"DREAM " မှာ စိတ်ကူးယဥ် ဇာတ်လမ်းတစ်ပုဒ်ဖြစ်သည် ။ စာရေးသူအနေနှင့်လည်း တခါမှ မရောက်ဖူးသည့် နိုင်ငံကို စိတ်ကူးကာ ရေးရသည့်အတွက်လည်း အမှားများ ပါဝင်နိုင်ပါသည် ။ ဘာသာစကား ကူညီပေးသည့် italyက စာသင်ပေးသည့် တီချယ်နဲ့ ယဥ်ကျေးမှုများ ပြောပြခဲ့သည့် don ကို လည်းကျေးဇူးတင်ပါတယ်။
Seong Martinez
"vieni qua ...giovanni ,pss psss "
"ဒီကိုလာ ချိုဗားနီး ၊ pss pss "
အိပ်ယာမှ လန့်ကာ နိုးလာသည့် ၄၅ နှစ်အရွယ် အမျိုးသမီးတစ်ဦး။ အသက် ၄၀ တန်း ရောက်လာသည် ဖြစ်သည့်အတွက် ထိုအရွယ်တွင် ရှိရမည့် အလှနှင့်လည်း ပြည့်စုံကာ အသားဖြူဖြူ ၊ အရပ်မှာ မရှည်လွန်းသလို မပုလွန်းသည့်အထဲ တွင်ပါပြီး သွားတက်များလည်း ပိုင်ဆိုင်ထားသူတစ်ဦးဖြစ်ပြီး သူမ၏ နာမည်က နှင်းနု ။ တစ်ယောက်တည်း သမားဖြစ်သည့်အတွက် သူမနေ နေသည့် တိုက်ခန်း၏ အကျယ်မှာ သူမ တစ်ဦးတည်းအတွက် ကျယ်လို့တောင်နေ၏။ အချိန် အားဖြင့် မနက် ၅ နာရီ ခွဲနေလေပြီ။ အိပ်ယာမှ ထလာသည့်နှင့်အမျှ ဦးတည်သွားရာ နေရာမှာ မီးဖိုခန်း ဖြစ်ပြီး ကော်ဖီ ဖျော်ရန် ရေနွေးပြင်နေပုံကို ကြည့်ချင်းဖြင့် သူမ ဟာ ကော်ဖီစွဲလန်းနေသူ တစ်ဦး ဒါမှမဟုတ် ကော်ဖီ သောက်ခြင်းဖြင့် နေ့တစ်နေ့ကို အစပျိုးသူ တစ်ဦး ဖြစ်နေကြောင်းကို တွေ့နိုင်သည်။ ရေနွေးမှာလည်း ပွက်ပွက် ဆူလာသည့်အတွက် ဗီဒိုထဲမှ ကော်ဖီထုပ်ကို ထုတ်ကာ မနက်ခင်း ကော်ဖီသောက်တိုင်း သုံးမြဲဖြစ်သည့် အဖြူရောင် မောက်ခွက်ထဲသို့ ထည့်နေပုံကို ကြည့်ခြင်းဖြင့် သူမဟာ စည်းစနစ် ရှိသူလား ဒါမှ မဟုတ် အစွဲကြီးသူ လားဆိုတာ တွေးစရာပင် ။ ကျစ်ကျစ်တောက်အောင် ပူနေသည့် ကော်ဖီ ခွက်ကို ကိုင်ရင်း မီးဖိုခန်းထဲရှိ ထမင်းစားပွဲတွင် ထိုင်ကာ ကော်ဖီ အရသာ ခံလျှက် သောက်နေမိသည် ။ ထိုင်နေရင်း အချိန်တွေဟာ တဖြေးဖြေးနှင့် ၆ နာရီ ခွဲလုနီးပါး ဖြစ်တော့မည် ။ မနက်မိုးသောက်၏ လင်းအာရုံမှာလည်း ထိန်ထိန်လင်းလာသည်။
ထို့နောက် သောက်နေသည့် ကော်ဖီမှာလည်း ခွက်၏ ဖင်ကပ်သာ ကျန်တော့သည် ။ ထိုအနေထားဆို ဆက်မသောက်တော့သည်မှာ သူမ၏ အကျင့် သာ ။ ထို့ကြောင့် ဘေစင်တွင် သွန်လိုက်ရင်း ကော်ဖီခွက်ကို ဆေးနေတော့သည် ။ ထိုအရာတွေမှာ သူမ တနေ့တာ ၏ ပုံမှန်လုပ်နေကြ အရာများ ဖြစ်နေသော်လည်း သူမ အတွက် ရိုးအီနေသည်မှာ အနှစ် ၂၀ ကျော်လာလေပြီ။ ထို့နောက် သူမ ၏ ကျောလယ်လောက်ရှိသည့် ဆံပင်များကို ညှပ်ကလစ်ကြီးကြီး တစ်ခုနှင့် ချည်နှောင်လိုက်ပြီး မီးဖိုခန်းထဲတွင် တစ်ယောက်စာ မပြင်ဆင်ခင် ဗုဒ္ဓဘာသာ တစ်ဦး ဖြစ်နေသည့်အတွက်လည်း မနက်အိမ်ရှိ ဘုရားအား ဆွမ်းကပ်ရန် ပြင်ဆင်နေသည် ။ ဘာလိုလို နှင့် အချိန်မှာ ၈ နာရီ ခွဲ ဖြစ်နေလေပြီ။ အကုန်ပြင်ဆင်အပြီး ဘုရားစင် ရှေ့ အရောက်အချိန် မှာ ၉ နာရီ တိတိ ပင်။ နေ့တိုင်း ထို အချိန်တွေမှာ စက္ကန့်လေးတောင် နောက်မကျပဲ ကွက်တိ ဖြစ်နေသည်မှာလည်း အနှစ် ၂၀ ကျော်ပြီ။
