حاجة كويسة إنك تستشير الناس اللي في الدايرة القريبة منك قبل ما تاخد قرار في حياتك.
لكن في النهاية في حاجات بتبقى نسبية وماحدش هايقدر ياخد فيها قرار مكانك.
لما كنت باخد قرار الجواز ....معظم الناس اللي حواليا كانوا شايفينه قرار مش صح.... وطبعا كان عندهم وجهة نظر....ايه اللي يخليني إتجوز وانا عندي ٢٢ سنة في ظروف مادية مش سهلة أبدا؟ .... بس انا قررت آخد الخطوة دي لإعتبارات نفسية ماحدش عارف قيمتها غيري.. ولو كنت إستسلمت وقتها للرأي العام كنت خسرت حاجات ماكنتش هعرف أعوضها.
قرار رجوعك من الغربة عشان تبقى في وسط ولادك ممكن يكون قرار غبي من وجهة نظر ناس كتير.... بس في حاجات جواك وجوه أهل بيتك ماحدش بيحس بيها غيركم
قرار فسخ الخطوبة اللي انتي أخدتيه ...علي الرغم إن العريس مافيهوش حاجة تتعيب و رغم كده انت مش متقبلاه.... ده قرار صح ممكن يكون قرار غبي من وجهة نظر ناس كتير.
قرار إنك تسيب شغلك في شركتك الكبيرة عشان تبدأ البيزنس بتاعك ...او عشان إنت مضغوط في الشغل بشكل خلاك بدأت تخسر حياتك كلها فعلا ...ممكن يكون القرار ده غبي من وجهة نظر الناس اللي حواليك .
طبعا خد رأي الناس اللي انت بتثق فيهم... وفي قرارات لو أخدتها بدون إستشارة ومن غير ما تستفيد من خبرات الناس هتلبس في الحيط....لكن في الآخر في حاجات نسبية ...وفي تفاصيل ماحدش عارف قيمتها الا انت ..... إنت أدرى بحالك وإحتياجاتك وأولوياتك.
إستخير ربنا العليم ... وإستشير أهل الثقة ....ورتب أولوياتك ..... وتوكل علي الله.
#دفا_البيوت
#محمد_فتحي
