنتين ماشاءالله! بعدها رياض ولدي عمرو 24 سنة ماشاءالله ساكن في شقة في الرياض (د حاجه واو بالنسبة لينا ولظروفنا وللحتة الساكنين فيها) مع مرتو وبتو اسمها ايلا ياداب عمرها سنة!! بعدها عندي رائد عمرو 22 سنة مع التقفيلات وكدا يادوب خريج السنة د ان شاء الله من طب اسنان.. بعدها رزاز عمرها 21 سنة ماخدة خفة الدم والظرافة من رغده!! الاتنين بحبو الهظار والفرفشه!! المهم رزاز د خريجة اعلام ياداب اتخرجت اسه و م لحقت تقضي الخدمه بسبب التقفيلات لكن ان شاء الله حتبدا قريب.. بعدها رنا عمرها 19 سنة بتقرا معمار المستوى التالت!! زوله منطويه شويه كدي لكن المهم!! بعدها رزان عمرها 16 قربت تقفل ال17 امتحنت شهادة ومنتظرة النتيجة وقالو ياها النتيجة بكرة!! رزان د بت جنها مصايب ومجنناني ومجننة الحلة كلها ومهمما تعملي ليها م بتزعل منك بالعكس بتضحك في وشك ماخده المواضيع ببساطة والكلام السلبي بتدخلو بهنا وبتمرقو بهنا وزولة اجتماعية شدييد يعني مصاحبة بنات السودان كلهن والله العظيم!! بعدها آخر العنقود استبرق ياهو لما كنت حامل بيها استبرق صاحبة ربا اتوفت وربا لما عرفت انها بت اصرت تسميها عليها!! مع انو انا كنت عاوزه اسميها ريمان عشان اكمل ترتيبهم كلهم بحرف الراء! لكن ياهو بقولو الاسم مُنَزّل!! فجأة كدا بدت زينب تتكلم قالت ليها انا زينب وراجلي شغال في محل باسطة اليوم كلو م بجي الا المساء.. خلفتي كلها بنيات اكبر واحدة شذى معرسة وباولادها وبعدها شوق معرسة وباولادها وبعدها شموس معرسة وباولادها اصغر واحدة شروق ياها صحبة رزان بنية مزدلفة وامتحنو تالت مع بعض.. نسوان الحلة بقت كل واحدة تعرف عن نفسها بنفس النمط وخالين المرة محتارة فيهم! يعني يادوبها جات الليلة مشو جابوها من بيتها قالو ليها اسمعي قصص حياتنا! شروق قالت لي هن حيقعدن يعملن كدا كلما تجي مرة جديدة؟؟ هزيت ليها راسي باستهبال وقلت ليها اي للاسف.. طبعا لسه الاخوات بتبدلو ويخشو يستحمو وبمشو بممر بحيث م يشوفوهم النسوان في الصالة.. طبعا م عارفاهم كيف قاعدين في الصالة في الحر والكهرباء القاطعه.. المهم مرّ الوقت كدا بعد شويه رغده راجلها ضرب ليها قال العطل اتصلح ومشو.. ورياض مرتو كانت ف بيت اهلها ضربت ليهو قالت ليهو انها خلاص متحركة راجعه البيت.. ف ساق بتو ورجعو.. شروق زهجت قالت راجعه بيتهم ومشت.. والنسوان اتفرتقو.. الساعة 9 الا بليل يادوب الكهرباء جات راجعه.. حسيت روحي نعسانه نمت والمرة دي النوممه جرت والحاجه الاستغربت منها انو مف زول صحاني يعني لا امي صحتني امشي الدكان ولا حاجه.. لما صحيت الساعة كانت تقريبا 1 ضهر قمت طلعت برا لقيت البيت كلو مجتمع والحمدلله الليلة الكهرباء قاعدة بالنهار بتقطع بالليل! حتى ابوي شكلو جا راجع من السفرية!! وكلهم قاعدين بحضرو فالتلفزيون!! عاينت فالتفزيون لقيت مؤتمرنا شغال.. م اتوترت ولا شي بس مشيت الحمام اتسوكت وجيت قلت ليهم انا جعانه.. حسيتهم زي العاوزين يكفتوني.. احساس النتيجة الليلة والمؤتمر شغال وانا م متوترة ولا حاسة بأي شي حتى! بدو يزيعو الاوائل الاول مشترك 97,1% وامي تقول ماشاءالله تبارك الله اريتو حال اولادي!! بعد دا استبرق ان شاء الله تطلع احسن من رزان الفاشله د وتزيع اسمها في الشهادة.. ابوي بتوتر قال ليها ي مرة اسكتي عايزين نسمع المؤتمر كويس قالت ليهو بصوت خافت على اساس حيزيعوها هه.. تاني سكتت.. بعد مسااااافة من الصمت امي فجأة كدا بقت تقول ان شاء الله رزان تجيب 96 ان شاء الله رزان تجيب 96 ان شاء الله رزان تجيب 96 وبقت تكررها كتييييييير.. غايتو امي د متناقضه خلاص..انا بس بضحك فيهم وفي توترهم مع نفسي وقاعدة ف الارض ماسكه جوالي بحضر فيديو في اليوتيوب.. فجأة كدا رغده وشفعها جو داخلين وهم بجرو ورغده متوتترة وبتاخد نفسها بصعوبة.. وجا رياض ومعاهو مرتو وبتو.. بقو كلهم قاعدين يحضروو المؤتمر معاهم بتوتر! رنا بقت تعاين لي بغيظ قالت لي الناس ف شنو وانتِ فشنو!! ربا قالت ليها خليها ي رنو د متبلدة من المشاعر سااي.. رياض بقى يحاول يفتح الموقع عشان يطلع النتيجة م راضيه قالو الا بعد المؤتمر!! ويا المؤتمر م راضي يخلص شغالين يرغو ويرغو!! شويه كدا بدو يزعو الناس الجايبين 95 امي خلاص الحمدلله فقدت الامل من اني جايبة 96.. تاني بقيت م مركزة معاهم شديد ركبت سماعاتيي وعليت الصوت (قاعده ف الارض طبعا) وبقيت بحضر فيديوهات وكذا.. بعد شويه بالغلط عيني وقعت في الشاشه لقيتهم بدو يزيعو اوائل الولايات يعني الحمدلله خلاص ال100 الاووائل خلصو!! تاني بقو يزيعو اوائل خارج السودان وبعدها بقو يتكلمو عن مواعيد امتحانات السنة الجاية وعن استخراج النتيجة والتفاصيل وكذا.. البيت بقى مكهررب ومتوتر وكلهم بحاولو يفتحو الموقع.. رياض قال لي رقم جلوسك كم؟ حكيت راسي وقلت ليهو ااا م عارفه لكن شروق حافظاهو.. امي قالت لي طيري ليها سريع.. وفعلا ف ثانيتين جبت توبي لبستو وتلبت لقيتهم برضو بحضرو فالمؤتمر واخواتها وشفعها جو! وابوها شكلو ماخد اجازة!! وهي شغاله تاكل اضافرها وتبكي بقيت اضحك فيها.. بقت تعاين لي بغيظ.. قلت ليها المهم د م موضوعنا انا اسه بسألك رقم جلوسي كم (هي عندها هوس بارقام الجلوس تقريبا حافظة ارقام جلوس الناس كلها) ورتني ليهو بقيت اكرر فيهو وبسرعة تلبت ورجعت وريتهم!! بقو يحاولو م راضي يفتح وبعلق قالو الا رسالة نصية لرقم كدا.. رامي رسل رقم الجلوس للرقم وبقى منتظر وهو متوتر.. خطفت الجوال منو وفنفس اللحظة جات رسالة كان مكتوب فيها!!..

يتبع..
بقلم: مريم.