Goman Fared(القلم الفريد🖋)
#البطل_المغمور2 "زهور القمر"
#جمان_فريد
#الجزء_الثاني "عطيني فرصة2"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
"شن اليوم بيطلع الوالد"
غيرت عيونها عن احسان لهيثم وقالت بشي من الإرتباك:ايه..هزت راسها وقالت..ايه يبي يشوفك قال..
هيثم بأبتسامه:تمام...مرر نظره ع لجين وإحسان وقال...هدا مريض هني درتله عمليه من تلاته ايام..
احسان وهو يشوف لرنيم وعيونها ضيقات:كيف وليت للخدمه؟
هيثم بإبتسامه:لا..بس يعني..قصة تشبه قصة صارت معاي قبل كان تذكرها..
رفع احسان حواجبه وقال:قصدك هداكا الراجل اللي مشيت تزوره وع خاطر امه درتله عمليه..جلال الوافي..
رنيم حسيت قلبها بيوقف بلعت ريقها وهربت بعيونها عن هيثم ونزلتهم لوطا وهي مصدومه من اللي سمعاته..
هيثم هز راسه وقال:ايه..
لجين بإبتسامه؛وطبعا من غير مقابل..
ضحك هيثم نص ضحكة بإحراج..
لجين بإبتسامه؛هدا انت دكتور..ونعاود نقول خسرناك وخسارتنا فيك كبيرة..
هيثم حك حاجبه وقال:ماتبديش لجين..
إحسان وهو يشوف لرنيم:عندها الحق..قليل النادر مايمر ع بلاد هادي مسؤول عنده ضمير وانسانيه ويخاف ربي...
هيثم قعد يحرك فيدها فوق ولوطا وهو يقول بإبتسامه؛باهي باهي..خلاص..شكرا شكرا..
لجين ضحكت..
والتوأم يشبحولها الزوز كانوا حاسين اتجاهها شعور مزعج..
امارنيم معاش قدرت تتحمل نبرة احسان واسلوبه تنحنحت وقالت:اني سابقاتك دكتور..
هيثم شبحلها وقال؛شويه وجاي..
رنيم كانت تتجنب تشبح لإحسان هزت راسها ومشت طول طلعت..
لجين:مالا اني نستأذن توا..ان شاء الله لاباس عليك ريحان
ريحان ابتسمت ابتسامه بارده..
هيثم؛مشكورة لجين بارك الله فيك..
لجين بإبتسامه؛فيك بارك الله دكتور مررت نظرها عليهم وقالت..السلام عليكم..
ردوا عليها هيثم وإحسان؛وعليكم السلام..
مشت طلعت..
وناض بعدها احسان وقال:خل حتى اني نوض وراي جلسة..
هيثم:نبي نشوف وقت تاني ونهدرزوا..
احسان؛تمام بيناتنا تليفون..شبح لريحان وقال..لاباس عليك يابطله..
ريحان بإبتسامه؛شكرا..
احسان ابتسم وقال:ربي يحفظهم..
هيثم؛تسلم..
وجاه احسان صافحه ومشي طلع..
بعدين هيثم التفت ع جنان وقال:تمشي معاي..
ريحان:لا بابا خليها معاي..
هيثم؛بشرط مادير شي وماتتحركش بكل لين نجي..
جنان:حاضر بابا حاضر..
هيثم؛وعد..
جنان؛والله وعد..
ابتسم هيثم وقال؛شويه وجاي مش معطل..
ومشي طلع...وبش يرتاح قلبه اكثر وصى وحده من الممرضات تمشي تقعد في الغرفه..
وتوجه لغرفة والد رنيم..
وصل فيها...لقي الباب مفتوح..
دقه وقال؛استاذ محمود..
خو رنيم؛تفضل دكتور تفضل..
خش لقي الراجل مقعمز ع السرير ورجليه لوطا وجنبه ساكوه..
وحداه مرته ورنيم وولده..
هيثم؛السلام عليكم..لا الله يبارك وجهك ناير..عريس..
ضحكوا..
بو رنيم بضحكه؛بارك الله فيك دكتور..مش عارف كيف نشكرك..
هيثم:هادي عملي مافيش عليه شكر..
بورنيم؛ولا اجر يادكتور...
هيثم ابتسم وهو ساكت..
خو رنيم:ع قدماسمعت عنك بالذات بعد الازمه الاخيرة اللي صارتلكم..
رنيم حست بضيقه زادت في صدرها..
وهيثم تبدلت ابتسامته العاديه لإبتسامة أسف وهو يسمع في خوها اللي متابع يقول؛نشوف في الناس اللي دافع عنك شن تقول نقول يبالغوا...لين ربك جابك لينا وشفت انهم ماقالوا الا الحق..
هيثم:شكرا..
بورنيم؛ربي بإذن الله حيظهر الحق وكيف ماصار معاي إن شاء الله يصير معاكم..
هيثم:ان شاء الله البنت اللي شهدت ع اللي صار ينوض ضميرها زي زميلك وتشهد بالحق وتعطي ولدي فرصة تانيه...
رنيم كانت شاده روحها بالسيف...وحست نفسها حينقطع وين سمعت بوها شن قال..
بورنيم:ان شاء الله ربي يهديها وتعرف انها بسكوتها هدا ذنب ولدك حيقعد في رقبتها..
ام رنيم؛لكن والله واعره ع البنت راهو سمعتها بتنضر..
بو رنيم؛وسمعة الولد وعيلته!؟ اني لو كنت من اهلها نرفعها بيدي تشهد خير مايوم غدوة ربي ياخد حقه منها ومني حتى اني..
مسحت رنيم ع جبهتها بعدين قعدت تمروح بيدها ع وجهها انفاسها ضاقت..
هيثم؛ياريت كلهم يفكروا زيك هكي...هز راسه وقال..ع العموم اني مسلم امري لله هو يدبر امرنا..
بورنيم؛نعم المولى ونعم النصير..
هيثم؛ان شاء الله معاش نشوفوك مرة تانيه الا ع خير..
كلهم بأصوات متقطعه قالوا:إن شاء الله..
وبورنيم قال بإبتسامه:بارك الله فيك ربي يكثر من أمثالك..
ورنيم تشبح لهيثم بألم ودموعها ع حافة جفونها...
🍁🍁🍁🍁
خدت مفاتيح السياره من ع المدخل بإستعجال وهي تقول..
نسيبه:مش عارفه ياخالتي قالولي نجي وخلاص..
وبدت تلبس في رجليها..
وماجده تشوفلها وهي تقول بقلق:يارب سترك يارب..
فتحت نسيبه الباب وطلعت...
واتصلت بخليل في طريقها بلغاته..
بعدين مشت طول لمدرسة بنت خوها اللي جاهم اتصال منها يقوللهم يجوا لأمر ضروري..
مش عارفه كيف وصلت غادي من خوفها..
وخشت تجري طول للإدارة..
لقت فيها سارة مقعمزة وحداها شطنتها ومنهارة بالبكي..
نسيبه بخوف:سارة حبيبتي خيرك..
وسارة تبكي بس..
المديرة بحزن:سمعت بخبر وفاة زميلها..
نسيبه بألم ممزوج بالاسف:إنا لله وإنا إليه راجعون..
سارة ببكي:نبي نمشيلهم..
نسيبه قعدت تشبحلها بوجع..
سارة ببكي:خودي النعته من الأبله بالله عليك عمتي نبي نمشي..
نسيبه هزت راسها بعدين:خل نعطي علم لبوك قبل..
واتصلت نسيبه بهيثم هو الاول بلغاته والخبر وجعه هلبه وعطاهم الإذن ووصاها ع ساره..
بعدين اتصلت بخليل وبلغاته وقاللها ماتمشيش لين هو يوصل فيهم..
خدت نسيبه العنوان من المديره..
وطلعت بسارة من المدرسه والبنت ماسكتتش بكل تبكي وبس..
ركبوا السيارة وقعدوا يستنوا لين جي خليل وتوجهوا لحوش اهل رهف...
لما وصلوا غادي...
لقوا الدنيا زحمه ..ولما قربوا قعدوا يسمعوا في صوت العياط والبكي..
نزلوا من السيارات..
وسارة تشبح للحوش وتسمع وهي مقهورة..
نسيبه بالم:تعالي حبيبتي..
ضمتها ومشت هي وياها..
وخليل واقف ع سيارته يشوفلهم بضيق..
وصلوا في باب الحوش اللي كانت حواليه زحمه..
عيون سارة شافوا والد رهف وهو مقعمز ع كرسي وحاط راسه بين ايديه..شبحتله بحقد..
وخشت داخل هي وعمتها...
وين بدوا يقربوا من صوت العياط والبكي...
سمعوا وحده تعيط وتقول..
"قتلوها بنتي قتلوها...قالت مانبيش نتزوج يابابا..نبي نقرا بابا..بنيتي كانت تبي تولي دكتورة دكتورة..بوها ماخلاهاش..
بوها اللي قتلها باش يرضوا عليه خوته بوها..."
قعدوا واقفين يشبحوا لأم رهف وهي تعيط وتبكي وتتكلم...
"خشت عليا قالتلي ماما شن صار ياماما كلمتي بابا نبي نولي لقرايتي..واني داسه عليها ملفها اللي سحبه بوها ولما قتلها...البنت ماقالت شي مشت لدارها طول رقدت..معاد ناضت"
سارة انهارت وقعدت تبكي بالصوت...
كلهم ركزوا عليها...قعدت عمتها اللي كانت تبكي حتى هي تهدي فيها..لكن سارة من كثر البكي فقدت وعيها...
🍁🍁🍁🍁
في معهد التقويه..
في وحده من القاعات..
جلال وهو يفصل في البنت:ترا وينه اللي مش فاهمتيه..
البنت:هدا وهدا دكتور..
جلال:تمام...وبدي يشرح...شويه ووقف وشبحلها..
هي شبحتله...
جلال؛قربي خيرك بعيده..
البنت عقدت حواجبها بإستغراب..
جلال بضحكه:تي قربي مش واكلك...
البنت هزت راسها وقربت شويه..
وهو زاد قرب منها وقعد يشرح...وكان نبرة صوته غريبه..
البنت وخرت شويه وهو مازال يشرح ويشبحلها..
شويه وقالت:خلاص فهمت..
جلال:بسرعه هكي!؟
البنت وقفت ع حيلها وقالت:ايه ماهو واضح بس فيه حاجات مش مفهمومه وتوا فهمتها خلاص..
جلال بإبتسامه وهو يمرر في نظره عليها:تمام في الجديد اي حاجه مش فاهمتيها تعاليلي في الوقت هدا واني نشرحلك..
البنت هزت راسها وقالت:باهي..
مدت يدها وقالت؛ترا الشيت..
هو مده...خداته وهو تقصد لمس يدها..البنت جبدت الشيت بسرعه وقالت:سلام...وخدت شنطتها وهي مبتسمه بأرتباك ومشت طلعت..
وهو معاها بنظراته الخبيثه ويده تمسح ع لحيته...
🍁هي طلعت من المعهد...
ومشت مشوار ع رجليها...
ولما وصلت في بركيدجو سيارات..
ابتسمت وين بان عليها واحد..
وقفت عليه وقالت؛ياهلا..
:شن جو..
:مليح..
:شن اخبار صاحبنا..
:واحد..واطي..حقير...مسخ لدرجه مانحكيلك..
هز راسه وقال؛حفظتي المكان كويس..
:زين زين..
:باهي امتى..
:راجي يومين بس..بس..
؛خلاص نراجي..
:بس ها زي ماأتفقنا ولا..رقم مرتك نعرفه راهو..
:ترا سكري فمك سكري..
قعدت تضحك..
:خلاص الدفعه التانيه توصلك بعد يجيني الفيديو زي مانبي..
:واحسن يخي..
:تو نشوفوا..ماتبي شي..
؛طلتك البهيه بس..
:بري اقلبي وجهك بري..ولف ومشي..
وهي تضحك..لفت ومشت طلعت من البركيدجو...
🍁🍁🍁🍁
في نفس الوقت...
في كلية الطب...
كانت مقعمزة في نفس المكان تراجي..
ودور بعيونها...
متعوده تشوفه من الصبح اول ماتجي..
بس توا الظهر بيذن..ومش باينله جيه..
مريم..
"وينه هدا علاش ماجاش لتوا...معقوله يكون ولى في كلامه!؟وعلاش انتي مش حاطه في بالك احتمال زي هدا..اكيد راجع روحه وحس انه مايقدرش ع حاجه زي هادي..انتي اصلا شن خلاك تصدقي ان واحد زي هدا نيته معاك صافيه حق..مغباك يامريم ديما عبيطه وينضحك عليك بسرعه..مغباك..."
نزلوا دموعها وقعدت تمسح فيهم..
بعدين ناضت وقفت وقعدت تشبح للطريق..وتشوف للسيارات كيف يفوتوا...
خدت نفس عميق وقالت في نفسها..
"سامحني ياربي خلاص "
ومشت جهة الطريق..
وزادت سرعت مشيتها مركزة ع الطريق بس..
تبي لما توصل للكياس تطلع تجري طول..
وهي ماشيه...ماحستش الا بحد شد مرفقها بقوة ووقفها...
هي بصدمه شبحتله..
جهاد بغضب؛خير جدك انتي حمارة!
جبدت دراعها بقوة وقالت بغضب؛وينك لتوا ياحمار انت..
هو رفع حواجبه بصدمه..
مريم:كانك مش قد كلامك علاش تعشم فيا!؟
جهاد؛خيرك انتي مهبوله!؟ اني كل يوم نجي نراجي توقفي عليا وتعطيني ردك..
تعبوا عيونها دموع وهي تقول:علاش هدا وين جيت؟
جهاد؛عندي مادرت الصبح..سوا نظارته بإبهامه وقال..حني عندنا ورشه اني وخوتي نقصد..نخدموا فيها مع بعض..
هي بدت تهدا وغيرت عيونها عنه..
جهاد؛قولي شن صار معاك!؟
مريم شبحتله شويه بعدين قالت؛مش عارفه علاش مش قادره نصدقك..
جهاد:انتي قولي باهي ونخليك تصدقيني..
قعدت تشبح لعيونه بنظره فيها توسل انه مايخذلهاش..
وهالنظره كانت فيها مسحة حزن..
هو ابتسم وقال:انتي قولي باهي بس..
مريم بعيون مليانات دموع:الله لاتسامحك كان زدت كسرتني..
جهادإبتسم وقال:آمين..
نزلوا دموعها ومسحتهم ومررت نظرها حواليها بعدين قالت:بتقعد قدامك مشكلة اقناع بوي وخوتي..سامحني..شبحتله وقالت..خايفه مايرضوش بيك..
جهاد بإبتسامه؛مادويش عارف شن ندير..بس حتى انتي بتصرفي..لازم يفهموا انك تموتي فيا ومن غيري وماتقدريش تعيشي وكان لزم الأمر انتحري بالكذب..
هي ضحكت من بين دموعها اللي كانت تمسح فيهم..
جهاد بإبتسامه:كل شي حيمشي تمام ان شاء الله..
هي نزلت عيونها وهزت راسها بإيجاب..
جهاد؛تمام بري ولي لمكانك واني قاعد هني لين تروحي..
هي شبحتله بعدين هزت راسها ..ولفت ومشت..
وهو مشي قعمز في مكان بعيد عنها شويه..
هي بعد ماقعمزت سرحت بتفكيرها في حالها..
لوين وصلت..لوين وصلت روحها..
حتى فرحة العمر اللي تستنى تعيشها كل بنت هي ضحت بيها ع رخيص..
ولو صار وتزوجت زواجها حيكون سترة ليها من الفضيحه والعار...
بدت تذرف في الدموع..
وهو من بعيد شويه يشبحلها..يشوف فيها كيف تمسح في دموعها وهو يفكر..هل ياترى حتتسهل عليه ويقدر يدير خير فهالبنت..ولا حتتعرقل..وتقعد البنت في الوسط بروحها..
وتلقى روحها مجبورة ع انها تحط ذنب فوق ذنبها ونهايتها تكون مأساويه..
لقي روحه تلقائيا مغمض عيونه ويدعي الله في سره يساعد ويعطيه فرصه يكفر بيها عن ذنوب عمر بحاله...
🍁🍁🍁🍁
الساعه الرابعه والنصف عصرا..
في دارها..
مقعمز ع سريرها بالطول وهي في جنبه راسها ع صدره وهو يمسح ع شعرها ويقرا في سورة طه...
وهي تسمع وشاده فيه بقوة..مغمضه عيونها بشده والدموع ينزلوا منهم..
وقف قرايه وقال؛سارة..بابا..
سارة؛اممم..
هيثم:شني توا بابا..
سارة فتحت عيونها وقامت راسها وشافتله:مش رايحه من بالي يابابا زعمه شن حست وين قالتلها امها بوك سحب ملفك من المدرسه..شن كانت تحس يابابا لما خشت دارها ورقدت..حطت راسها في حضن بوها وغمضت عيونها بشده وهي تقول بألم..ماتت من القهرة بروحها وماحد يندري عليها..
هيثم بحزن:الله يرحمها ويغفرلها ويجعلها من أهل الجنه..
سارة؛ياريتها تحجبت بس..فتحت عيونها ورفعت راسها وقالت..خايفة عليها من العذاب يابابا..تعذبت هلبه في الدنيا..حتى للقبر العذاب بيلحقها!؟
هيثم تنهد وقال:كل اللي نقدر نقوله يابابا ان ربك رحيم..رحمته مافيش زيها..ادعيله وقولي..ياربي انت ارحم مني برهف..وارحم من امها بيها..ارحمها يارحيم....
سارة:ياربي انت ارحم مني برهف وارحم من امها بيها ارحمها يارحيم...عقدت حواجبها بغضب وقالت..ياويله من ربي بوها هدا ياويله..هو اللي قتلها يابابا..ان شاء الله يموتوا الابهات اللي زيه يارب ان شاء الله يموتوا قبل ليقتلوا صغارهم..
هيثم؛لالالا سارة استغفري ربك وماتدعي على حد بالموت..ادعي بالهدايه..ادعي بالصبر..لكن الموت لا..
سارة:اللي يعيشوا مع ابهات زي هادوا يتعذبوا يابابا..
هيثم؛لله حكمه في كل شي بنتي..في هلبه ناس كان عندهم اباء اسوء من بو صاحبتك الله يرحمها..ومع هذا طلعوا احسن ناس وعاشوا حياة حلوة بعدين..ومش هكي بس يعطوا دروس في البر بوالديهم...
سارة:باهي علاش رهف ماكانتش زيهم..
هيثم؛مش كل الناس زي بعضها موازين القوة تختلف بنتي كل بنادم وقوة ايمانه وقدرته ع التحمل..
سارة هزت راسها بحزن وقعدت ساكته..
هيثم:المهم انتي توا ادعيلها تصدقي عنها ديري خير يونسها وين ماهي توا..ابتسم وقال..نقولك حاجه تفرحك..يوم القيامه الأصحاب يقعدوا مع بعض في الجنه وين ماحد فيكم يفقد التاني يقول لربي..ياربي مانقدرش نعيش متهني فيها وصاحبتي ولاصاحبي مش معاي..وربي كرامه ليه يجيبله رفيقه يخش معاه الجنه...
سارة ابتسمت من بين دموعها بعدين ضمت بوها وقالت:نحبك بابا نحبك هلبه..
هيثم قعد يضحك ويمسح ع شعرها ويقول:حتى اني بابا..حتى اني...
🍁🍁🍁🍁
وعدا باقي اليوم...
وجهاد مابطلش تفكير في الخطوة اللي بيديرها..
قعد كل مرة يتخيل في موقف بوها وخوتها منه..
يتخيل لو رفضوه رفض قاطع وهي تجرم في حق نفسها بعدين..
يتخيل لو تم الموضوع وتزوجها..
كيف حتكون حياتهم مع بعض!؟
ايه هو صح تزوجها بش يستر عليها..بس مستعد يدير معاها عيله وصغار..مايقدرش..
يقعد راجل شرقي..مايقدرش يقبل حاجه زي هادي..مش حيقدر يخلي ام صغاره وحده غلطت زمان مع غيره..كيف حيحط فيها الثقه مايقدرش..
باهي هو بيتزوجها بس ع ورق...لكن..
هل هذا حيكون ذنب جديد فوق ذنوبه!؟ زواج زي هادي مايجوزش..
باهي شن يدير...
مسح بإيديه ع جبهته بعدين قال:افف..لالامانبيش نندم لا...اني عطيت البنت كلمة..نعشمها ونرخي بيها..تي نولي كلب وستين كلب بعدين..
سكت وقعد يفكر..ومالقاش قدامه خير من الإستشارة.
يستشير حد ثقه يوثق في انه حيحفظ السر ويعطيه راي ينفعه...
بس من هو هدا؟!
🍁🍁🍁🍁
تاني يوم..
لبست دانيه في رجليها وجت بتطلع من الحوش وقفتها امها لما قالت:سلم بنتي كولي اللي نديرلك فيه راك تاخدي في دوا..
دانيه؛حاضر يام...وانتي ماتعبيش روحك..كسكسي ساد..
تنهدت سدينه وقالت؛:ان شاء الله..
ع جية مجاهد ومعاه رشيد..
مجاهد؛بنروح بيك اني اليوم..
هي ابتسمت لأنها فاهمه علاش وقالت؛تمام..
ولفت ومشت طلعت..
امه التفتت شبحتله وقالت؛علاش وين بترفعها..
مجاهد بضحكة احراج:وين بنرفعها بنروح بيها طول..
ابتسمت سدينه ومشت..
وهو زاد انحرج من ابتسامة امه بعدين شبح لخوه وقاله؛هيا قدامي..
رشيد لبس في رجليه وكذلك مجاهد والزوز مشوا طلعوا من الحوش..
بعد طلعتهم..
سدينه دارت سفرة فطور تحل العين المغمضه..
ورنت ع مجيد ينزل ياخدها..
ونزل طول خداها وركب بيها للعروسه اللي كانت واصله امس في الليل من السفر...
ومااول ماوصل عطي خبر لسدينه بش ديري غدي عزومة صحابه..
وهي مافيش قدامها غير انها تنفد الأوامر بس زي ماتعودت..
ولما جي وقت الغدي..
بدت اطيب...
كسكسي بالبصله وحداه مصارين ومبطن..
وكله جايبه مجاهد...
بدت تجري وتحوس..وكانت تراجي في ضرتها دير زي مادارت ماجده قبل تنزل تعاون..لكن مراجاتها كانت ع الفاضي..
🍁🍁🍁🍁
فهالوقت..
في احدى المستشفيات العامه..
كانت رنيم مع زملائها اطبق...
بعد ماتمت المحاضرة..
كانت تتناقش مع زملائها شويه جتها ممرضه وقالت؛في واحد يبي برا دكتورة رنيم..
رنيم استغربت بعدين قالت؛شويه يابنات..
ومشت وهي تلحق في الممرضه لين وصلتها للشخص اللي طلبها..
هي لما شافاته بدت ترعش مع بعض..
الممرضه؛هو هدا..
رنيم بلعت ريقها وهي تهز في راسها بإيجاب وتشوفله...
الممرضه؛نستأذن..ومشت ع حالها..
احسان وهو حاط ايديه ورا ظهره ويشوف لرنيم بعيونه اللي مضيقهم قال؛اذنك معاك..
رنيم قعدت تشبحله بحده وعيونها تعبوا دموع..
احسان؛شن حالك دكتورة..وشن حال الوالد..وشن حال ضميرك..ان شاء الله يوجع فيك؟!
رنيم غيرت عيونها عنه ومررت نظرها قدامها بعدين شبحتله وتنهدت وقالت:تحساب الحكايه ساهله هكي.!؟انت عارف شم بيلحقني ويلحق ماليا بعدين!؟تعرف ولاغير همك تكسب قضيتك وخلاص!
احسان؛تصدقي..اني مصدوم..مصدوم هلبه ومش مستوعب كيف بعد ماعرفتي هيثم الكاتب عن قرب..وشفتي شن دار مع بوك..عمليه دارها ماخداش عليها وقرش وبوك من بعد فضل لله نجي من الموت بسببه..هدا كله ماحرك فيك شي..
غيرت عيونها عنه وبدت تهز في رجلها من التوتر..
احسان؛بلاش من هدا كله...اللي صار مع بوك مااثرش فيك حتى شويه..ماخلاكش حطيتي نفسك مكان بو زياد وعيلته..
ولا كان لازم بوك يخش الحبس ولايموت بش تتأثري..
شبحتله بحده وقالت:بعيد السو على بابا ان شاء الله في اللي يودهاله..
احسان مرر عليها نظره من فوق لتحت وهو مبتسم بإبستياء بعدين قال؛شي مخجل صراحة..تعرفي توا اني في شن نفكر.
نقول ياريته زياد كان زيك لما سمعك وانتي تستنجدي من هداكا الكلب....ولاخسر حريته بش انتي تعيشي حياتك..
نزلوا دموع رنيم وهي تشوف لإحسان..
احسان؛سلبيه وجبانه...
ومشي من حداها..بعد ماخلاها تكره روحها...
🍁🍁🍁🍁
"تفضلي خشي تفضلي"
خشت مقبوله لكوجينة سدينه وهي تتفحص فيها..
حيوطها..تراكينها..ماعينها....بعدين شبحت للطناجر وقالت؛كم قعد بديري..
سدينه؛بالوسع خمسة قعاد حشا عيونك..
مقبوله؛كلمة خمسة حشا عيونه لاتجوز...العبارة هادي اصلها لليهود..
سدينه؛اها..ايه عندك الحق..
مقبوله وهي تقلب في عيونها في الطناجر قالت؛شن درتي تاني؟
سدينه:مصارين ومبطن..
مقبوله؛بس!؟
سدينه بشي من الإرتباك؛ايه بس..
مقبوله؛وع شني يقولي مجيد سدينه فالحه وخبرة في العزايم..عزومه زي هدا تبي 4انواع موالح...
سدينه غيرت عيونها للطناجر وهي متوتره بعدين قالت؛ياريتك قتيلي شن تبي من قبلها..
مقبوله تنهدت وقالت...الله المستعان...اني بنقوله يقول انك انتي درتي كل شي..مانبي حد يحط شي في وجهي يقعدول يهدرزوا بيا لنساوينهم..
ولفت ومشت طلعت وهي تقول وتردد:الله المستعان..الله.المستعان وخلاص..
ونزلت خمارها وطلعت من الشقه وركبت لشقتها..
وشويه ونزل مجيد عطي سدينه ع راسها لين خلاها تبكي بدموعها بعدين قاللها تسقي ومشي ركب فوق..
وسدينه بدت تسقي في الغدي ودمعتها ع خدها...
🍁🍁🍁🍁
في نفس الوقت..
في المرواح..
طلعت دانيه تجري لسيارة مجاهد..شافت صاحب الموطو يستنى..
شدت ابتسامتها ومشت ركبت مع خوها..
مجاهد؛بروحك..
دانيه:ماجتش اليوم توقعتها الحق..
تنهد مجاهد وتحرك بسيارته...
وراجح وراه..
جاته مكالمه ردت والسماعات في ودانه..
راجح؛هاه....وانتي شن دخلك........جيهان مش رايقلك راهو فوتيني..وسكر عليها...
🍁نزلت تليفونها وقالت:شكله زي ماقلت يانهاري..
جمعه وهو عاقد حواجبه؛علاش شن قالك؟
جيهان؛ماقال شي لكن كل شي واضح ياجمعه...اني نبي فرخة زي هادي شن فيها مايشوفوا..شلافطيه متشرده..شن شاف فيها راجح مش عارفه..
جمعه ونار الغيره تاكل في قلبه؛اسمعي خلي ورا خوك ماتخليشي يجازف بإسم العيله ويناسب ناس مش ليكم بكل..
جيهان هزت راسها وقالت؛ايه..والله مايصير منهم الاع جثتي هدا اللي مازال جربوعه زي هادي تولي كنة ******
جمعه ماكانش متحمل في دانيه بس مجبور يساير جيهان..المهم دانيه ماياخدها حد غيره هو..
🍁🍁🍁🍁
الساعه السابعه مساءا..
كان حوش هيثم الكاتب معبي بالأصحاب والأحباب..
ملتمين ع طلعة ريحان من المستشفى..
كانت الأجواء حلوة بالمرة..
وسارة حاولت تخش فيها بس ماقدرتش كان في قلبها حزن كبير مش قادره تتخطاه...
بينما خواتها كانوا فرحانات ع الآخر بأجواء الحفله..
بالذات وين حطوا التورته الكبيرة اللي عليها صورتهم هما الزوز...
خلوهم يقصوا مع بعض...وخدوا صور تذكريه وكانوا في قمة السعاده..
وهدا اللي يبيه هيثم من اقامته للحفله..
▪▪▪▪
◇صراحة غيرت جوي حتى اني..مش اني بس كلنا..لكن قلبي قعد عند زياد اللي انحرم من هلبه مناسبات فرح ماقدرش يشاركنا فيهم...بس اللي عنده وخية حنينه زي سارة مايقعد في خاطره شي..
▪▪▪▪▪
سارة؛خاطري نزوره بابا ونهدرز عليه..
هيثم تنهد وقال:مافيش مشكله هو اصلا غدوة بإذن الله يوم الزيارة...
سارة بإبتسامة فرح؛امتى باهي..
هيثم؛بعد العصر..
سارة:مالا خل نمشي ندس حصته في الفريز..ومشت تجري..
هيثم ضحك بعدين قال؛واني خل نمشي نشوف فرادي شخشخير ع قولت نوسه..
ومشي بإتجاه ممر الديار قاصد دار ريحان وجنان...
🍁🍁🍁🍁
مقعمزة بإتجاه الروشن المفتوح بش تجيها البرودة...
وتهدرز بالتليفون..
دانيه:لاياحنة لانزلت ولارينا وجهها..
"خلت امي ديرلها ماكلة عزومتها الحقيرة"
دانيه:تحسابيها ابله ماجده..الله يرحم ايامها
"ايه والله..يقولوا مانعرف خيرك كان لما نجرب غيرك"
دانيه:خلاص ريتا بنصكر نعسانه..
"باهي بري ارقدي واي جديد يصير خبريني امي عارفتها حتى كان صارت حاجه ماتحكيش"
دانيه:تمام...تصبحي ع خير..
"قدامك كل خير"
سكرت رتاج وحطت التليفون ع تركينه وقعدت مقبله وجهها للروشن تبي ترقد وهي مقعمزة المهم تقابل النسمه البارده..
عندهم مكيفين..واحد في الصاله وتاني في دار مجاهد..
امها ترقد في الصاله بس هي تتحشم ترقد فيها..
قبل كانت عندهم مروحه كبيرة في دار لكن بوها خداها...
شويه دق عليها الباب...
دانيه بنعس؛مني..
"مجاهد"
ساوت تقعميزتها وقالت؛خش..
فتح الباب وقال:مارقدتيش..
دانيه:ناعسني النوم بس مش قادره نرقد من النو..
مجاهد:باهي نوضي ارقدي في داري اني بنرقد في الصاله..
دانيه:لالا اهو شويه ونرقد..
مجاهد؛قلت نوضي اني..
دانيه؛مجاهد..
مجاهد؛قلت نوضي..
تنهدت دانيه وخدت شرشافها وناضت..
وهو مشي..
هي طلعت من الدار ومشت لدار خوها وهي تشوفله كيف ماشي للصاله..
ابتسمت بعدين مشت خشت لداره وسكرت عليها الباب..
دانيه؛الله اسكيمو...
ومشت تجري رقدت ع السرير وتغطت...
ولحظات وراحت في نوم عميق..
اما مجاهد مشي فرش حدا امه...
كان يبي يرقد حداها..شكلها اليوم ماعجباش حسها كامده في قلبها زي عادتها خاف عليها وماقدرش يخليها ترقد بروحها..
قعد طول الليل يشوف فيه...لين غلبه النوم قبل الفجر بساعه..
امه مع اذان الفجر ناضت..
سدينه:صدق الحق...وقعمزت...شبحت قدامها شافاته راقد..مجاهد شن مرقده هني!؟
وقربتله وقعدت تنوض فيه:مجاهد..مجاهد..مجاهد ولدي..
فتح عيونه مفزوع وقال:خيرك يام!
سدينه:ماخيرني شي مافي شي..خيرك انفجعت..انت علاش راقد هني..
هو حط يده ع عيونه وقعد يحك فيهم وهو يقول:النومه هني اريح..
سدينه؛باهي سلم وليدي نوض كم تمشي للجامع الفجر آذن..
هز راسه وتنهد..وامه مشت ناضت بتتوجه للحمام وهي تذكر في الله..
اما هو تعوذ من الشيطان وناض...
🍁في الشقة اللي فوقهم..
كانت مرت بوه مقعمزة ع مصليتها تذكر في الله..
شويه بان عليها راجلها بيطلع..
مقبوله؛مجيد..
وقف وقال:نعم..
مقبوله:ماتنساش تقوللهم لوطا يديروا مع الفطور صونية زيت زيتون..
مجيد هز راسه وقال:وانتي ماتبي شي من برا..
مقبوله:بريوش خاطري فيه..
مجيد بإبتسامه؛مايقعد شي في خاطرك ياحلقومه..
ضحكت مقبوله..
مجيد:لما تضحكي السمس تزرق..."الشمس"
مقبوله بضحكه:حي راحت علينا الصلاه..
قعدوا يضحكوا الزوز بعدين قالت؛هيا برا برا قبل تفوتك الجماعه..
هو قال؛هي هاني ماشي..
ومشي..
وهي تعوذت من الشيطان وولت للذكر من جديد...
🍁ويعدي الوقت ويصبح الصبح..
ودانيه بتمشي المدرسه..
وهي طالعه شدها مجاهد وقال:شن واخده من داري
دانيه بضحكه:كتاب سمعت سارة تحكي عليه قلت كان جت اليوم وشافاته تفرح..
ضحك وهو يحك في حاجبه بعدين قال؛كان هكي باهي..
دانيه:ع اساس مش فاهمه انك حاطه قدامي بلعاني..
مجاهد عقد حواجبه وهو يضحك بإحراج:اطلعي اطلعي...بعدين شدها وقال..بنروح بيك اليوم...
دانيه وهي تضحك:بيلزوك من الخدمه ع هكي..
مجاهد بضحكه:مايقدروش..
دانيه قعدت تضحك بعدين طلعت من الحوش..
وهو تنهد..ومشي وقف ع المرايه يساوي في روحه قبل ليطلع...
🌷🌷🌷
فهالوقت..
طلعت سارة من حوشهم بتمشي للباص...
وشويه وطلعوا رفيق وتهاني من الحوش..
رفيق:بريلها بري..
تهاني؛ماشيه من غير قولك..
ومشت بسرعه..
رفيق:يبي القص لسانك..
تهاني وصلت في سارة وقالت؛صباحو ياناسينا..
سارة:بري امشي اقلبي وجهك.
تهاني بضحكه:خيرك.!
سارة؛علاش ماجيتيش امس..
تهاني:والله نقرا والله كان عندي زوز اختبارات احياء وفيزياء..
سارة بإبتسامه؛باهي سماح هالمرة..
تهاني:لا سجى..
سارة؛بري لخوك بري..
وتهاني تضحك..
رفيق كان ماشي وراهم يسمع في هدرزتهم وع وجهه ابتسامه حلوة وعيونه ع سارة بس..
تهاني تعنقت ذراعها وقالت:شن جوك اليوم..
تنهدت وقالت؛احسن..ولما نشوف زيزو اليوم حنولي احسن واحسن..
تهاني:بتمشيله..
سارة:ايه...
تهاني هزت راسها وهي ساكته وسارة تشوفلها وهي تفكر في خوها..
ابتسمت بعدين شبحت القدام..
قعدوا ماشيين وهما ساكتين لين وقفوا قدام المحل..
سارة:بناخد ميلكا...
رفيق قدم وقال:تبوا حاجه من المحل..
سارة قعدت ساكته..
تهاني؛سارة بتاخد ميلكا..
رفيق:خليكم هني..
سارة:لا مش لازم نخش ناخدها بروحي..
هو ابتسم ومن داخل بيطير من الفرحه لأنها كلماته قال لاخته:خليكم هني قلت..
ومشي خش للمحل..
سارة سكتت وهي مضايقه..
وتهاني تشبحلها بعدين قالت:معاش شفتيه..
سارة:مني؟
تهاني؛هداكا خو صاحبتك..
سارة ابتسمت لما تفكراته وحركت راسها بالنفي...
ع طلعت رفيق..مد شكارة معبيه لساره..
سارة بصدمه؛هدا شني..
رفيق:خودي وهيا مش حلوة وقفتنا هني..
سارة خدت الشكارة ومشت وهي مضايقه .
تهاني؛بطله الجو هدا..
رفيق فنص فيها وقال:الحقيها تحركي..
تأففت ومشت لسارة..
وهو وراهم وعيونه ع سارة..
تهاني:سامحيني سارة ..
سارة؛علاش تتأسفي ماغلطتيش انتي اني الغالطه كان سكرت فمي وصبرت وخديتها في الإستراحه..
تهاني سكتت وهي مضايقه..
وصلوا لباصاتهم..
ركبت سارة للباص..
وقعدوا عيون رفيق المغرمات معاها لين درقت من قدامهم..
وطول الطريق وسارة مضايقه من اللي صار...
واول ماوصل باصهم للمدرسه..
نزلت ومشت للمدرسه الإبتدائيه اللي جنبهم..
عطت الكيسه للصغار وولت بسرعه لمدرستها..
الصغار وهما يفرقوا ع بعض..
واحد منهم طلع ورقه وقعد يقرا فيها؛هدا رقم..
التاني قعد يتهجا وهو يقرا:ع..طي..ني...فر..صة...عطيني فرصه..
كمكم الولد اللي فيده الورقه ولوحها وقال؛هي تعالوا نخشوا قبل يخشوا..
وخشوا يجروا...
وخلوا الورقه مدهسه للرجلين اللي تطلع وتخش وغطاها وسخ احذيتهم ومسح مافيها...
🍁🍁🍁🍁
"جاياتك زيارة"
فاتح وهو يخلط في حاجه في صونيه كبيره؛يس..
زياد؛مني..
فاتح ؛انت تقول من جايك اني نقولك من جايني..
زياد بضحكه:عليك تافه..اختي يازفت..
فاتح تحكم في ملامح وجهه بقوة وقال:اها..واني جايتني امي .
زياد بدهشه:جديات!
فاتح هز راسه وهو مبتسم بتهكم وقعد ساكت..
زياد؛بجديات فرحتلك..
ضحك فاتح نص ضحكه بدون تعليق..
زياد:باهي شن دير..
فاتح؛ترا برا من حداي برا..نفختهم راك..
زياد؛تمام تعالى للمرسم مرة تانيه واسألني ع حاجه..
فاتح بضحكة استفزاز؛بنجي وبنسأل..
زياد؛بنرد عليك ببوني يكسر سنونك..
فاتح قعد يضحك..
وزياد مشي وخلاه..
هدا فاتح ضحك وبعدين تنهد بإبتسامه ودقات قلبه تقوت..
وهو يخلط بقوة وبسرعه....
🍁🍁🍁🍁🍁
نهاية الدوام في المدرسه..
سارة ودانيه وهبه طلعوا من المدرسه .
هبه؛خوك الطرف جي حتى اليوم..
سارة شبحت للسيارة جو عيونها في عيون مجاهد..
غيرتهم طول وقلبها يدق بقوة..
دانيه بضحكه:راك مخطوبه..
هبه؛ياريته في ربع جمال خوك..
سارة شبحت لهبه برفعة حاجب..
دانيه؛مش حيجي في ربعه حد وخيي..امس خلاني نرقد في داره ع خاطر المكيف شافني بنتشفشف في النو..ومشي رقد حدا امي...تعرفوا نضت في الليل نشرب لقيته مقعمز حداها ويشوفلها..خاف عليها تصيرلها حاجه من البغدد..
سارة شبحتله..لقاته يشبح للقدام..تنهدت بكتمان...
هبه؛ربي يخليهولكم..ربي عوضكم بيه..
دانيه:آمين...هي خلاص سلام توا...
سارة وهبه :سلام..
مشت تجري لسيارة خوها وركبت...
وهو تحرك طول..وعيون سارة معاهم..
هبه:صاحب الموطو في جرتهم..
سارة؛خايفه عليها منه..
هبه:صح والله يخوف..
ع جية باصاتهم...سلموا ع بعض وكل وحده مشت ركبت باصها..
🍁في سيارة مجاهد...
دانيه خبطت بيدها ع جبهتها وقالت:حي نسيت..
مجاهد؛شني..
دانيه:ماعطيتش سارة الكتاب..
مجاهد سكت شويه بعدين قال:احسن..
دانيه بآستغراب:علاش..
مجاهد:هكي وخلاص...
دانيه قعدت ساكته وهي مستغربه..
اماهو قال في نفسه"الحمد لله"
🍁كان كاتبلها فيه ابيات شعر تعبر عن مشاعره بعدين ندم حس ان اللي داره غلط...وربي ماباش يخليه يكمل فيه لهدا ارتاح لما ماخدتش سارة الكتاب🍁
🍁🍁🍁🍁
وتمر الساعات..
ويجي وقت الزياره...
وسارة مشت مع بوها للمركز بش تشوف خوها...
مكان الزيارة كان الحديقه متاع المركز..
كانت مشرحة للصدر..منظرها يفتح النفس...
هيثم؛هونا غادي مقعمز ..
شافاته سارة ابتسمت بحماس وقالت:نمشي..
هيثم بإبتسامه؛بري...
تنهدت سارة ومشت خشت للحديقه وعيونها ع خوها...
اللي كان مقعمز يشبح لفاتح وهو مقعمز مع مراة كبيرة في العمر مستغرب فيها كيف تكون امها..ولاشكلها ولالبسها يوحي بذلك..
ومااستاقظش الا بضربة يده سارة لكتفها..
التفت شافها ناض وهو يضحك وضمها وقال؛شفشه..
وسارة ضم فيه وهي تضحك وعيونها معبيات دموع..
انتبهلهم فاتح وقعد يشبحلهم وعيونه على سارة..
المراة اللي معاه شافت وين يشبح بعدين شبحتله
وقالت:مبسوط هنى ياحبيبي؟
فاتح وعيونه ع سارة:هلبه..هلبه..
المراة:هو باين عليك ياقلبي وشك منور وصحتك ماشاء الله...
فاتح شبحلها وقال:ماقلتليش ماما انتي كيف جيتي اليوم وعلاش؟
:اااه ياحبيبي لو احكيلك اللي حصل فيا لما عرفت اللي جرالك كنت عايزة اطمن عليك اسمع صوتك..وماعرفتش اوصلك لغاية مارجع مفيد من السفر..فضلت اتحايل عليه عشان يجبني هنى واشوفك ومارضيش لغاية ماالبيه وافق..
ابتسم بتهكم..
:اوعى تفتكر ان في حد نسيك ..لاامك ولاابوك ولااخواتك..نرجس اخر مرة كانت بتحكيلي عنك وهي بتعيط..
فاتح وعيونه معبيات دموع؛وعلاش ماكلمتنيش...
:ماانت لو تعرف اللي هي فيه تعذرها..
عقد حواجبه وقال:خيرها!؟
🍁في جنبهم بمسافة ...
سارة؛مقهورة عليها قهر يازياد...
زياد بأسف؛الله يرحمها..
سارة مسحت دموعها وقالت؛يارب...بعدين قرصاته من خدوده وباستهم..
زياد بضحكه؛من غير عار..
سارة بضحكه:هادم ريحان وجنان قالولي شحي خدوده وبوسيهم..
زياد بضحكه؛استاحشتهم القطاطيس موت...
سارة ابتسمت..
زياد؛عندي ليهم هديه وين تروحي خوديها..
سارة:حتى اني جبتلك معاي حصتك من حفلتهم أمس..
زياد بإبتسامه؛واني داسلك حاجه...وقام الحافظه الصغيره المحطوطه بيناتهم..
هي قالت:شن هدا..
زياد؛افتحي وشوفي..
خدتها وفتحتها وقالت؛بان كيك! منظره يهبل..
زياد:ترا ذوقي وعطيني رايك..
سارة خدت الكاشيك اللي كان في وسطها وخدت منها وكلت بعدين قالت..امم خيال...عقدت حواجبها وقالت..من وين ؟!
زياد:من هني..
هي نزلت الحافظه وقالت:من هني!؟
زياد؛تعيفتي..
سارة؛لا طبعا...بس نبي من دايره..
زياد؛الوليد نفسه اللي طيب يوم المعرض..
سارة رفعت حاجبها وهي تشبح للبان كيك..
زياد؛مافيش واحد ماكلاه الا وشكر فيه موهوب الولد هو...
سارة؛باهي فهمنا..
زياد بآستغراب:خيرك..
سارة:انت بالغت هلبه..اني ندير فيه خير منه بهلبه..
زياد بضحكه؛ياودي باهي..
سارة؛تتسهوك! مالا باهي تو نديره نبعته مع بابا وهو بالذات خلي ياكل منه ويعرف الفرق..
زياد بضحكه:باهي يانغارة باهي..
سارة؛نغارة! وعلاش ان شاء الله..
زياد قعد يضحك لين عيونك دمعوا..
وهي بإحراج تقوله:خلاص اسكت...
🍁فاتح ؛حقير راجلها وهي تستاهل لانها ساكته عليه وماتبيش من يكلمه..
:هي خايفه ع ولادها..
فاتح:خايفه من الطلاق..
:ماهو خربان بيت..
فاتح؛ايه ماهو حوشها عامر هي بش يخرب يانوارة...
سكتت نوارة وهي مضايقه..
شويه سمعوا ضحكة زياد..
كلهم شبحوله....
وفاتح يشبح لسارة كيف تشبح حواليها وهي عاضه ع شاربها بإحراج وتجبد في يد خوها وتسكت فيه...
شاف الحافظه بيناتهم مفتوحه ابتسم..
سارة؛درت العار..
زياد بضحكه:منظرك يضحك وانتي ناغره من فاتح..
سارة:معاش تقول ناغرة..وبعدين من هو فاتح هدا؟
زياد ؛الولد اللي ناغره منه..
سارة؛عارفاته بس هو ولاحاجه بش نغير منه يابارد..
وزياد يضحك عليها وخلاص..
سارة ؛شن جابني اني بس..وغيرت عيونه عنه جو فعيون فاتح..
رفع حاجبه..
هي شبحتله من فوق لتحت وغيرت عيونه...
ضحك ضحكه خفيفه..
نوارة؛هي مين البنت دي؟
فاتح؛مش عارف والله ياماما...غير اني وين نشوفها قلبي يصكه الضي..
نوارة بضحكه؛يالهوي..دا حب بقا..
فاتح بضحكه؛يالهوي وياحي عليا.
ونوارة تضحك وخلاص...
🌷زياد هدا ضحك؛وقال:خلاص خلاص اهو سكتنا ماتقلبش وجهك واحكيلي شن جو القرايه الامتحانات قريب..
سارة:ايه اهو شاده بإيديا ورجليا..
زياد بإبتسامه؛موفقه..عقد حواجبه وقال..ايه وهديكا حماة عمتك شن جوها..
سارة بإستعباط:من حماة عمتي؟
زياد؛صاحبتك هديكا يادماغ اللي خوها واخد نوسه شن سماها ربي..!؟ ضيق عيونه زعميته يحاول يذكر..
سارة بضحكه:تهاني..
زياد؛ايوه ..شن صار فيها؟
سارة؛في شني .
زياد:تي مش مرة قلتي في واحد يضايق فيها ومش عارف شنو؟
سارة:مذكر هادي ومش مذكر اسمها..
غير عيونه عن اخته ووجهه ولى احمر..
ضحكت سارة وقالت:خبرت فيه خوته عطوه طريحه ومعاش شافاته بكل..
هو هز راسه بصمت ومعاش شبحلها..
سارة ابتسمت وقعدت ساكته..
زياد تنهد بعدين قال؛جلسه قربت مازال عليها عشرين يوم بس..
سارة؛خليك ملازم الدعاء والصلاة ع النبي وتسبيح يونس..
زياد شبحلها وقال؛زي النفس..
سارة:اهم شي تفائل واحسن الظن بالله..
زياد ابتسم وهز راسه بإيجاب..
شويه وطلع واحد من الموظفين وقال؛موعد الزيارة خلاص تم..النزلاء يخشوا داخل...
ناضوا سارة وزياد..
هو باس ع راسها وقال؛عيونك ع بوي..
سارة؛اطمن راده بالي عليه..
ابتسم وقال:سلمي ع الكل وبوسي القطاطيس..
سارة؛يوصل...
🍁نوارة:خد بالك من نفسك وشد حيلك وسيب البلاوي دي يابني ربنا يكرمك.
فاتح بإبتسامه؛انتي ادعيلي بس..
نوارة:والله ديما بدعيلك ياحبيبي..
فاتح؛ربي يحفظك ماما..
نوارة؛ويحفظك ياحبيي..مع السلامه..
فاتح:سلام...
ومشي لزياد وخميس جاهم...
ومعاهم باقي النزلاء خشوا داخل...
بعدها بلحظات طلعوا الزوار وروحوا..
ماعدا سارة مشت لبوها في مكتبه..
هيثم؛شن حستيه..
سارة:احسن من قبل بهلبه الحمد لله..بس يخمم في المحكمه..
هيثم تنهد وقال؛غدوة ان شاء الله بنشوف عمك احسان الباين في عنده شي يبي يقوله..
سارة؛ان شاء الله خير يارب..
هيثم وهويفكر بقلق:إن شاء الله...
🍁🍁🍁🍁
تاني يوم...
بعد صلاة الفجر...
كانوا هيثم وخليل ومعاهم جهاد من الجامع..
كان اول يوم ليه في الصلاة...
امه كانت فرحانه بيه بطير...وخليل كذلك..حس ان جهاد مش زي رفيق في التوبه..
رفيق واضح انه عنده غرض من وراها يبي يوصله والدليل عدم التزامه..
اما جهاد الفترة الاخيره واضح عليه التغيير..معاش يسهر برا الحوش..وجماعته علاقته بيهم شبه انقطعت ولاهي في الخدمة بس...
وهما ماشيين لما قربوا يوصلوا لحوش هيثم..
جهاد؛معليشي دكتور نبيك في موضوع..
خليل استغرب..
هيثم؛موضوع شني ان شاء الله خير!
شبح جهاد لخليل وقاله:بيني وبينه بس معليشي..
خليل قعد يشبحله بريبه بعدين قال؛تمام...السلام عليكم..
هيثم وهو يشوف لخليل؛وعليكم السلام..
خليل مشي للحوش..
يمشي ويتلفت لخوه وعنده فضول كبير يعرف شن يبي من هيثم..
جهاد؛معليشي نبي نتكلم معاك داخل..
هيثم هز راسه وقال؛مش مشكله..
التفت ع الباب وفتحه بعدين قال؛تفضل..
خش جهاد..وخش بعده هيثم وسكر الباب..
▪▪▪▪
◇حسيت ان في شي ورا تغييره المفاجئ بس ماخطرش ع بالي ولا واحد في الميه الموضوع اللي حكالي عني وقتها..صدمني..وهلبه...
▪▪▪▪▪
ع كراسي جنان حوش هيثم كانوا مقعمزين يهدرزوا....
هيثم؛باهي نمشي معاك نخطبلك ماعنديش مشكله..
جهاد ابتسم وقال:عارفك حتقول باهي..لكن قبلها لازم تعرف حاجه مهمه..وفي نفس الوقت نبي ناخد شورك فيها..
هيثم ضيق عيونه وقال:ان شاء الله خير! ان شاء الله نقدر ننفعك..
جهاد خدي نفس وقال:اني ...اني بناخدها بش نستر عليها..
هيثم؛كيف تستر عليها مافهمتش!؟
جهاد تنهد وقال؛قصة ملخبطه هلبه واني بروحي مش عارف كيف خششت روحي فيها ممكن لانها وجعتني وتخليت اختي مكانها..حرك راسه يمين ويسار وقال..مش عارف..اني بنحكيلك وانت شور عليا...
هيثم ركز معاه كويس...
🍁🍁🍁🍁🍁
الساعه الخامسه عصرا....
في معهد التقويه...
كانت البنت واقف قدام مكان في القاعه وهي تقول:هكي تمام...
ومشت طول لشنطتها..
شويه وخش جلال شافها ابتسم وقال:اوو جايه قبلي..
البنت:حطني بوي بكري هني..
شاف ساعته وقال:قدامنا ساعه نشرحلك فيها ع اقل من مهلي..وشبحلها وابتسم..
البنت ارتبكت وقالت:نجيك استاذ...
هو اشرلها بيده وقال:تعالي تعالي..
البنت"ايوه مدابيك بالحركات"
خدت الشيت ومشتله حطاته ع طاولته وخدت كرسي وقعمزت قدامه..
هو قال:كيف بتفهمي هكي تعالي جنبي..
البنت:لالا نفهم استاذ..
هو تنهد وقال؛ع راحتك..
وبدي يشرحلها وكان يتكلم بنفس نبرة الصوت الهاديه ع اساس يبي يأثر عليها
وهي مشمئزة منه ع الآخر..
عطاها بيرو وقال:ترا اكتبيها..
البنت خدت البيرو وبدت تكتب هو حط يده ع يدها وشدها..
هي جبدت يدها وهو شدها...
البنت:استاذ شن دير؟
جلال؛ارخي روحك مش واكلك راهو..اسمعي من الاخير انتي عاجبتيني هلبه..
البنت قعدت تفك في يدها وتقول؛اني جاية هني نقرا..فكت يدها من يده وناضت..
هو ناض وقال:نبيك جديات مش جو..تي اسمعي شويه..
وجاها شدها من دراعها..دفاته بقوة وقالت..حول غادي..
وجت بتهرب هوشدها وقعد يقول؛تعالي هني تعالي..
وهي دف فيه وتقول؛والله نعيط..
هو كانت غريزته الشيطانيه متحكمه فيه..
حط يده ع فمها وشدها..
هي عضاته بقوة وضرباته..
هو طلقها وقعد.يتوجع وهو يقول؛ااي يا...وقال لفظ نابي..
وهي طلعت تجري من القاعه....
البنت؛مريض هدا جدري يرفعه..
وقعدت تجري لين طلعت برا المعهد بعد مالفتت انتباه الموجودين ليها..
قعدت تمشي ع رجليها لين وصلت في البركيدجو..
وصلت في سيارة دقت ع روشنها..
نزل اللي فيها المرش وقال؛طلعتي تعرفي تضربي..
هي بضحكه:شفت كل شي ولا..
هو دق ع الشاشه متاع اللاب توب وابتسم..
:باهي كيف بتاخد الكاميرا من داخل..
:اني نتصرف انتي مالكش علاقه..
:فلوسي..
مدلها ظرف فلوس جت بتاخدهم وخر يده وقال:من تحبي اكثر اني ولاالفلوس؟
هي قالت:دقيقه خل نكلم مرتك نسألها..
ضحك وقال؛واطيه..خودي..
خدت الفلوس وقالت بضحكه:من يد مانعدمها...هي سلام ياحمام..ومشت في حالها..
وهو شبح للاب التوب وتنهد بعدين قال:لعيونك يافتوحه..
على مرش السيارة وشغلها وتحرك...
🍁🍁🍁🍁🍁
في نفس الوقت...
في مقهى البيرق...
كانوا مقعمزين مقابلين بعض يهدرزوا..
احسان؛قبل كل شي اني اسف..
هيثم بإستغراب؛على شني..
تنهد احسان وقال:البنت...اللي دافع عنها زياد وحماها من جلال..الشاهده الوحيده ع اللي صار...عرفتها من هي ليا مده..
رفع هيثم حواجبه وهو متفاجئ..
احسان؛عطيتها اكثر من فرصه حاولت فيها لكن هي من خوفها كانت رافضه..واخر فرصه جتها فرطت فيها...الفرصة هادي جمعتها بيك شخصيا..درت فيها معروف وتوقعت ترده لكن للأسف طلعت ماتستاهلش اللي درتوه معاها انت وولدك..
هيثم عقد حواجبه وقلبه يدق بقوة من التوتر شبه عرف من يقصد ومع هدا سأله وقال؛من هي!؟
احسان خدي نفس وقال؛رنيم...رنيم محمود رزق..
يتبع
