#مجرد_كارثه 4
مريم:واقفه على باب الدار وشابكة يديها في بعض بتوتر…نوتيلك حوايجك؟
صدام:طلع الدولاب وبدي يلبس في بجامته ومردش عليها
مريم:طيبت طاجين دجاج ورز بلاو …نحطلك تتعشى!
صدام؛كليت في العزي منبيش
مريم:سكتت لحضات وعيونها تلف يمين ويسار بتفكير…بااهي….به نديرلك قهوة!
صدام:منبي شي وانتي تنقي فوق راسي تبي اديري تمره سكري الضي واطلعي بنرقد بس
مريم :خذت نفس عميق …ت تمام
تصبح على خير…وسكرت الضي والباب وطلعت
طلعت من الغرفه ونفس الأسئلة أدور في راسها
أنا شينه؟
فيا شي مش مقبول !؟
أنا مقصره في شي!؟
وقعدت نفس الأسئله بزبط أدور في راسها بدون إجابه ..
✨محدش يقول على مريم انها مستفزه وغبيه وكيف مهتمه بي راجل يعامل فيها هكي لالا
يلي مخلي مريم هكي ترباية أمها❤️لان امها عودتها ديمه ان الراجل على حق مهما صار
وان انتي مفروض تخدميه عمرك كله وتتحمليه وانتي ساكته ✨
والشي هاذا عمره ما كان اسمه ترباية أصل لالا
المراءه يلي تقبل على نفسها معاملة زي هاذي تفكيرها محدود زي المجتمع يلي عايشين فيه بزبط ومقتنعه ديمه ان البنت وضيفتها تخدم راجلها وتجيب صغار وبس
لكن السؤال هوا …هل يحبها بعدين ويعيشو في سعاده زي اي قصه نسمعوها؟
ولا المره هادي بنطلعو بي شي جديد يبهرنا ؟
_____________________________
بتول :مقعمزه في سريرها وماسكه تالفونها تكتب وتبتسم ❤️
سلطان:بتول
بتول :لاهيا في تالفونها…ها
سلطان:جعان نوضي ديريلي اي شي على السريع قبل ما نرقد
بتول:قامت حاجبها ونزلت التالفون من يدها….الشربه متع العزي مقصره معاك في حاجه لسمح الله؟
سلطان:وصلت ضيوف بوي للمطار ولما رجعت للعزي ملقيتش فيه عشي تم
بتول:ابتسمت ببرائه……اممممم به ؟…ولما كلمت امك قتلك روح عندك مرتك اطيبلك صح!
سلطان:اي نوضي
بتول:لالا ياروحي لا
انت متعود تسمع كلام امك ….ركز فيها شن قالتلك ركززز
سلطان:عقد حواجبه بي استغراب …شني!
بتول:امك قتلك عندك مرتك اطيبلك …مرررتك
وانت الحقيقه يعني متعاملش فيا هكي
تعامل فيا من اول يوم تقول خدامه عندك ديري هكي وحطي هكي
وانا هاذا كله معنديش فيه مشكله واجبات عليا ونديرهم
لكن انت متعاملش فيا ع اساس اني شريكة حياتك
سلطان:تعكرش وجها بملل….توا شنو يعني ؟
بتول:يعني تطلع من الدار كمل في الطويل خود يسار في يمين تلقى زي الغرفه اسمها مطبخ فيها حاجات اسمهم اماعين وهكي
تلقى عندك حاجات اسمهم يدين متستعملش فيهم الا في الضرب ولا حكان ودانك لين كبرو الله يبارك جرب اقلي بيهم دحيه ولا طيب شاهي
حاول تستطيع….وقامت تالفونها وكملت هدرزه
سلطان:سكت دقايق يشوفلها وهوا يحاول يكتم غضبه…تم امالا انتي يلي بديتي …وطلع
فرق العقليه وفرق التعامل كان واضح جداااا بين مريم وبتول ✨🫶🏻
بتول مكانش يهمها تطلق او لا
لانها ببساطه كانت مؤمنه بي شي اسمه احترام وتقدير لازم يعطيه الزوج لي مرته باش مرته تقدر تعطيه باقي حقوقه على اكمل وجه ❤️
كانت بتول عندها قناعات ثابته في راسها ومتتنازلش
عكس مريم يلي كانت تشوف انها لازم تعطي كللللل شي لي الراجل حتى لو ميستاهلاش ✨
بتول كانت جريئة ومتهليش كلمه في خاطرها مستحيل
تقول في كل شي حتى لو كان يجرح✨
اما مريم مكانش ليها صوت كانت تخاف تحكي اي شي وتنفهم غلط 🌸
