#البطل_المغمور2 "زهور القمر"
#جمان_فريد
#الجزء_الثالث "براءة"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
واقف في جنان حوشهم..
وهي واقفه عليه ومعاها جداها..
يتكلم وعيونه مش عليها وماد يده وفيهم ظرف فيه فلوس :خودي ياملاك ماتعصبنيش..
صالحه؛خودي منه يابنت..
ملاك وهي تشوف لخليل بحده وعيونها معبيات دموع:مانبي صدقة من حد..
خليل شبح لصالحه وهو يحاول يهدي نفسه بعدين شبح لملاك وقال؛صدقة شني ياتعبانه! انتي لينا بنتنا زيك زي تهاني لما يجي يوم وتتزوج من بيوتيها مش حني ماليها!؟ وحني ماليك انتي علينا حني كل شي ناقصك وتحتاجيه كل شي..حتى اليبرة مانبوهاش تنقصك..نبي الناس اللي بتمشيلهم وتولي منهم يعرفوا ان وراك عيله وراك تريس ياملاك مش بروحك..
صالحه عيونها دمعوا اثر فيها كلام خليل هلبه قالتله بنبرة باكيه؛ربي يحفظك ياولدي ربي يوقفلك ولاد الحلال وين ماتحط..
خليل:ربي يحفظك ويطول في عمرك ياخالتي..خودي ياملاك عيب عليك ليا ساعه ماد يدي..
هي طول خدت منه الظرف وخشت تجري بدموعها...
صالحه:ربي يفتحها عليك وين ماتمشي اني مطمنه عليها هي خوها ع الآخر دامكم موجودين
خليل:ربي يطول في عمرك ويحفظك ياخالتي..لكن في حاجه نبي نعطيك بيها علم ومانبيش ملاك تعرف عنها شي توا..
صالحه بإستغراب؛إن شاء الله خير!
🍁🍁🍁🍁🍁
"بالشويه ياريحان"
ريحان:باهي ياخويله باهي...سارة شن معناها الرسمه باهي..
سارة بضحكه:هدا اللي واقف زيزو واللي هني قلبه..
جنان:خيره هكي زي اللوزة..
ضحكوا ونسيبه قالت:هادم انتم ياقلوب اللوز..اللوزة لما تجي تفتحيها تنفتح ع زوز...يعني زي التوامه زيكم توا ان شاء الله فهمتوني.
ريحان:ااه..معناها حني قلبه..
ماجده بضحكه:ياوخيتي نجيها الشطورة..
🍁رسمه كانت واضحه بس تحتاج شرح للي في سنهم..
كانت عبارة عن جسد مرسوم بس ملامح وجهه كانت زحمة زهر اللوز وماشر بيده اليمين ع مكان قلبه اللي كان راسمه ع هيئة حبة لوز الفاصل بين جزئيها واضح...اللوحه كانت حلوة هلبه..وصلت اليوم بس من المركز..وجت معاها لوحة سارة اللي عرضها في المعرض🍁
فجأة رن تليفون سارة...
نسيبه:تليفونك سارة..
سارة:ايه..ومشت طلعت من حداهم بطريقها للصاله..
تليفونها كان محطوط ع طاولتها..
وصلت فيها وخدت هاتفها لقت المتصل دانيه..
فتحت الخط وردت:السلام عليكم..
"وعليكم السلام..باين عليك من صوتك ماتندري ع شي"
سارة بأستغراب:علاش شن صاير؟
"بري افتحي الفيس وشوفي بروحك"
ماكانش عندها صبر بش تسألها...طول سكرت عليها وفتحت الفيس وهي في قمة القلق..
لقت عدد اشعارات كبير...
مادورتش وقعدت تشوف في الصفحة الرئيسيه قابلها منشور لواحد من القروبات المشهورة ..
فيه فيديو مكتوب فوقه..
"تتفكروا في قضية ولد الوزير السابق هيثم الكاتب المتهم فيها بالتحرش الاعتداء ع استاذ في كلية الطب اسمه جلال الوافي اللي قال انه حمي البنت من اعتداء زياد عليها وزياد في التحقيقات قال العكس...شوفوا الفيديو هدا بش تعرفوا من فيهم الكذاب"
فتحت الفيديو وقعدت تتفرج..
كان وجه جلال واضح في الفيديو والبنت مش باينه...
قعدت تشوف وقلبها يدق بقوة...حاسه بدمها يفور ويغلي في عروقها...لما قربت تكمل الفيديو قعدت تنادي...
سارة بنبرة فرح باكيه:عمتو خالتي تعالوا شوفوا تعالوا..تعالوا..
جوها يجروا ومعاها البنات الصغار..
نسيبه بخوف:شن في..
ماجده بخوف:ان شاء الله خير ياربي...
مدتلهم التليفون وتقول:شوفوا شوفوا...
خدت نسيبه التليفون وقالت؛شن نشوف..
سارة وهي ترعش:عاودي الفيديو اللي قدامك عاودي..
عاودت نسيبه الفيديو وماجده تتفرج معاها..
ريحان:شن فيه ساره..
جنان؛حتى حني نبوا نشوفوا..
ونسيبه وماجده يتفرجوا وع وجوههم ملامح الصدمه..بعد تم...قعدوا يشوفوا في التعليقات..
كلهم كانوا يسبوا في جلال ويتكلمول بالخير عن هيثم وزياد..
ماجده بفرحه: الله اكبر...ظهر الحق..
نسيبه ودموعها نزلوا وهي تضحك؛نعرفه زيزو اني نعرفه اني مربياته راهو رااجل..راجل ياسارة..
وجتها ضمتها بقوة...وسارة ضمت عمتها وهي تبكي..
وماجده تشبحلهم وهي مبتسمه بدموعها اللي كانت تمسح فيهم..
ريحان:وحني مزهريات...!
سمعوهم شبحولهم وقعدوا يضحكوا..
جتهم نسيبه ضمتهم وقالت:واحلى مزهريات..
وسارة وماجده يضحكوا ودموعهم تنزل..
🍁🍁🍁🍁
"ريتي ياخالتي طلع ولد الكاتب صادق"
عفاف وهي تتفرج ع الفيديو:مش قلتلكم اني نعرف البنادم من خليقته..خزي مسخ خزي ربي سلط عليه من يضحه هالمعفن هدا..
تهاني بضحكه:خل نكلم سارة.....
عفاف:بري بري...
ومشت تجري تهاني لدارها..
سجى:واحد مريض شكله واحد زي هدا مفروض معاش يخلوه يخشها الكليه مرة تانيه..
عفاف:صدقتي..تفي عليه وع من رباه..هاك هاك خودي..
خدت سجى تليفونها..وعفاف وهي مبتسمه قالت:إن شاء الله ينفعه اللي صار ويطلع براءة...
🍁🍁🍁🍁
والفيديو انتشر انتشار النار في الهشيم وليبيا كلها شافاته..
ومش هكي وبس..بدت تنزل منشورات رسائل من الخاص للصفحات والقروبات...من بنات تعرضوا للتحرش من جلال..
وكانوا يقولوا ان اخلاقه مشكوك فيها حتى عند اعضاء هيئة التدريس بس كانوا يسكتوا عنه لأنه واصل وعنده معارف واقفين في ظهره....
بس بعد الفضيحه هادي هل مازال بيقعد حد يسنده ويرقع مصيبته هادي!؟
🍁جلال بعصبيه:ماشيله توا اني..
صديقه المحامي:ان شاء الله يرضى يشوفك بعد هالعمله السودا..قتلك قبل اني قتلك قعمز عاقل هني روحك لين القضية تم..لكن انت شي حيوان..
جلال بغضب:ماتخلنيش نفش غلي فيك..
:ومازال تعلي في صوتك انت!
جلال؛اسمع جاي كان تبي تسيبها القضيه سيبها تمام..
:لا ياكلب مش مسيبها مانخليهاش تتسجل عليا في تاريخي..دفه وقال..تحرك قدامي تحرك نديروا حل للمصيبه للي درتها نرقعوا عملتك يامريض..
مشي جلال وهو معصب بس ساكت..وصاحبه وراه نازل فيه وطلعوا من شقته...
🍁🍁🍁🍁
قدامه اللاب توب يتفرج ع الفيديو ويتكلم بالتليفون..
هيثم؛يعني الفيديو هدا ينفعه في القضيه..
"اكيد حيحرك الراي العام ويأثر ع القاضي"
هيثم؛باهي في حالة اثر عليه شن يصير بعدين..
"مانكذبش عليك شهادة رنيم توا اهم من كل شي هي بس اللي تقدر تغير مجرى القضيه لان حتقطع الشك باليقين"
هيثم تنهد وقال؛فهمت عليك..بس تعرف توا شن المهم عندي ان ولدي تبرأ قدام الناس وفي نظرهم..واول الغيث قطرة..وبالنسبه لرنيم خلي موضوعها عليا اني اطلع منه انت توا..
"تمام...براحتك..اي شي يصير معاك طول بلغني بيه"
هيثم:تمام...السلام عليكم...
احسان؛وعليكم السلام...وسكر..وقعد يشبح لتليفونه..
ويفكر في شي..يبي يديره ومصر عليك بش يشفي غليله منها اللي استفزاته بسلبيتها....
🍁 طول حط ع قائمة الأرقام..وقعد يدور لين وصل في رقمها..
اتصل بيها طول..
🥀وهي مقعمزة في دارها وتشوف في الفيديو وتذكر في هداكا اليوم ودموعها ينزلوا...
لولا الله ثم زياد راهي راحت فيها...وصار فيها زي هلبه بنات دار فيهم جلال مايبي وراحو ضحية ابتزازه ودنائته...
خطر عليها كلام احسان استحقرت نفسها وكرهتها..حطت يدها ع عيونها وقعدت تبكي بصمت..
لعند مارن تليفونها رن..
حولت يدها وشافتله..لقت رقم غريب اللي يتصل...
خلاته يرن لين فصل..وطول بعدها عاود..
هي بإستغراب فتحت الخط وقعدت تمسح في دموعها وترشف بعدين ردت:ايوه..
"مازال تبي تقعد شيطان اخرس"
عقدت حواجبها وقالت:شني!!؟
"مازال بتقعدي ساكته..بعد انفضح قدام الراي العام لو شهدتي مايضرك شي"..
ناضت من ع السرير وهي تقول:من وين جبت رقمي..
"مش هدا موضوعنا..شوفي يارنيم اني قاعد نعطي فيك في مهله..تعرفي ان الموضوع ينحل بالشرطه ولا انتي شاهده في قضية كبيرة بالإجبار يجيبوك.."
رنيم بصوت منخفض:انت علاش ماتبيش تفهم علاش..تعرف اني شن يصير فيها بعد يطلع اسمي والقصة هادي تنتشر..اقل حاجه حتصير خسارة سمعتنا بين الناس وبوي لاقدر الله يريح فيها....فضيحة وعار ليا اني...اني توا مخطوبه اول حاجه حيديرها خطيبي يسيبني طول من غير مايفكر..
"معناها مايستاهلكش"
هي سكتت...وفجأة بدون مقدمات حست بشعور غريب لما سمعت شن قال بنبرة صوت مختلفه..
"هدا الحق...واحد زي هدا ماتقدريش تأمني ع نفسك معاه لو القدام صار معاك شي تاني حيفرط فيك طول..وواضح انك تعرفي انه مايستاهلش بس مازال متمسكه بيه"
رنيم:انت شن دخلك فيا نتمسك بيه ولانخليه..اسمع ياانت ماتخلنيش نشكي فيك..
"شن بتقولي ..بتفتري عليا مثلا زي مادرتي في المستشفى..مانستبعدش عليك تلبسيني تهمه وتبهتيني وحده زيك انتي مانستبعد عليها شي"
رنيم ببكي؛حرام عليك ياسر..كلامك زي السم راهو زي السم..
"لأنه حق وانتي رافضتيه..ع العموم اني درت اللي عليا وحذرتك...ذنبك ع جنبك"..
وسكر عليها...
رنيم:ألو...الو.....
غمضت عيونها بشده ونزلت التليفون وقعمزت بهده ع السرير وقعدت تبكي بصمت..وعجز...وخوف...وقلة حيله...
🍁في هالوقت..
كان زياد مع صحابه يتفرجوا ع الفيديو في تليفون الدكتورة ثريا..
ماعدا فاتح اللي كان مقعمز ع الكرسي وفيده لعبة "الروبيك" يلعب بيها..
وثريا تشبحله..بعدين شبحت لواحد من النزلاء لما قال..
:هدا اللي صوراته الكاميرا بس الله اعلم بالمدسوس..
خميس:هدا علاش ماخليناش خواتي يقروا في الجامعه..
زياد عقد حواجبه وقال:وهدا هو الحل في نظرك تحرم اختك تكمل قرايتها...!؟ الشكالات اللي زي هادم موجودين في كل تركينه راهو حتى في وسط حوشك تلقاهم..المفروض اللي تصير معاها تحكي وتقول مش ترنب ودرق روحها وكأن هي اللي مدايرة العمله وتخلي اللي زي الديوث هدا واخدين راحتهم..
فاتح ابتسم وهو يشوفله..
ثريا بإبتسامه:مزبوط...جلال هدا اكيد في عنده هلبه ضحايا..اللي خلاهم يولوا هو سكوت اول ضحيه...وزي ماقال زياد النماذج هادم موجودين حتى في وسط العايلات اللي نسمعوا بيه يشيب شعر الراس..والضحيه ديما هي اللي ساكته ومدرقه والجاني يسرح ويمرح ويدير مايبي..
زياد:مجتمعنا يادكتورة السبب عقلية مجتمعنا وتفكيرهم..يعني زي توا شفت تعليق لوحده هاه ركزي
وحده قالت شن خلاها تقعمز معاه بروحها وكان هو ماشافش منها الضي الأخضر ماتماداش..
خميس:عندها الحق في نص كلامها...
زياد:لاماعندهاش الحق بكل..السافل هدا معروف يستغل في خدمته بش يوصل للي يبيه ويهدد فيهم بالدرجات..هدا واحد مريض ماينحطلاش مبررات..
واحد منهم قال:اه بس كاني برا وين ماهو نجيبه وونعطيه طريحه نطلع روحه..اللي درته انت يازياد يديره اي راجل عند غيريه ورجوليه..
فاتح:اللي زي زياد ولوا شويه..توا اللي يشوف حاجه يسكر عليها عيونه...وماشي بمقوله أخطى راسي وقص..
ثريا:لو كنت مكانه دير زيه؟
فاتح مط شواربه للأسفل وقال:مش عارف..
زياد:لادير زيي واشر كان طاح فيك انت ماتخليشي الا وهو مسلمها..
خميس بضحكه:واني نشهد..مغيار هلبه فاتح..
فاتح؛بالك ع عرضي لكن غيرهم مانعرفش الصراحه نقولك..
ثريا ابتسمت وقعدت ساكته..
قدملها زياد وقال:مشكورة دكتوره..
خدت منه التليفون وقالت؛العفو..هاه قولي شن تحس توا..
زياد؛وجهي ولى ابيض..وصفحتي ولت بيضا...ارتحت من هم كبير..عارف اني مش حننجى من الحبس نقول كلها فترة وتعدي..المهم حبس الناس ونظرتهم تحررت منه..
ثريا؛حلو هلبه..خليك بنفس الروح مهما صار..طال الزمان ولاقصر كل شي بان وربك طلعه للعلن..
تنهد وقال بإبتسامه:الحمدلله..
واحد منهم قال:لكن تعرفوا شكله دايرينله فخ ولا..
خميس:واضح حلال عليه اللي داره..
ابتسم فاتح وهو يشبح للروبيك..
ثريا:ربي سلط ع جلال امثاله وانتقم منه وفضحه ع الملأ بنفس الأسلوب متاعه بالزبط..
ابتسم زياد وهز راسه بدون مايعلق..
فجأة دق الباب..
ثريا؛تفضل..
انفتح الباب وبان هيثم وهو يقول بإبتسامه:السلام عليكم..
كلهم وهما يشبحوله ردوا عليه:وعليكم السلام..
هيثم:بعد اذنك دكتورة بناخد زياد..
ثريا بإبتسامه:مش مشكله..
زياد تنهد وحط ايديه في جيوبه ومشي لبوه..
هيثم:شكرا..
ثريا:العفو..
طلع هيثم وزياد طلع وراه وسكر الباب..
فاتح بإبتسامة حسرة:يابخته بيه..
ثريا شبحتله وع وجهها إبتسامة اسف..
🍁برا..
زياد؛اني فاهم وعارف..بس اللي يهمني توا اني برائتي قدام الناس بانت عرفوا من الصادق فينا ومن الكذاب..
ابتسم هيثم وقال:هدا اللي كنت متمني نسمعه...
زياد ابتسم ابتسامة جانبيه بعدين رفع حواجبه وقال:ماصار معاه شي تاني جديد..
هيثم حرك راسه بالنفي..
زياد هز راسه وقعد ساكت...
هيثم:مانبيش نشوف احباط بكل خليك ديما حسن ظن بربك..ووصية امك ماتخليهاش...دعاء يونس ماتخليشي...
الرسول اللهم صل وسلم عليه قال..
"ألا اخبركم بشيء إذا نزل برجل منكم كرب أو بلاء من بلايا الدنيا دعا به يفرج عنه؟
قالوله:بلى...يعني قوللنا شن هو ؟
قاللهم...دعاء ذي النون
..لاإله إلا انت سبحانك اني كنت من الظالمين..
زياد بأبتسامه؛واهو اول الفرج..
هيثم حط يده ع كتف ولده وقال:واخره يوم الجلسة إن شاء الله..
زياد؛إن شاء الله...
🍁🍁🍁🍁
وفات هاليوم...وجي اليوم اللي بعده...
كان سبت...
اول ايام اسبوع عرس ملاك..
هو مش عرس كبير...يومين..سهرية بسيطه وحفله في الصاله
بس ملاك مش حاسه بالفرحة نهائي..
ماسد بتتزوج واحد وقلبها مع غيره...ماسد انها بتعيش فرحة عمرها الناقصه بنقص زياده....وكأنها يتيمه...
الاب والأم اموات ع قيد حياة...
ولهالسبب عفاف مشتلهم هي وكنتها وبنتها بش تعاونهم وفي نفس الوقت تبي تحسس ملاك انها مش بروحها...
🍁"نحضر"
خليل؛ايه حبيبتي نبيك تحضري..نبي الكل يفهم ويتأكد من سبب زواجي منها قبل بالذات نيار واهله..
نسيبه بضيق:نحس فيها مش حلوة الحق..
خليل:عاديه مافيها شي خالتي صالحه عزمتكم لازم تمشوا وحتى امي بتكلمك راهو..
نسيبه قعدت ساكته وهي مضايقه..
خليل:شكلك جعانه ماتفكريش كويس وانتي جعانه..
شبحتله بطرف عينها..
ضحك وقال؛شن تبي نجيبلك..
نسيبه؛أي حاجه..
ابتسم وناض من حداها ومشي لمقهى قريب ع الحديقه اللي هما فيها..
وخلاها تفكر في كلامه...
🍁في مكان تاني..
قدام الورشه درست سيارة هيثم..
كانوا موجودين رفيق وجهاد فيها..
دار هيثم كلاكس..
رفيق؛الدكتور..
التفت جهاد وشافله..
اشرله هيثم يجيه...جهاد سيب اللي فيده ومشاله...
رفيق:وين ماشي!؟
جهاد:شويه وجاي..
قعد رفيق واقف يشبحله وهو رافع حاجبه..
وصل جهاد في سيارة هيثم طبس ع الروشن وقال:السلام عليكم كيف حالك دكتور..
هيثم:وعليكم السلام..اركب..
فتح جهاد الباب وركب..
هيثم؛الموضوع اللي كلمتني عليه زدت سألت عنه..نهنيك..اجرك عظيم..
جهاد؛غير يصير منه ويقبله ربي..
هيثم:انت وظنك فيه ياجهاد..
ابتسم وقال:باهي كيف يصير توا..
هيثم رفع حواجبه ومرر نظره عليه وقال:اللي بيصير توا انك بتوصل لأهل البنت بطريقه او بأخرى انكم جايين تخطبوا...
تمشي الوالده في الأول..بعدين حني كله حسب الأصول..
جهاد؛نخاف يردوا امي ويهينوها يادكتور..
هيثم:لامايديروهاش هي مش جايه تاخدها بالسيف عليهم هي بدير الاصول..وفي نفس الوقت بش يبان الموضوع طبيعي...
هز راسه وقال:تمام..
هيثم:حاجه تانيه ومهمه..هيئتك..
جهاد شبح لنفسه..
هيثم:لازم تتغير لو جيت بتخطب بنتهم وانت بالشكل هدا من الباب يلزوك..
جهاد بضحكة احراج:تمام..
هيثم:خلاص ابدا دير اللي قتلك عليه بسرعه في التآني الندامه في موضوع زي هدا..
جهاد بإبتسامه؛تصدق..توقعتك تنسى الحكايه كلها بعد اللي جد في وضع زياد..
هيثم؛ماقدرتش ننسى..ربي حطني في طريقك بش ناخد حتى اني اجر مش غير انت تبيني نفرط فيه..
ضحك جهاد..
هيثم؛بس قبل كل شي في كلام نبي نقوله ونبيك تسمعه وتفهمه كويس..
جهاد بتركيز:نسمع..
هيثم تنهد وقال:لو صار وخديتها رد بالك تعايرها في يوم ولاتحسسها بشي من الإهانه...هي عارفه غلطها ومعترفه بيه ونادمه عليه ع حسب مافهمت من كلامك الباقي يقعد بينها وبين ربي...فهمها من توا ان زواجكم مؤقت ماتخليهاش تتأمل معاك بشي بش ماتنكسرش اكثر بعدين..حن عليها واكرمها بش ربك يقبل توبتك ياجهاد..انت جاتك فرصة فريده للتوبه ماتجيش لأي حد ياجهاد...رد بالك ضيعها..
جهاد هز راسه وقال:ان شاء الله..بس زي ماوصيتك دكتور كل شي يقعد بيني وبينك بس...
هيثم:لو كنت عارف انه حيطلع مني ماجيتش وحكيتلي..
ضحك جهاد وشبح القدام وهز راسه بأيجاب..
هيثم :باهي هي انزل..خديت من وقتي هلبه..
جهاد بضحكه؛حاضر...بارك الله فيك دكتور..
هيثم:يبارك فينا جميعا..
فتح جهاد الباب ونزل..وسكره..
وهيثم تحرك طول..قعد جهاد بعيونه مع السيارة لين اختفت..
بعدين لف ومشي خش للورشه..
رفيق:شن القصه!؟
جهاد بإبتسامه؛الراجل هدا مش عارف كيف كنت مانطيقاش..
رفيق؛حتى هو ماكانش يطيقنا.
جهاد ضحك..
رفيق:قول شن مني..
جهاد؛شي موضوع بيني وبينه..
رفيق:موليين غامضين انت وخوك واني زي الأطرش في الزفه..
جهاد؛مافيش حد زي الاطرش بالزفه غيري اني بيناتكم..
رفيق:باهي قول شن في من غير جو فروخ.
جهاد:بنخطب..تريحت..
رفيق بتعجب؛كيف صار!؟ بتعقل قصدك..
جهاد مشي للسيارة اللي يخدم عليها بدون يرد..
رفيق:تبيه يمشي معاك يخطبلك..شكلها بنت باشا هادي..
جهاد؛خليك في خدمتك خيرلنا..
رفيق ضحك بتهكم وقال:جهاد بيتزوج..شكلها قربت..
جهاد شبحله وقال:شن هي !؟
رفيق:نهاية العالم..
جهاد ضحك بسخريه وقال:ماخف دمك..
ورفيق يضحك عليه..
🍁🍁🍁🍁🍁
"تو انتي ملزومه تجري وتلهدي ع عزومة ماليها تجي هي تتحرك بروحها مرض"
سدينه:نقصي حسك هي جاية تعاون..
رتاج بتهكم؛كثر الله خيرها..!
ع خشة دانيه وهي تساوي في حوايجها كيف روحت من المدرسه بدلت وجتهم:وطي صوتك فكينا من المشاكل..
رتاج:خيركم خايفين منها هكي!؟
دق الباب..
سدينه:شكلها هي بري افتحي يادانيه..
مشت دانيه طلعت..
ورتاج من الغيظ قعمزت ع الكرسي وحطت رجل ع رجل..
شويه وخشت مقبوله وهي تحول في قفازاتها وتقول:السلام عليكم..
ردوا عليها السلام ماعدا رتاج اللي كانت تشبحلها برفعة حاجه..
حولت مقبوله الملايا ومدتها لدانيه وقال:علقيها هني معليشي .
فنصت رتاج..
خدت دانيه الملايه وهي تحاول تكتم غيظها..
مقبوله قعدت تساوي في وشاحها وهي تقول:هاه شن وتيتي..
سدينه:اللي قلتي عليه كله..
مقبوله:باهي صحيتي ترا معليشي اطلعوا خلوني نحوس براحتي..
رتاج؛وعلاش ماطيبتيش في كوجينتك..
سدينه فنصت في دانيه..
مقبوله التفت شبحت لدانيه بعدين ابتسمت وقالت:الكوجينه هديكا جديده مانبيش نفسدها..والتفتت القدام وبكل هدوء بدت تغسل في الخضرا..
رتاج بتهكم؛اها قصدك بتقلبيها صالة استقبال اللي يجيك يقعمز فيها..!
مقبوله ولاكأنه في حد يدوي حداها..
سدينه؛هي اطلعي..
رتاج؛طالعه يام بس بعدك انتي..
سدينه؛هاني طالعه..ومشت طلعت وهي متوتره..
ورتاج مشت طلعت بعدها وسكرت الباب بقوة قريب قلعاته..
ضحكت مقبوله بتهكم وقالت بصوت منخفض:استغفر الله العظيم..الله المستعان..
🍁🍁🍁🍁
ومازال فضيحة جلال تتناقلها المواقع والصفحات وألسن الناس اللي مخلوش عليه ستر مغطى...
ومن خوفه من ردود الأفعال حبس روحه في شقته ماقدرش يطلع منها...وحتى الراجل اللي عابي عليه يساعده..طالع برا البلاد ومسكر تليفوناته...
المهم في اللي صاير كله رنيم..
اللي بشهادتها بس تقدر تبرأ زياد براءة تامه وتبطل الدعوة اللي رافعها جلال...ويقعد بس لزياد المحاسبه ع الحق العام..وع فترة الإدمان...
رنيم كانت موجوده مع زميلات وزملاء ليها يحكوا عن نفس الموضوع في المستشفى..
:حقير من يومه وربي فضحه..
:مافيش بنت ماجاها منه شي حتى بالنظر..
واحد من زملائهم:تتفكروا في العركه اللي صارت بينه وبين الدكتور محي الدين لنفس السبب وفي الاخير فصلوا الدكتور محي..
:اهو جاه من فضحه وشهدر بيه المريض هدا..
:الحق واجعني الوليد اللي رمي عليه بلاه..
:توا خلاص بعد طلع الفيديو بان كل شي..
:ايه لكن سألت بابا قال الفيديو حيأثر ع سير القضيه لكن مايقدرش يبرئه تماما قال ماعنداش حل غير البنت اللي صار ع خاطرها المشكله تشهد لصالحه..
رنيم تسمع في كلامهم وتحس في شي يخنق فيها من رقبتها..
ماقدرتش تتحمل تسمع اكثر تنحنحت وقال:بنمشي للكافتيريا ناخد قهوة من يبي تاني..
؛اني جيبيلي معاك.
رنيم؛تمام والباقي..
باصوات متقطعه؛لاا..مشكورة..صحيتي..
هزت راسها ومشت..نزلت منها دمعه مسحتها طول ..
قعدت تمشي وعقلها مع اللي صار..
مع كلام زملائها..
كلام بوها وخوها لما شافوا الفيديو امس اللي مايفرقش عن كلام كل الناس..
وكلام احسان..الأقسى والأعنف...
شدت دموعها بالسيف وهي تذكر فيه..
وفكرت لو قال لهيثم الكاتب عليها...لو عرف..شن اللي ممكن يديره وكيف حيتصرف..
ردة الفعل مخوفتها خصوصا بعد الموقف اللي جمعها بيه..
تشبح في عيونه وتكلم فيه عادي ولاكأنها هي السبب في اللي عاناه هو وولده وعيلته الشهور اللي فاتت..
وفي عز تفكيره بيه..
ضيقت عيونها لما حست وكأنها تشوف..
معقوله من كثر ماتفكر فيه بدت تتخيل فيه!؟
توسعوا عيونها ووقفت في مكانها لما تأكدت انها ماتتخيلش..
اللي جاي ناحيتها وواللي وقف قدامها وقاللها بإبتسامه..
"السلام عليكم دكتورة"
هو...هيثم الكاتب....!
🍁🍁🍁🍁
"من اللي كانت تكلم فيك توا خالتو"
ماجده بإبتسامه:ابله لجين..
جنان؛يععع..
ماجده عقدت حواجبها وقالت:جنان!
جنان:نكرهها دره في الكبد..
ريحان:حتى اني..
ماجده:علاش شن دارتلكم؟
ريحان وجنان قعدوا يشبحوا لبعض..
ماجدة:تقول شن ريتوا منها ولاسمعتوا؟
جنان رفعت كتافها وقالت:شي..لكن
ماجده:لكن شني..
ريحان بتردد؛نحسوا فيها ولا...وشبحت لجنان وهي منحرجه..
ماجده:تي تكلموا..
جنان:نحسوا فيها تحب بابا..
وتنفجر ماجده ضحك..
وهما يشبحولها بضيق..
وماجده تضحك وتقول:يعطيكم الهني...وووه عليا جنابي.. وتضحك..
والبنات زادو تضايقوا...
ريحان:خالتو علاش تضحكي..
هدت ضحك وهي تقول:عطيكم السلامه..حتى انتم لاحتظوا مش غير اني..
جنان:لالا مانبوش وحده تجي بعد ماما..ودموعها نزلوا..
بدت تخفت ضحكة ماجده..
وريحان بدت تبكي بصمت.
ماجده شبحلتها وقالت؛لالا ياقلبي لا مافيش مراة تجي بعد ماما بكل بابا مايحبش مراة غيرها..
جنان؛حقه خويله..
ماجده؛حقه ياعيون خويله..اني نبصر عليكم ابله لجين صاحبة نوسه وبس وتعز بوكم زي خوها بس..بس..
هدت ريحان بكي وبدت تمسح في دموعها..
باستها ماجده ع راسها بعدين باست جنان وهي مضايقه واجعها ولد اختها..
○○○○○
♤لالا مش انانيات لكن نحبوا بابا..البنت لما تحب بوها ماتبيش مراة تانيه تاخده منهم غير امهم بس..شن رايك انتي جنو..
..رايي من رايك سويتي طبعا..بابا متاعنا حني وبس..
ريحان بضحكه...لكن مرات يوجعوني النساوين اللي حبوه..
..ايه صح...حتى هو بابا شخصية وجاذبيه حبيبي مانلومهم..
وضحكوا الزوز...
○○○○○
🍁🍁🍁🍁
"ماارتحتش لحظة النوم نسيته..انت مش حتعرف اللي اني حسيت بيه الشهور اللي فاتت"
هيثم؛لافاهم وعارف لاني عشت اضعافه..كان انتي عشتي في خوف..اني عشت في رعب ع مصير ولدي اللي لو حكموا عليه بتهمة الشروع بالقتل بس حيكمل عمره في الحبس وممكن يموت من اول سنه..مانبيش نحكيلك اللي صار فيا وفي خواته وكل من يحبه الفترة اللي فاتت...بس نقولك حاجه وحده...كله بسببك سكوتك انتي عن الحق...
رنيم ودموعها ينزلوا:ولا حنعيشه اني واللي يصير فيا لو الناس عرفتني وانفضحت مافكرتش فيه..
هيثم:فضيحة شني..انتي ضحية مش جاني وهو مريض والناس كلها شهدت وبعدين من قال انه اسمك حيطلع للعلن مافيش حد حيعرف حاجه الاكم نفر بس..
رنيم:القضيه ولت قضية رأي عام اي طرف فيها حيطلع اسمه للعلن....
هيثم:نبي نفهم في شن حيضرك..ولو انضريتي حجم الضرر حيكون بسيط قدام حساب ربي اليوم وغدوة..انتي شفتي بوك شن صار فيه..هدا كله ومافهمتيش انها رسالة تحذير!؟
نزلت رنيم عيونها ودموعها ينزلوا وقالت:اسفه دكتور..مانقدرش نضيع سمعتي وسمعة عيلتي..
هيثم قعد يشبحلها شويه بعدين قال:ولااني نقدر نفضح عيلتك ونرضى نخلي الشرطه هي اللي تجيبك...لكن صدقيني حنقعد نتحسب عليك في عليك في كل وقت وحقي وحق ولدي خليناه لله ياخده منك زي ماخداه من جلال اللي قاعده تحمي فيه...
وناضت بعصبيه دف الكرسي ومشي...
وخلاها تحس بألم فضيع في صدرها وكأن في سكاكين قاعده تخش فيه وتطلع...والقشعريرة ضربت جسدها كله خوفا من دعاه عليها...والاشمئزاز ملاها تجاه نفسها لما سمعاته قال...
"جلال اللي قاعده تحمي فيه"
🍁🍁🍁🍁
بعد العصر..
"وانتي يادقن تركبيلها في السمسام فوق تخدمي عندها هالكلبه"
دانيه؛وشن تبيني نقول لا بش بوك يسودلي عيشتي خاشه ع امتحانات راني مش ناقصة هم..
رتاج سكتت وهي تشوف من فتحات البرسيانه:اهما جو...
ووك عليا كم وحده هادم..وحده تنين تلاته..حيي 9 نساوين..
دانيه؛من اللي دايراته واضح شكلهم عيله ملتزمه..شوفي الراجل اللي جابهم لحيته لبطنه..
رتاج:اني بعد بوك معاش ولى عندي ثقة فيهم الجماعه هادم من برا منظر ومن داخل شيخ منصر ع قولت المصاروة..
دانيه بقلق؛يستر الله وخلاص...
🍁فهالوقت مجاهد وصل للحوش مروح من عمله في الزاويه..
خش العمارة وهما قدامه..
عمران خو مقبوله؛اوقفي انتي وياها..
وقفوا كلهم..
وهو مشي خطم من حداهم وعيونه لوطا..
والنساوين من تحت الخمارات عيونهم فيه قريب ياكلوه بيهم..
عمران؛هيا تحركوا..
طول مشوا ركبوا وهو وراهم..
لما وصلوا في شقة سدينه قعدوا يشبحوا لمجاهد وهو فاتح الباب وخاش..
وهما كملوا لفوق...
لين وصلوا في شقة مقبوله..
🍁🍁🍁🍁
فهالوقت في حوش خالد..
في الجنان كانوا مفرشين حصيرة ومقعمزين في البروده..
لكن الموضوع اللي فتحه جهاد سخنهم..
عفاف:بتتزوج مرة وحده؟!
جهاد؛لا ع مراحل..
ضحكوا تهاني وسجى وخوته..
خليل بضحكه؛مكسد!؟
رفيق بضحكه؛يحكي منه جد فتح الموضوع حتى مع الدكتور هيثم.
خليل؛اهاااا صار هو هدا الموضوع اللي كلمته فيه..باهي علاش جو الدس من الأول..
جهاد:استعينوا ع قضاء حوائجكم بالكتمان..
تهاني بضحكه؛شكلها شيخه..
ضحكوا كلهم..
جهاد بامتعاض:دعاك خوك!
عفاف بضحكه؛غير قول الحق..
جهاد بإنفعال؛علاش بنكذب عليك يام بنتزوج الزفت زيي زي ولادك ولامايطلعش عليا..
خليل:نقص حسك..
عكرش وجهه وقلبه عن خوه..
عفاف بضحكه؛دير عقل وتو نزوجك..
شبحلها وقال:درته يام..وهاني جيتك وقتلك بنتزوج..
عفاف؛الزواج مسؤوليه مش لعب ولاطهقه..
جهاد؛شن قالولك عليا مش راجل..
عفاف:لا راجل بس مازال عليك شويه..
جهاد؛لا خلاص هداكا هو عمري 25يام..
عفاف:توصل 35 وحاضر نخطبلك 4..
ضحكوا..
جهاد؛تتسهوكي يام واني ندوي مني جد وحارق دمي..
خليل:باهي من هي اللي تبيها هادي..
عفاف؛وحده من فرخات هالوقت تلقاها مش قادره تقد روحها..
جهاد؛يام..
عفاف:هدا الحق..اني مانبيش كنه عوجه تجيبها وحده زي مرت خوك خليل يابلاش بكل..
سجى شبحت لخالتها برفعة حاجب..
ورفيق تنهد بحسرة..
جهاد؛مرت خليل ع عيني وع راسي..حتى اني اللي نبيها بنت عيلة وناس..وتقرا طب زياده..
رفيق:اووبا..
خليل:العب!..
تهاني؛شورك موكلها بسبوسه..
ضحكوا..
جهاد:بضمي فمك ولانمدك تنين تلاته ع زومتك..
عفاف:تمد عينك..وبعدين تعالى جاي جد تحكي انت؟ تقرا طب تاخد واحد واخد ساقط في الشهاده الثانويه اللي عاودها مرتين!!؟ شكلها مافيها ماينشبح وماصدقت حصلاتك ودارتلك خطين..
جهاد؛ديما هكي انتي يام ديما شايفتينا دون الناس واقل منهم..تعرفي الراجل هو جارنا..هيثم الكاتب اللي كان مايطيقش يشوفنا لما فتحت معاه الموضوع وقتلك نبيك تجي معاي وتخطبلي احترمني وقال كلام عمري ماسمعته في حياتي من حد حتى نظرة الهزوة في عيونه ماريتهاش مش انتي امي وديما مكسرة مجاديفنا ومطيحة قيمتنا...اهو خليل اللي كنتي ديما نازله فيه ربي هداه وناسب احسن ناس وولى يقرا لما طاح في مراة تقدره وتحترمه شاف منها اللي ماشافاشي منك يام..واني نبي مراة نشوف منها اللي ماريتاش عندك..
كلهم كانوا مصدومين في جهاد..داس هدا كله في قلبه وساكت وهما اللي يحسابوه بارد ومايأثر فيه شي..
عفاف وجعها الكلام هلبه بس مابتش تببن وقالت:باهي غدوة ارفعنا لحوشها اني وخالتك ومرت خوك..
جهاد بلع ريقه وهز راسه وقال:تمام...بعد العصر..
عفاف هزت راسها وقالت:خل نخش نكلم خالتك..وناضت مشت خشت داخل..
رفيق:زودتها ياهو..
تهاني؛كلامك حار وفيه ظلم..
جهاد؛ماقلت الا الحق..وناض ولبس في رجليه ومشي طلع من الحوش بكل..
خليل؛حتى هي امي ربي يهديها هو يدوي جد وهي هازيه عليه..
تهاني:حتى انتو هزيتوا..
شبحوا خليل ورفيق لبعض وقعدوا ساكتين..
🍁🍁🍁🍁
"الله يبارك ع شقتك يامقبوله"
مقبوله؛تسلمي..
اختها؛كوجينتك تلمع لمع ومافيش ريحة تطييب رغم اني شفت اشكال الوان مسلفر ع الطاوله..
مقبوله بإبتسامه؛طيبت لوطا..
وحده.تانيه.من خواتها:الله!
مقبوله؛ماعندي علاش نفسد في الكوجينه جديده قاعده علاش نبهدل فيها من اول سبوع..وبعدين كوجينتهم لوطا طايح سعدها قديمه وحالتها قلت لمجيد نطيب لوطا قالي ديري اللي يريحك..
مرت خوها:وضرتك..
مقبوله:مراة ع نياتها لاتهش لاتنش..
اختها؛باهي قوليلي وحني راكبين شفنا خليقة واحد يخلع القلب راك تقولي ولدها؟
مقبوله؛تحشمي..وبعدين ايه ولدها وعندها غيره ولد تاني صغير وزوز بنات...وحده منهم متزوجه...لكن سافرة الله المستعان..جايه ولابسه الملون والمكياج وريحة العطر تجيب من اول الشارع..الله المستعان..
خواتها ونساوين خوتها بأصوات متقطعه:الله المستعان..
وحده من خواتها :والتانيه؟
مقبوله؛تقرا في المدرسه حتى هي سافره..المشكله هما قنينات يفتنوا ومعرضات للفتن...مش عارفه كيف بوها راضيلها تخش مكان مختلط..مفروض دخلها مدرسة سلفيه درءا للمفاسد..لكن شن بديري ماعنداش هداكا الحكم عليهم الحكومه فيد خوهم..
؛هداكا الغزال خله والله يحكم ويطلق..
ضحكوا..
ومقبوله بضحكه:الله المستعان يامفيده الله المستعان..تحشمي..
:ياوخيني ان شاء الله ربي يغفرلي لما شفته كرهت راجلي..
اختها التانيه:كلنا كرهناهم..
قعدوا يضحكوا..
مقبوله؛غضوا البصر عطيكم فقصه باهي..
قعدوا يضحكوا..
ومقبوله وهي شاده ضحكتها قالت..استغفر الله...الله المستعان..
🍁🍁🍁🍁
مقعمزة ورا طاولتها تقرا في كتاب وحي القلم للرافعي..
كانت فيه فقرات مظللم مجاهد..حستهم رسايل موجه ليها..
برغم اسلوب كبير هلبه ع اللي في سن سارة بس كانت تفهم في اغلب مايكتب..
وقفت قرايه وسرحت بتفكيرها في مجاهد
وتخيلت لو ربي كتبلهم في بعض نصيب قداش حتكون سعيده معاه لأنها حاسه انه يكمل في الناقص فيها كله..وهو اكبر منها ومطلع وعارف اكيد حتتعلم معاه هلبه حاجات وتتعلم منه...
اكثر شي فرحانتله انها لو خداته حتكون دارت في صغارها مستقبلا اكبر معروف اللي اختارتلهم اب زيه..
راجل متدين..ومثقف..وحنون..وبار بوالديه..وخلوق...شن تبي اكثر من هكي.
البنت السويه واللي تبي دير عيله ترفع الراس شن تتمنى يكون في راجلها غير اللي في مجاهد..
تنهدت وغمضت عيونها وقالت..
"يارب اجعله من نصيبي"
🍁🍁🍁🍁
"تستاهل وزنك ذهب"
:مش لهدرجه نص وزني ونكون ممنون..
فاتح؛شورك ماصدقت نافق فيك راهو..
؛تافه..
فاتح؛طالعلك...المهم توا بعد مانهيت موضوع الوافي.
نبيك تشوفلي موضوع تاني وضروى هلبه يازهير..
زهير:موضوع شني قول حسك خوفتني..
تنهد فاتح بضيق وبدي يحكيله..
عن حالة اخته..ووضعها مع راجلها..
نرجس اخت فاتح الوحيده ترتيبها قبله بالزبط...
متزوجه وعندها زوز صغار..تزوجت بعلاقة...
اول سنه فيها مرت عسل..وبعدين بدي الحنضل..
طلع يشرب...ويسهر برا الحوش للفجر..
وتشك فيه لما تمشي لحوش اهله انه يجيب في نساوين في الحوش..
ماقدرتش تطلب الطلاق خوفا من لقب المطلقه...وكذلك خوفا من لوم اهلها ليها كانوا رافضينه وهي اصرت عليه وحاربت لين رضوا مجبورين..
واهي توا قاعده تتجرع في مرار الندم..
مروحه من حوش ماليها لحوشها..
لقت وضع الحوش مبهدل...
ودار نومها حايسه...كانت منقرفه من كل شي..
لمت كل.شي فيها وبتلوحه كالعاده..
وصلت بيها دور ورا حوايجه وتشم الريحه بش تتأكد لو جاب نساوين حق للحوش...
بس كل اللي كانت تشم فيه روايح رجاليه مع ريحة الخمر..
وهالشي مخليها مش فاهمه حاجه...
مافيش اثر لوجود نساوين في حوشها بش وضع الحوش يبين عكس هكي...
كالعاده لمت كل شي بمساعده الشغاله ولوحاته كله...
وقعدت تنظف في الحوش هي وياها ودموعها ع خدها...
🍁برغم انها بنت ناس واصله في البلاد بس ساكته ع الوضع اللي هي فيه خوف من بعبع الطلاق...اللي هلبه ناس من اي طبقه من طبقات المجتمع تشوف فيه عيب كبير...
مش عارفين ان في عهد الرسول اللهم صل وسلم عليه..كانوا في نساوين يخلعوا في رجالتهم لانهم مش متقبلين اشكالهم..
يعني كانت المراة تجي للرسول تقوله بنطلق من زوجي وهو مايبيش..
يسألها...هل لعيب فيه..
تقول لا..هو كويس ودينه كويس واخلاقه كويسه لكن ماقدرتش نحبه شكله مش عاجبني.
مايناقشش فيها نهائي...يقوللها رديله مهره وتنازلي عن مؤخرك وتمت..يعني المراة مش مجبورة تعيش مع راجل ماتحباش بغض النظر عن السبب...
طبعا هذا ليس من باب التشجيع ع الطلاق والعياذ بالله طالما الحياة مستقرة وفي اطفال حافظي ع حوشك ع قد ماتقدري مادمريش استقرار صغارك ونفسك لاسباب تافهه....لكن القصد لما تولي الحياة مستحيله مع الطرف الثاني الطلاق هني يجي في صورة الرحمة للجميع...
وفي النهايه النصيحه الأفضل...اختاروا صح من البدايه..وابدوا صح بش الرب يبارك ويطرح فيكم الخير🍁
🍁🍁🍁🍁
"ان شاء الله غير روحوا راضيين"
مقبوله؛والحمد لله..بس راهو اخر الاسبوع معزومه عند اختي فضي روحك..
مجيد:ان شاء الله..
مقبوله وهي تحدد في ملايتها؛مجيد..مستغربه في بنتك الكبيرة كيف مخليها راجلها تطلع سافره هكي..
مجيد؛عندي اني كان مايبان منها شي وهي توا في حكم راجل ماعندي مانديرلها..
مقبوله:الله المستعان..باهي والتانيه..وجهها جميل يامجيد غلط تطلع هكي وتقرا في مدرسه عاديه..ننصحك دخلها السلفيه..
مجيد؛الحكم لخوهم في الموضوع هدا مش ليا قتلك قبل..
مقبوله؛ربي يهدي وخلاص..لكن ننصحك بعد تطلع من الثانويه زوجها طول..
مجيد:ياريت بس من بياخد وحده مريضة سكر..
مقبوله:اني عندي ليها حد مش حنقول عليه توا..
مجيد؛هدا مانتمنى نزوجها ونرتاح من همها هي الاخرى..
مقبوله؛ايه وولدك الصغير..توا جت العطله مفروض يخش لحلقة تحفيظ قرآن كريم..
مجيد؛مفكر فيه الشي هدا..
مقبوله؛لاتمشي هني ولاهني...خوي عمران قديم هلبه في التحفيظ دخله غادي.
مجيد:ان شاء الله ان شاء الله...
خدت ملايتها وعلقتها...
وهو يشبحلها قال:حلقومه مافيش ماناكلوا بكري قعدت نقش تنقيش قدام خوتك ورجالة خواتك..
مقبوله بضحكه:في في..خل نمشي نحطلك ونجي..
مجيد:خليك ديما تضحكي بالله عليك..
ضحكت تاني ومشت طلعت من حداه وهي تحرك في راسها يمين ويسار وهو مسح ع لحيته وقال بصوت منخفض..مش زي اللي قبلها صح..لكن حتى هي باهيه..مش خاطيه مش خاطيه..
🍁🍁🍁🍁
الساعه 12:30ليلا..
مقعمز ع سريره وبين ايديه الآيباد..يقرا في تعليقات الناس ع الاحداث الاخيره..وكله كلام حلو جبر ماانكسر فيه وخلاه يزيد يرفع راسه بولده..
بس رنيم كانت زي الغصه..اللي مخلاتاش يفرح ببراءة ولده قدام الناس..
مرة يقول نخبر عنها ونخليهم يجيبوها غصب عنه..
بس يخاف ويتراجع خاف لو يرتكب ذنب بدون مايعرف يحل عليه بيه سخط الله...
وفي نفس الوقت ولده اللي حيضيع مستقبله وضيع حياته..!
حطه اللاب توب ع تركينه
وخدي المصحف وفتحه ع سورة آل عمران وقعد يقرا..
في الاول كان مخنوق هلبه بس شويه شويه بدي يرتاح...
قعد يقرا ويقرا لين كمل السورة وفي اخرها اكثر آية يحبها...
"ياأيها الذين ءامنوا اصبروا وصابروا ورابطوا واتقوا الله لعلكم تفلحون"
▪▪▪▪
◇واتقوا الله لعلكم تفلحون..هني مفتاح الفلاح في الدنيا والآخره...واني كنت خايف من ربي هلبه في كل شي نديره والخوف من الله خوف محمود جدا..لأنه يخلي البنادم مستقيم ع قد مايقدر..لايظلم نفسه ولايظلم غيره..
إن الله مع الذين اتقوا...والحمد لله كان ديما معاي..
▪▪▪▪
ناض وطلع من داره...
دار طلة ع التوأم في دارهم...
وشاف خالته كيف راقده حداهم..ابتسم ومشي بيشوف سارة..
لما وصل لدارها سمع صوت ناصر القطامى ابتسم عرفها راقده...
لف وبيرجع لداره عيونه جو ع دار زياد..
مشالها..وصل قدامها فتح الباب وخش...
اول ماخش شم ريحة اسيمه...الدار ع حطة يدها من لما ضمتها اخر مرة..بعد موتها زياد ماخشلهاش بكل اساسا ماروحش للحوش..
هو سكر الباب وقعد يمشي بإتجاه السرير وع وجهه ملامح الحزن..
قعمز عليه..مرر نظره ع الدار لين جو عيونه ع شال لزياد محطوط ع مخده فوق السرير اسيمه داراته بإيديها..
خداه..وقعد يشبحله ويذكر فيها كيف كانت تخيط فيه..
نزلوا الدموع من عيونه..قرب ليه وشمه...
كانت ريحتها مع ريحة زياد مختلطه..
غمض عيونه بشده وبدي يبكي وهو يكتم في عبراته...
كان محتاج للبكاء...
والدموع من الله رحمه...
تمدد ع سرير زياد وهو يبكي وضام الشال لصدره..
لين جاه النوم ورقد...
🍁🍁🍁🍁
تاني يوم...
الساعه الخامسه والنصف عصرا..
مقعمزة قدام التلفزيون سرحانه..
وامها تبخر في الحوش.
فجأة رن الجرس..
ام مريم؛مني زعمه..
مريم شبحتلها وهي ساكته..
حطت امها البخاره ومشت للباب..وفتحاته..
واستغربت لما تلاته نساوين..
وحده تبان قريبه من عمرها وفي جنبها وحده من عمر مريم لكن حامل..
والتالته لاتبان كبيرة ولاصغيره بش جميله جدا ابتسمت وقال..
عفاف بإبتسامه؛السلام عليكم...حوش **** ****..
وردت عليها ام مريم تقول:وصلتي...
🍁🍁🍁🍁
في احدي المستشفى..
في واحد من الممرات كانت واقفه ع خطيبها بتفتح معاه موضوع خطير..بان عليه هكي من ملامح وجهها واسلوبها في الكلام..
سفيان؛خشي في الموضوع طول رنيم..
رنيم بخوف وتوسل:اعطيني وعد انك تفهمني وتوقف معاي..
هو بش يعرف قال مسايرة؛خلاص وعد قولي..
هي خدت نفس عميق وبدت تحكيله عن قصه ليها شهور مدرقتها عنه....
متأمله انه يوقف معاها ويساندها...
#سبحوا_بحمد_الله
#براءة
#البطل_المغمور
يتبع…
