أسد الداخلية 🇮🇶

الحلقة 2 🚬

❛━━━━━━━ ••• ━━━━━━━❜
المشهد الاول
❛━━━━━━━ ••• ━━━━━━━❜

وصل اسد مكتب العميد صلاح .. الشرطي اللي بالباب اخذلة تحية ..
اسد..
- العميد صلاح موجود ..

الشرطي رد علة اسد ..
- موجود سيدي ..

دگ اسد الباب ..وفتحة ..العميد صلاح گاعد ورة الميز وگاعد يمة واحد مسوي لحية طويلة كلش ولابس قاط اسود .. من شافوا  اسد وگفوا  .. سلم اسد علة العميد صلاح..
- البقية بحياتك سيدي ..

صافحة العميد صلاح ..
- حياتك الباقية اسد…

مد ايدة اسد للشخص الگاعد يم العميد صلاح  ..

محمود البيشي..
- ليش هيج احنة نسلم ..

شبگ اسد حيل ..اسد استغرب كلش ..
- مشتاقلك ولك ابو وطن ..

من سمع اسد "ابو وطن " بصوته ..
- محمود البيشي !!!

محمود..
- بشحمة وبلحمة ..

رجع اسد شبگة حيل شوية و وخر عنة ..
اسد...
- شايف شگد فشرت عليك من سمعت بيك استشهدت ..

محمود..
- هاي بدل متقرالي الفاتحة

ابتسم اسد ...
- لاتخاف ترستك فاتحة ..ولك مامصدك عيوني محمود البيشي عايش وگاعد گدامي .. اسف سيدي بس محمود دفعتي اربع سنين بالكلية سوة .. خدمنة بكل مكان اني وياه ..

العميد صلاح ابتسم ..
- اني راح اطلع وانتو كملو حجيكم سوة ..

باوعلة أسد…
- العفو سيدي بس ..

رد عليه العميد صلاح بحدة ..
- الحجي اللي راح تسمعه من محمود البيشي مامفروض اسمعه ..

طلع العميد صلاح وسد الباب  ..
- اي سولفلي ولك ساقط شلون متت وشلون عدلت فهمني بهاي لان مخي راح يطگ ..

عدل گعدته محمود ..
- شوف أسد الشغلات اللي راح احجيهة معلومات سرية واربع اشخاص بوزارة الداخلية يعرفوهة بس .. وانتة الخامس ..
اسد..
- مبين الموضوع خطير ..
محمود..
- اخطر من ما انتة متصور .. توعدني ماتحجي لاحد ..واني لو ما مجبور ماجيت ولا راح اسولف ..

اسد...
- وعد بير اظلم مالة نهاية ..
طلع اسد جكارة ورثهة .. قدم لمحمود بس مقبل ياخذ .. وبدة محمود يسولف ..

- قبل لانطلع للعملية اجة ضابط رفيع المستوى من الاستخبارات العسكرية دز علية ..وطلب مني  انفذ عملية من نوع خاص داخل العملية اللي اني رايح بيهة وهاي العملية جانت استشهادي !!

اسد سحب نفس وذبة..
- مافهمت وضحلي اكثر ..

محمود ..
- اني افهمك ..جانت العملية نجيب واحد من العصابات التكفيرية قبل لايصير موضوع داعش من الاساس.. لان وصلت معلومات استخباراتية انه جاي يحشد ناس علمود ينظمون لكيان مسلح جديد راح يحتل محافظات هواي ومنهة بغداد ويصنع دولة اسلامية جديدة ..بين العراق وسوريا .. الضابط اللي اجة فهمني انه اذا قبلت بهاي المهمة ..كل الناس اللي تعرفني واهلي راح يوصلهم خبر انه اني استشهدت بالمهمة وانفجر حزام ناسف علية واختفة جسمي من الوجود بعد موافقتي طبعا .. الضابط اللي طلب مني انفذ هاي المهمة فهمني انه تم اختياري لسبب واحد انه اني قبلت قبل اروح مهمات صعبة وخدمت بالاستخبارات وماريت فترة طويلة بالعمليات الخاصة ..وفهمني انه الموضوع سري وغاية بالصعوبة ..بس اذا نجح هذا الموضوع والعملية راح انزرع وسط هاي العصابات ..وراح انقل معلومات مهمة البلد محتاجهة بحربة عليهم ..
سحب اسد اخر نفس بالجگارة وطفاهة ..
- وانته قبلت ..