كنت عاوز اقول حاجة للشباب ( من سن ١٥ سنة وانت طالع).
اوعى تتعود تحمل الناس اللي حواليك اسباب فشلك في أي حاجة .... انا معاك أن أحيانا الاهل بيكونوا سبب من اسباب التعثر في حياتك... بالذات في الفترة اللي هم مسئولين فيها عن الانفاق عليك... وده ممكن يكون بسبب طريقة تفكيرهم او طريقة إدارتهم.
وانت صغير كان مقبول أن الناس تتعامل معاك انك ضحية الاهل والمجتمع والظروف.
لكن من دلوقتي لازم تتعود تحاسب نفسك وتشيل مسئوليتها.
انا أعرف واحد عنده اكتر من ٣٠سنة بيحمل أبوه أسباب فشله في الحياة لان ابوه موافقش علي الكلية اللي كان عاوز يدخلها من ١٥ سنة .... ولحد النهاردة لو وقع واتكعبل يقولك ابويا السبب لأنه موافقش على رغبتي من ١٥ سنة.
لازم تفهم ان انت لو مش ملتزم بالصلاة....ده لانك مش عاوز تصلي...مش عشان ابوك بيأمرك بالصلاة بشكل منفر....ابوك ممكن يكون غلطان في الاسلوب....بس انت لازم تتحمل مسئولية فعلك... روح اسمع درس عن الصلاة ولا صاحب ناس ملتزمة بيها.... بس ماترميش اللوم علي ابوك.
انت متعثر في الدراسة عشان انت مش مجتهد ... مش عشان ابوك مش عاوز يديك درس او كورس رغم انه ماديا مقتدر ..حتى لو ابوك غلطان ... روح ذاكر مع حد شاطر وحاول تفهم مرة والتانية......اتصرف المهم ماتستسلمش للفشل.
في حاجات ماعندكش فيها خبرة لان أهلك ربوك تربية مقفولة. .. ماشي ... عندك حق .... من دلوقتي حاول تخرج وتتعلم وتتكحرت.
في ناس بتمر بظروف أصعب منك ألف مرة.... وبتتمنى يكون عندها نص اللي عندك.... بس بتنجح في حياتها او علي الاقل بتعافر.
انا عارف ان الظروف صعبة.... وكمان في حاجات ملناش فيها يد..... لكن لو اتعلمت ترمي الغلط علي غيرك عمرك ما هتنجح
